Bekal ki ghazlon se kuch maqte

Maine jab yeh naye ijad ko anjaam diya to iska aghaz ke liye, is blog ke  ‘rahbar’, Janaab Asrar-ul-Haq Majaz Lakhnavi, se behtar aur lkaun ho sakta tha. Doosri mein maine Hakim sahab ko pesh karne ka iraada bana liya tha, lekin mere zehn mein ik aur khayal aaya aur maine us pe amal kiya.

Mujhe ehsaas huya ke Mohd Shafi Khan Bekal Utsahi kafi arse se yahan se mehroom rahe hai, aur ab acha mauka hain ke unhe vapas layha jaye. Isi liye aapke liye, Bekal sahab ki kuch ghazalon se kuch 29 maqte…. ghazal ko sher maqte ka roop leta hai uski apni ek khaas ahmiyat hoti hai. Main isi pichli pot mein likh chuka hoon chunancha yahan nahi dohrayunga…aap baraye karam wahin dekh len.

Jaise maine pehle bhi kaha tha, is ijad mein aap sher padhe bina mere koi dakhl ke aur inhe khud hi apne se jodhe. Main umeed karta hoon ke yah aapko pasand aayenge….

Chirhegi dair-o-haram mein yeh bahs mere baad
Kahenge log ke Bekal ‘Kabir’ jaisa tha

Na rabta na koi rabt hi raha Bekal
Us ajnabi ko magar main salaam likhta hoon

Bekal yeh shakhs aaj farishton ke saath hai
Kal dekha tha ise libaas-e-bashar mein tha

Bade ustaad bante hai hamare ahd ke ‘Ghalib’
Chalo Bekal zara un tal kalaam-e-Mir pahuncha do

Woh diye jin ki lauen thi tez Bekal sham-e-gham
Andhiyan jab tham gayi to woh bhi madham hi mile

Maine jeene ki dua mangi this pehle Bekal
Lekin ab jeene ki mujh ko na dua de koi

Main samandar tha Bekal jahan ke liye
Pyaas ka mere seene mein sehra raha

Buzurgon ne kaha aeman shikan mahaul mein Bekal
Muqaddas log nazar-e-jaam-o-saghir ho gaye honge

Samundaron ne bulaya hai tujh ko ae Bekal
Tu apni pyaas ki sehra mein abru rakh de

Dost tere masroof hain Bekal lafz-o-tarannum ke choone mein
Aib-o-hunar sab tere fan ka tere dushman likh denge

Mujh ko tanhaiyan jab mile tere naghmon ne Bekal kya
Apne andaaz mein bajta raha tut kar ghunghroo ki tarah

Apne andar jhank ke Bekal soch zara
Tu hai sab ka dost to dushman kiska hai

Mutmain logon ko tune diya shahana mizaaj
Main to Bekal hoon mujhe zarf-e-qalandar dede

Log le aayenge jahan se nek naami ki sanad
Aap Bekal ji wahin rusvaion mein rah gaye

Hamne jise araam diya hai us se hame dukh dard mila
Khudgarzi ke ahd mein Bekal kis kis ko apnayenge

Donon taraf ho aag lagi phir itna andhera bazm mein kyun
Shamaa se aakhir phir kyun Bekal roothe huye parwaaane hai

Kis dost se main Bekal dukh dard kahun apna
Dushman bhi nahi milte ab daur-e-giraani mein

Geet mein husn-o-ghazal, ghazlon mein geeton ka mizaaj
Hamko Bekal tera usloob-e-sukhan achcha laga

Yeh junoon-e-ishq ka Bekal karishma hi sahi
Gham jise milta gaya woh shadmaan banta gaya ‘

Janga jangal basti basti pyar ka charcha husn ki baat
Phir kya Bekal tum jhanko ho har dil ki gehrai mein

Tera dam hai to bahaaron ko sukoon hai Bekal
Phir tere baad kahan baagh bageeche honge

Bekal bayan-e-husn-o-mohabbat baja magar
Khud is tarah mito ke koi dastaan bane

Sun ke Bekal se par kaif do rangeen ghazal
Asmaan par sitaaron ko neend aa gayi

Jo muskurate the Bekal hamaare rone par
Kisi ki yaad ne unko bhi ashkbaar kiya

Ghairon ki shikayat kyon kijiye, arbab-e-jafa ka shikwa kya
Yeh manzil-e-ishq hai ae Bekal apna bhi yahan begaana hai

Safar apna hai apne paaon apna azm hai Bekal
To phir kyun lutf-e-manzil marzi-e-rahbar pe rakha hai

Nadaan hai tu kitna Bekal
Likhta hai ghazal danaai ki

Kahe Bekal tu ladkhadata hai
Sher-goi bhi kya sharab hai kya

Bekal yeh maikade bhi farishton ki bazm hai
Ab aadmi ki aur kahan justju karen

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: