Adab-e-Lakhnau ke 13 numainda alambardar: Meri fehrist

Fehrist tayyar karna kuch logon ke fitrat me hota hai, aur main apne aap ko giroh ka hi samajhta hoon. Berhaal, yeh ek aisi fehrist hai jo mere zehn mein bahut der se hai aur maine socha ke aakhir ise likh hi daalun.

Nawaabi daur se aaj tak, Lakhnau adab ka ek khaas markaz raha aur taqreeban in dhai sau saal se mein jab se Awadh ko riyasat ki dar-ul-hukumat banaya gaya, iski sarzameen par hazaron ke tadaad mein shayar aur doosre adeeb paida huye hai aur adab ke mukhtalif sinfon mein apne kalaamon se mashoor huye hai — unke aur adab ke madadgaron ki to baat hi chodhiye. Agar is mein se aapko kaha jaaye ke is …is – maaf kijiye lafz ke liye, is fauj mein se kuch chand logon ke chuna jaaye jo is adab-o-tehzeeb ki numaindgi aur alambardari kar sakte hai, to aap kis ka naam rakhenge?

Isi maqsad se maine yeh fehrist taiyyar ki hai – kuch un 13 logon ki — jo meri samajh se is khaas ohde ke haqdaar hai. Saath mein ek muktsar, bahut hi muktsar, bayan unke karnaamon ka hai. Is gustakhi – inko sirf ek jumlaa ata karna – ke liye main mazrat chaunga aur aapko yaqin bhi dilaunga ke bahut jald in sab shaksiaton par main tafseel se likhunga.

Main dobara saaf karna chahunga yeh mera apna khayal hai – aur main bilkul koi daava nahi kar raha hoon ke yehi honi chahiye. Aap ise ittefaq rakhte hai to nahut achaa, agar aapko lagta ke yeh fehrist mein ziada naam hone chahiye the, ya koi hai jo aur bhi hai jo ziadah haqdaar hai mere in numaindon se, to baraye karam aap apni rayy ka zaroor izhar kijiye… Meri to yehi iltija rahegi ke kuch aapke, kuch mere khayalon ki amad-o-raft ho, aur ham tayy karen ke yeh kaun sab hai jinhone is ‘Shahr-e-benazir” (mere ek numainde ke lafzon mein) ko mashoor kiya……

Kuch to naam to ek dum aa gaye, aur kuch mein bahut kashmakash huyi. Do shayaron ko “Dabistan-e-Lakhnau” ke pehle alambardar qaraar diya jaata hai… in mein koi se kisko shaamil kiya jaaye? Aise hi do shakhs ne marsiyon ko ek naye maqaam par pahunchaya…. Is mein se kaun maujud hona chahiye? Yeh aur bahut aise sawaal mere saamne aaye lekin maine apni samajh se hi inka saamna karne ki koshish ki apni hikmat-amli se…..

Berhaal, mera muqadamma bahut taveel ho chuka hai aur ab mudde pe aaya jaye. To aapki ijazat se main apni fehrist ka aghaz karta hoon….

#1 Muhammad Yahiya Mirza Amani, Nawab Wazir al-Mamalik Khan Bahadur Asaf-ud-Daula (1748-97) Awadh ke chauthe nawab aur shahr ki kuch yaadgaron imaraton ke liye zimmedaar. Sakhawat aur faizi ke liye mashoor

#2 Insh’Allah Khan Insha (1756-1818) Un ke tartib mein jo Lakhnau ke darbaar mein panah paaye. Ek qaabil lekin shararati shayar aur Urdu zabaan par pehli kitab ke musaanif.

#3 Mirza Rajjab Ali Beg Suroor (1785-1869)  Musannif dastaanFasaana-e-Ajaib” ke, jo ek ala darje ki Urdu aur muqauffa ibarat ki ek misaal hai aur Lakhnau, “Shehr-e-benazir”, ka ek khoobsurat bayan pesh karti hai

#4 Khwaja Haider Ali Aatish (1778–1848)/Iman Baksh Nasikh (1776-1838) Dabistan-e-Lakhnau ko ek pehchan dene waale do shayar. Main apne aap is ko is qaabil nahi sochte hoon ke in mein farq kar sakun, isliye dono ko rakha hai.

#5 Munshi Naval Kishore (1836-1895) Apne mein ek idaara tje. Hindustan mein kitabon ko shaya karne mein apne pahal ki, aur apne vaqt mein hazaaron qimti Hindi aur Urdu kitabein aapki press ki wajeh se aam huyi.

#6 Munshi Sajjad Hussain (1856-1915) Hindustan ke ek behtareen akhbar-navis. Aapne England ke “Punch” ki tarz par “Awadh Punch” akhbar nikala, jisne tanz-0-mizaah se khabar pesh karne mein ek makhsos ada banayi.

#7 Mir Babar Ali Anis (1803-1874)/Mirza Salamat Ali Dabir (1803-1875) Marsiye ke sinf ko aala darje mein lane mein aap donon ki shirkat hai. Meri kya haisiyat ke aap donon ke beech mein faisla karun, isliye dono

#8 Maulana Abdul Halim Sharar (1869-1926) Lakhnau ki tehzeeb ko duniya ke saamne ek bemisaal andaaz mein ‘Guzashta-e-Lakhnau’ mein pesh kiya. Novel-nigaar aur akhbar-navis bhi rahe.

#9 Pandit Ratan Nath Dhar Sarshar Lakhnavi (1846-1903)  Urdu nasr ko ek naya modh diya ‘Fasana-e-Azad’ se, jisne is zabaan mein novel ko janam diya, aur bayan ko dastaan ki khayali duniya se rozmarrah ke zindagi  mein lekar aaya

#10 Maulana Syed Fazlul Hasan Hasrat Mohani (1875-1951) Ek ustaad shayar, jin ki ek hi ghazal unhe maqbool kiya huye hai. Urdu shayari par bhi likha, aur siyasatdaan bhi the.

#11 Syed Arzu Lakhnavi (1875-1956) Dabistan-e-Lakhnau ke ek naami shayar. Filmon, khaaskar Saigal, ke liye bhi kafi ghazlen aur naghme likhi

#12 Asrar-ul-Haq Majaz Lakhnavi (1913-55) Ek bahut hi umda shakhs jin ki shayari aaj bhi hi utni taazi hai jaise unke vaqt mein thi. Haazir-jawaabi ke liye bhi jaane jaate the aur unke latife aaj bhi mashoor hai.

#13 Attia Hossein (1913-1998) Novel- aur afsana-nigaar. Aapne Lakhnau ki – pure Hindustan ki – tareekh ke ek naazuk aur mushkil vaqt ke baare mein qabiliyat se apni novel “Sunlight on a Broken Column” mein likha. Is ka tarjuma Urdu mein bhi ho chuka hai.

Lijiye, izzat-0-maab khwatin-o-hazrat, meri fehrist puri huyi……

About these ads

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

Join 649 other followers

%d bloggers like this: