“Ham hai ke abhi kal hi pairon pe khade hai” … Wasim ki ek umda ghazal

Is mein koi shak nahi hai ke Janab Prof Zahid Hussain Wasim Barelvi is sadi kya, pichli sadi ke sab se bade shayron mein se hai. Yeh ohda unke kalaam se zaahir hai, jiska ek behtareen namoona main aapke ke saamne pesh kar raha hoon. Haan, is se pehle ek baat kehne ko rehti hai – jab ke mere koi iraada nahi hai ke aap ke aur umda ghazal ke beech deewar banu – aur yeh hai ke aap dekhen ke kitne asaan alfaaz unhone istemaal kiye hai apne buland khayalaton ka izhaar karne ke liye.

Maana aaj ke jahan mein log is zabaan se aksar mehroom hota hai, par un sab se bhi main keh sakta hoo daave ke saath ke woh yeh ghazal padhe aur is mein ek aisa lafz dhoondhe jo woh nahi pehchan paaye hai ya rozmaraa ki zindagi mein khud na istemaal kiya ho.

Ham yeh to nahi kehte ke ham tujh se badhe hai
Lekin yeh bahut hai ke tere saath khade hai

Woh aaj ko sar karke dikhane par adhe hai
Ham hai ke abhi kal hi pairon pe khade hai

Yeh baat to is baagh ke haq mein nahi jaati
Kuch phool bhi kanton ki himayat mein khade hai

Ruswai ke ek darr ko bhi woh jeet na paya
Ham jiske liye saare zamaane se ladhe hai

Dete hai wahi faisle toofanon ke rukh pe
Jo ek zamaane se kinaron pe khade hai

Hoon khaak magar meri mohabbat ki badaulat
Yeh chand sitaare tere kadmon mein padhe hai

Yeh gungon ki mehfil hai nikalna hi padhega
Kya itni khata kam hai ke ham bol padhe hai

Duniya se ‘Wasim’ aayi banaane ke jahan baat
Hum khud se akele mein bahut der ladhe hai

Maine jo is post ko unwaan diya hai woh saaf kehta hai ke Wasim Barelvi ki ek ghazal pesh kar raha hoon, lekin aapke lutf ke liye ek aur de deta hoon. Yeh Wasim sahab ki pehli ghazal thi jo maine suni thi – aur woh bhi unke zabaani ek mushairah mein. Shahd aapko bhi pasand aaye. Chauthe sher par tawajju den….. aur jo jawaan hai umr pe doosre par.

Usulon pe jahan aanch aaye takraana zaroori hai
Jo zinda ho to phir zinda nazar aana zaroori hai

Nayi umron ki khudmukhtariyon ko kaun samjhaye
Kahan se bach ke chalna hai kahan jana zaroori hai

Thake haare parinde jab basere ke liye laute
Saliqamand shakhon ka lachak jaana zaroori hai

Bahut bebaak aankhon mein ta’alluq tik nahi pata
Mohabbat mein kashish rakhne ko sharmana zaroori hai

Saliqa hi nahi shaayad use mahsoos karane ka
Jo kehta hai Khuda hai to nazar aana zaroori hai

Mere honthon pe apni pyaas rakh do aur phir socho
Ki is ke baad bhi duniya mein kuch paana zaroori hai

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: