Nawaz ki kuch aur ghazlen

Dr Nawaz Ali Khan Nawaz Deobandi ek zabardast sha’ir hai to zaroor hai, na sirf apne tasavvur, apne quwwat-e-bayan, apne buland khayalat ke hawaale se, magar us insaniyat se jo unke kalam mein nihaan hai, jhalakti hai bakhub. Unki tareef bahut logon ni ki hai, hai lekin meri samajh se sab se achhe andaz mein jo ki thi, woh Anwar Jalalpuri ke jaanib thi Nawaz sahab ka ta’aruf ik mushaire mein karte huye. (Yeh doosri baat hai ke is nazakat aur nafasat se jo Dabistan-e-Lakhnau se taaluq rakhta hai wohi kar sakta hai…. par yeh baat kisi aur baar).

Anwar sahab ne kaha: “Bahut hi motabar…Ek shakhs jo mazhab, tehzeeb, tareekh aur ilm-o-fan ke shahr Deoband se talur rakhta hai.Ek shakhs jinki kayi kitabein hai. Jise hamaari ghazal ko apni saadgi aur ikhtilafat se is tarah sanvara aur nawaza hai ke aaj ke is behke huye daur mein ghazal aur abru aur izzat mil gayi hai…. Yeh naam hai Dr Nawaz Deobandi ka…”

Ji, main kya, hazaaron ki tadaad mein log in jazbaaton se ittefaq rakhenge. Khair iski saboot Nawaz sahab ki ghazlon mein hai, jinke kuch namoone main aapke saamne pesh karne ka khwaishmand hoon….

Aap dekhiye ke kaise unhone ab-o-hawa, muflisi, sisyasat, haadse, aapsi jazbaat, mohabbat, mazhab, aur kitne aur mudde ko joda hai apne asha’aron mein. Ek aur iltija, in ghazlon ko padhte huye, khud ko tarannum mein sunaye…. Tab asli maza aayega…..

Aghaz karta hoon main is ghazal se. Satven asha’ar par khaas tawajju chahunga.

Woh rulakar hans na paaya der tak
Jab main rokar muskuraya der tak

Khud-bakhud be sakhta mein hans pada
Us ne is darje rulaya der tak

Bhulna chaha kabhi usko magar
Aur bhi woh yaad aaya der tak

Bhookhe bachchon ki tassali ke liye
Maa ne phir paani pakaya der tak

Na-khalaf bete to dard-e-sar bane
Betiyon ne sar dabaya der tak

Isme-azam tha ke mera sher tha
Sufiyon ne gungunaya der tak

Gungunata ja raha tha ek fakir
Dhoop rehti hai na saaya der tak

Kal andheri raat mein meri tarah
Ek jugnu jagmagaya der tak

Chupke chupke meri ghazalon ko Nawaz
Dushmanon ne gungunaya der tak

Ek aur dekhiye….

Haal-e-dil sabse chupane mein maza aata hai
Aap pooche to bataane mein maza aata hai

Roshni bojh si lagti hai sahab-e-hijran mein
Haan, magar dil ko jalane mein maza aata hai

Jiske kuch taar ulajh jaate hai dil ki surat
Bas usi saaz pe gaane mein maza aata hai

Jaan bachane ka tasavvur bhi bura lagta hai
Ishq mein jaan gavaane mein maza aata hai

Yaad kar karke woh garmi ki bhaari dopahren
Pehli baarish mein nachne mein maza aata hai

Ek aur…. iske aaakhri asha’ar par gaur karen.

Jashn-e-gham-ehayat manane nahi diya
Is muflisi ne zehr khaane nahi diya

Hamne to sadalohi mein khaya koi fareb
Phir woh fareb auron ko khane nahi diya

Aandhi ne roshni ki himayat to ki bahut
Lekin koi chiraagh jalaane nahi diya

Ik aad ghar jal gaya par shahr bach gaya
Ab ke diya ka saath hawa ne nahi diya

Raazi tha main bhi aur mera dushman bhi sulah par
Kuch doston ne haath milaane nahi diya

Aakhir mein yeh…. Lagti to asaan hai, lekin bahut gehre maane hai… aap khud hi samajh sakenge. Maqte mein dekhiye kis behtareen dhang se unhone apne taqallus ka itemaal kiya hai.

Jo safar ikhtiyaar karte hai
Wohi dariya ko paar karte hai

Sach to yeh hai khud musafir ka
Raaste intezaar karte hai

Unse bichde to phir hua mahsoos
Woh hame kitna pyaar karte hai

Ham to apnon se kha gaya dhokha
Aapko hoshiyaar karte hai

Jhoothe vaade na kar hamse
Ham tera aitbaar karte hai

Ham to us dil-Nawaz dushman ko
Doston mein shumaar karte hai

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: