Akbar Allahabadi ki ek behtareen aur mashoor ghazal

Syed Akbar Hussain Akbar Allahabadi ki Urdu adab ko sab se badi den hai shayri mein tanz-o-mizaah ko ek khaas andaaz se istemaal karke kafi auron ko raasta dikhana. Tanz-o-mizaah unse bhi pehle Urdu shayri ka ek mukhtalif hissa tha, lekin jis andaaz se Akbar ne use istemaal kiya woh bemisaal tha.

Khair is pahlu par kabhi aur charcha karenge. Is waqt to main Akbar ki ek lajawaab ghazal se aap sab ko vakif karna chahta hoon. Ise bhi tarannum mein ek benazir arbab-e-sukhan ne pesh kiya hain… lekin waqt ki baat hain use sunne aur sarahne waale chand hi bache hain is jahan mein. Afsos. Khair mujhe fakhr hain ke main is tadaad mein hoon. Mera ishaara K.L. Saigal ke taraf hai. Yeh bhi mumkin hai ke jo makhluq hai is sadi ka unme yeh qabiliyat nahi hain? Khair jaane dijiye…. Main sirf itna hi kahunga ke jin sab ne Saigal ko is kalam ko awaaz dete hue suna hain woh is ghazal ki asli ahmiyat ko hi samajh sakte hain.

Ik aur baat. In gardish ke dinon, yeh ghazal aur ziadah meri zehn mein aati hai  aur main iske kuch sher se khas ittefaaq rakhta hoon. Khair yeh bhi kisi behtareen aur umda kalam ki pehchaan hoti hai ke use jis bhi ahd ya halaat mein padhe aap uske kuch hisse se shanasai kar sakte hai. Main is ghazal ka maqta se pehle aane waala sher aapne kuch ‘mohsinon’ ke nazar karna vajib samajhta hoon. Umeed hain woh ise kab na kabhi to dekhenge ya koi unhe iski itla kar dega….. Umeed par duniya qayam hai.

Duniya mein hoon duniya ka talabgaar nahi hoon
Bazaar se guzra hoon khareedaar nahi hoon

Zinda hoon magar zeesht ki lazzat nahi baaqi
Har chand ki hoon hosh mein hoshiyaar nahi hoon

Is khanaa-e-hasti se guzar jaaunga be-laus
Saaya hoon faqat naqsh-e-deevaar nahi hoon

Afsurda hoon ibarat se davaa ki nahi haajat 
Gam ka mujhe ye zauf hai beemaar nahi hoon

Vo gul hoon khizaan ne jise barbad kiya hai
Uljhun kisi daaman se main vo khaar nahi hoon

Yaarab mujhe mahfuz rakh us but ke sitam se
Main us ki inayat kaa talabgaar nahi hoon

Afsurdagi-o-jaur ki kuchh had nahi ‘Akbar’
Kaafir ke muqabil mein bhi deendaar nahi hoon

About these ads