Nawaz Deobandi ke kuch aur asha’ar

Dr Nawaz Deobandi sahab ke baare mein main pehle bhi kafi kuch likh chuka hoon aur unke kuch kalam bhi aapke nazar kiye hai. Yeh kuch aur mukhtalif asha’ar hain unke, bahut se muddon par. Ik nihaiti asaan zabaan mein pesh kiye gaye hai, lekin kuch mein tasavvur ki bulandi aur kuch lafzon ka maahir khel inhe ek alag darja deta hai. Ab khud hi dekhen, shayd kuch pasand aaye, kuch aap mein sawaal ya khayal uthaye……

Ek jo zindagi ke liye hi kaha jaa sakta hai… 

Pa hi lega manzil ko kaafila iraadon ka
Hausle hi karte hai rahbari musafir ki

Aur yeh rishton par…

Badi mushqil se niklegi koi surat ta’aluq ki
Tumhe rona nahi aata, hame hansna nahi aata

Aur is ke baare mein kya kehna…

Bure waqt ka main rafiq hoon tumhe kuch to sochna chahiye
Main chiragh-e-mehfil-e-hijr hoon, mujhe wasl mein na bujhana

Aur yeh aaj ke zamaane pe karaara tanz

Usi ka maal to bikta hai is zamaane mein
Jo apne neem ke patton ko zaafran kahe

Yeh siyasat par….

Aag mazloom ke ghar mein to lagai hogi
Kuch na kuch anch to zaalim par bhi aayi hogi

Aur yeh bhi bahut umda…

Anjaam uske haath hai aaghaz karke dekho
Bheege hue paron se hi parwaaz karke dekho

Aur is mein sha’ir ka tasavvur dekhen…

Dekh kar socha to paya faasla hi faasla
Soch kar dekha to tum mere bahut nazdeek thi

Yeh bhi zindagi ke liye hai….

Kabhi bhi raah mein lutne ka dar nahi rakha
Safar mein koi shareek-e-safar nahi rakha

Yeh bhi….

Woh mujh se door hota ja raha hai
Ghazal kehne ka mausam aa raha hai

Ek aur nayi siyasat par….

Shahr mein aise to halaat nahi the pehle
Ranjishe thi yeh fasadat nahi the pehle

Zindagi par ek aur…

Umr badhne ki ghlat fahmi mein kati sari umr
Sach yeh hai ki lamha lamha kam hui hai zindagi

Yeh hausle par….

Ham se ae dil ! Us musafir ki mehroomi na pooch
Baith kar saaye mein jis ko dhoop ka ehasaas ho

Zindagi ke aur pahlu par….

Rona padha kisi ko hasne ke waaste
Ham khud jale chiragh jalane ke waaste

Yeh bhi….

Uski sanjidgi bataati hai
Us ko hansne ka shauq tha pehle

Zindagi par ek aur nazar…

Zindagi to ek safar hai aur safar bhi raat ka
Zindagi ko jaane kyun manzil samjah lete hai log

Yeh bhi apni andruni taaqat par….

Jise na jalne ki khwaish na khauf bujhne ka
Wahi chiraagh hawa ke asar se bahar hai

Ek zimmedari ka asha’ar….

Mila de khaak mein gar raaste ki rukavat hoon
Pata manzil ka jo de aisa pathar ban ke rehne de

Ek aur ‘siyasat’ par….

Shehron shehron khoonrezi mein shaitanon ka naam na lo
Is saazish ke peeche koi insaan bhi ho sakta hai

Yeh aap hi samajh sakte hai….

Hareefon! Khub udaho saro pe khaak apne
Mere chiragh bujhane ko yeh hawa kam hai

Yeh bhi…

Dil-e-hazin! Tu sitamgar hi ka kaha kar de
Tadap ki tadapne ki inteha kar de

Ek aur hausle par…

Hamne ki masafat pe nazar rakhi hai
Dhoop ke shahr mein saye ki khabar rakhte hai

Badalte rishton pe ek nazar….

Bahut aziz tha main jab tujhe bayaban mein
Mera khayal gulistan mein kyun nahi rakha

Yeh main pehle bhi de chuka hoon, lekin qimati hai is liye phir se….

Agar bikne pe aa jao to ghat jaate hai dam aksar
Na bikna ka iraada ho to qimat aur badhti hai

Zindagi ke ek ahm pahlu par….

Jaan bachane ka tasavvur bhi bura lagta hai
Ishq mein jaan gavane mein maza aata hai

Aur ek bahut hi khubsurat khayal….

Tum saya saya chal kar bahut khush ho aur main
Raste mein ek chota sa pauda laga ke khush

Aur jaate jaate, ek aur zindagi ki sachai. Lafzon ke khel par tawajju chahunga aap sab ki….

Kuch rishte apne ho ke bhi anjaane hote hai
Kuch logon se ek anjaana rishta hota hai

Advertisements

7 responses to this post.

  1. Posted by Arvind on December 1, 2010 at 11:10

    Jab Nawaz sahab ka zikr ho or oitne pyare sher ho fir usme ye unka ek sher bhi jod do, Arz kiya hai ke,
    Mein apne bachho ki khati hai jan de deta,
    Magar ek gharib ki jaan ka muawaza kam hai

    Reply

  2. Posted by Sabhayata Sharma on February 14, 2012 at 12:11

    Maine unki zindagi ke baare mai bhi kai logo se malumat ki, to pata chala ke nawaz sahab jis fikr se ash’ar kahte hai, wahi fiqr unke seene mei rahti hai. unke ash’ar samaj ke un chote bade mozooat par hai jin ko padhne ke baad koi bhi insaan sahi raasta ikhtiyar kar lega. Purey hindustan aur pure samaj ke janib se nawaz sahab ko salam

    Reply

  3. Posted by Sabhayata Sharma on February 14, 2012 at 12:14

    mujhe unka ek sher bahut pasand hai jo Jagjit Singh Sahab ne apni album Cry for Cry mai gaya hai,

    Gungunata Jaa Raha Tha Ek Faqeer,
    Dhoop Rahti Hai Na Saya Der Tak.

    Reply

  4. Posted by saquib ali on September 17, 2012 at 07:31

    i m really like a potry of nawaz deobondy
    that is
    roshan kre ya na kre abhi charege shab
    mashwara ye hawa se kiya ja rha h kya

    Reply

  5. muje unka ye sher pasand hai,

    khusk nadi me utare kyu, utare the to dube kyu..
    aankhe shikwa karti hai ki khwab sunehre dekhe kyu..
    aur junke parr the kagaz ke , vo barish me nikle kyu..

    Reply

  6. Posted by Manish on August 29, 2013 at 12:39

    Nawaz sahab ke is she’r se india ki hakikat malum hoti hai
    BACCHO KI TASSALI KE LIYE MAA NE PANI PAKAYA DER TAK

    Reply

  7. Posted by Vinay kumar on October 8, 2013 at 20:41

    khusk nadi me utare kyu, utare the to dube kyu..
    aankhe shikwa karti hai ki khwab sunehre dekhe kyu..
    aur junke parr the kagaz ke , vo barish me nikle kyu..
    kaanton ki to fitrat hau tum kaanton se uljhe kyu……

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: