Majid Deobandi ki char ghazlen

Main ne Dr Majid Deobandi ke ek roomani geet aur shayd, do ghazlon se aap sab ko vaqif karvaya hai. Yeh ek behtareen shayar hai jo asaan lafzon bein buland khayalat ko bakhubi pesh karte hai, aur unki ghazal mein ek paigham bhi zaroor maujud hota hai. Is ka saboot aapko unki kuch ghazlon se milega…

To irshaad…..

Is mein dekhiye ke ise padhen bhi to lagegi ke tarannum mein hai… 

Laakh jahan mein jhoothon ki manmani hai
Sacchai ki apni reet puraani hai

Labh par aah musalsal hai aankh mein paani hai
Tanhai ka har ek lamha nuqsaani hai

Shor hamesha rehta hai us kuche mein
Dil hai ya seeme mein zindani hai

Jisko chahe beghairat kar sakte hai
Aap badhe hai aap ko yeh aasani hai

Kamzoron par rahmat ban be chha jaaon
Meri qaul nahi hukum-e-rabbani hai

Ham sab unke daman se vabasta hai
Mushkil mein bhi hamko yeh asaani hai

Tujh ko zamana mujh se cheene namumkin
Tera mera rishta to roohani hai

Main bhi unke madahon mein shareek hoon
Is duniya par meri bhi sultaani hai

Dharti ambar yaaro us ki hai sab se
Majid jisko kehte hai sailaani hai

Aur yeh dekhen

Gardish waqt ka muqaddar hoon
Main udaasi ka ek paikar hoon

Mujh ko darya salaam karte hai
Tishnagi ka ajeeb manzar hoon

Muskurana to meri fitrat hai
Rone mein dard ka samundar hoon

Ek pehchan ban gaya hoon main
Aap ke raaste ka pathar hoon

Mujh ko tanha samjhe mere hareef
Zaat mein apni lashkar hoon

Main simtun to ek qatra hoon
Aur phholun to ek samundar hoon

Jo manzoor hai teri yaadon se
Main usi raat ka muqaddar hoon

Voh bhi qaim hai apni zad par aaj
Main bhi apni ana ki zad par hoon

Main maseeha agar nahi Majid
Qaatil-e-shahr se to behtar hoon       

Aur yeh bhi

Bandagi ki azmat ko arsh se milaun ga
Tere aastane par jab main sar jhukaon ga

Umr bhar dua maangi jis ne mere marne ki
Main usi ko jeene ki umr bhar dua doon ga

Lakh roye zeba ko tum chupao parde mein
Jab bhi dil pukaarega har naqaab uthaon ga

Dastaan tabahi ki aap poochte kya hai
Main agar sunaunga aap ko rula doon ga

Muskurate zakhmon se haal pooch lo mera
Aap ke sawaalon ka main jawaab kya doon ga

Main sada khilaunga phool mehr-o-ulfat ke
Aatish-e-adavat ko pyaar se bujahun ga

Iltifat-e-aali ka yeh jawaab hai Majid
Jab woh muskurayenge main ghazal sunayun ga

Aur aakhir mein yeh. Is mein dekhen ke unhone ek Angrezi mohavre ka kitna badhiya istemaal kiya hai. Ama, ab mere se na puchiye kaun sa aur kahan hai. Padh ke dekhiye aap use khud pehchan lenge…. 

Lakh khauf taari ho zalzalon ke aane ka
Silsila ham bhi na chodhenge ghar banane ka

Voh azeem shaksiyat ham ko yaad aati hai
Zikr jab hi hota hai aasman pe jaane ka

Kamyaab karte hai faislon ki mazbooti
Dil mein hausla rakhiye kashtiyan jalane ko

Tum hadees-o-Quran mein rah kahir ko dhoondho
Khatam ho chuka hai baab anbiya ke aane ka

Mar ke bhi nahi marte ham jagah badalte hai
Khwaab dekhte rehna tum hame mitaane ka

Jis ki badshahiyat mein kainat aati hai
Kaam kar raha hai voh bakriyan churaane ka

Kamyaab hote hai aese log hi Majid
Jo dilon mein rakhte hai dard is zamaane ka 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: