Majaz ke kuch aur asha’ar

Jaise maine qaum aur mulk to vaadah kiya tha, main aapke saamne kuch Asrar ul-Haq Majaz ke kuch aur mukhatalif asha’ar pesh kar rah hoon. Yeh kuch unki ghazlon se bhi liye gaye hain aur kuch aapne mein asha’ar bhi hain. Aap khud hi dekhen.

Aghaz ik behtareen ghazal ke maqte se….  

Mujhe sune na koi mast-e-badah-e-ishrat
‘Majaz’ toote hue dil ki ek sada hoon main

Maine pichli jo Majaz ki ghazal pesh ki thi us mein aap ka hijaab par tawajju chaha tha. Is sher mein yeh bhi aata hain

Is ek hijaab pe sau behijaabion sadqe
Jahan se chahta hoon tum ko dekhta hoon

Aur yeh dekhen….

Kisi masoom par bedaad ka ilzaam ke maane
Yeh vahshat-khez baatein ishq-e-bad-anjaam rehne de

Is asha’ar mein maayusi ka aalam pe gaur den….

Kahan ka karam aur kaisi inayat
‘Majaz’ ab jafa hi jafa chahta hoon

Is mein, Majaz ek aur bulandi par pahunchte hain…

Dekh sakta hoon jo aankhon se voh kafi hai ‘Majaz’
Ahl-e-irfaan ki nawaazish mujhe manzoor nahi

Aur isme ghadr ka rang……

Dekhenge ham bhi kaun hai sajjada tarz-e-shauq
Le sar utha rahe hai tere aasman se ham

Aur is jazbaat se to kafi log (mujhe milkar) ittefaaq rakhenge….

Zindagi ke khaake saadeh ko rangeen kar diya
Husn kaam aaye na aaye ishq kaam aa hi gaya

Aur yeh bhi mujhe apni rah-e-zindagi ka hissa lagta hain…..

Tujhe dhoondhta hoon teri justju hai
Maza hai ke khud gum hua chahta hoon\

Aur yeh bhi…..

Aah ye hosh ka aalam voh ghamon ka toofan
Uff yeh masti ke hai phir hosh mein aane ki daleel

Mazrat chahunga, lekin yeh bhi……

Tum bhi ‘Majaz’ insaan ho aakhir lakh chipaon ishq apna
Yeh bhed magar khul jayega, yeh raaz magar afshan hoga

Is mein dekhiye woh kaise kuch hi lazon mein kitna bade sawaal uthaye hain mazhab ke jaanib se…..

Jalwah-e-toor khwaab-e-Musa hai
Kisi ne dekha hai kisi ko dikhlaya hai

Main jaanta hoon main mazrat maang chuka hoon har sher ko apne se jodhne ke liye, lekin is ke liye main kuch nahi keh sakta hoon. Jis manzar ka Majaz ne bayan kiya hai, main ne khud mehsoos kiya hai aur sab se paas guzashta saal ke aalkhri kuch dinon mein….. jo bhi is ka anjaam hua

Jab bhi aankhen milen un aankhon se
Dile ne dil ka mizaj poocha hai

Aur yeh dekhiye…. Bahut umda khayal hain

Kabhi saahil par rah kar shuq toofanon se takrayen
Kabhi toofan mein rah kar fikr hai saahil nahi milta

Yeh bhi…..

Kahan ka rehnauma aur kaisi raahen
Jidhar badhta hoon manzil dekhta hoon

Aur yeh main kuch log, jinhe mujh ye lagta tha ke main jaanta hoon, main unke nazar karta hoon….

Khoon-e-aadam pe koi harf na aane paaye
Jinhe insaan nahi kehte unhen insaan kar de

Ise behtar apne maqsad ka bayaan maine shayd he suna hai….. 

Zamaane se aage to badhe ‘Majaz’
Zamaane ko aage badhana bhi hai

Is ke baare mein kuch kehna mere qabiliyat mein nahi hain….

Gham-e-dauran mein guzri jis qadr guzri jahaan guzri
Phir is par lutf ye hai zindagi ko muktsar jaana

Aur yeh bhi aapne liye hi baat karta hai…..

Khirdwaalon se aakhir husn par tanqeed kya hoti
Na afsun-e-ada samjhe na andaaz-e-nazar jaana

Yeh bhi un junoon-bhare dinon ko achi tarah bayan karta hain……

Yeh qatl-e-aam aur be-azaan qatl-e-aam kya kahiye
Yeh bismil kaise bismil hain jinhen qaatil nahi milta

Yeh do par bhi tawjju karen…..

Ata kiya hai ‘Majaz’ fitrat ne vo mazaaq-e-lateef ham ko
Ke aalam-e ab-o-gul se hat kar ek aur aalam bana rahe hai

Vahshat-e-vahshat mein mein ye apna hi girebaan kab tak
Khatam ab silsilaa chak-e-girebaan kar den

Is khayal se main bhi ittefaq rakhne ki koshish karunga….

Bahut kuch aur bhi hain is jahaan mein
Yeh duniya mahz gham-e-gham nahi hai

Aur ise to main kafi arse se mehsoos kar raha hoon….

Kaun uth kar chala muqabil se
Jis taraf dekhiye andhera hai

Yeh bhi dekhen….

Kab kiya tha is dil par husn ne karam itna
Meharbaan aur us darja kab tha aasman apna

Aur isko aapko kabhi tarannum mein sunne ka kaash mauqa mile….

Phir kisi ke saamne chashm-e-tamanna jhuk gayi
Shauq ki shokhi mein rang-e-ihtiraam aa hi gaya

Aur yeh silsila anjaam par lane ke liye is se behtar kya ho sakta hai…

Dil dhadak uthta hai khud apni hi har aahat par
Ab qadam manzil-e-janan se bahut door nahi

Tamam Shud!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: