Chachaa Ghalib ki do ghazlen

Ek naami shakhs ne ek bar farmaya tha ke Mughal Hindustan ko teen qimati cheez virasat mein de gaye the – Taj Mahal, Urdu zabaan aur Mirza Ghalib. Maine unke karam ka fehrisht teen cheeezon par hi nahi rokunga, lekin is baat se pura ittefaq rakhta hoon. Unki fehrisht se hi chalen to pahli par main aisa kuch nahi keh sakta jo naya hai aur nahi qaabil hoon, doosre par jitni meri qabiliyat hai hai main yahan karne ki koshish kar raha hoon aur teesre par…

Khair kisi aur ne bhi poocha tha mujhse ke main Mirza sahab par aur kyun nahi likha – aur mera jawaab tha ke woh waise hi bahut jaane-maane hai ur na mere likhne se unki maqbooliyat mein kuch izafa hota aur na hi na likhne unki haisiyat mein koi kami aati. Chachaa jaan hi aise nami shayar hai jinhe ek film aur TV serial ka kirdar banaya gaya hai, aur jo log shayari ya Urdu ke baare mein kuch nahi jaante honge, woh bhi unke naam se to vaqif honge. Woh un do shayaron mein hai jinke naam lafz ban gaye hai…. Ghalibiyat aur Iqbaliyat in donon hazrat ke kalam ke tafsire ka naam ban gaya hai. Maine bhi yahan unko do martaba shaya kiya hai… ek unke sab se mashoor asha’ar aapko pesh kiye hai aur doosri baar, unki ek ghazal ka baare mein likha hai….

Khair is post ka maqsad hai aap tak unki do ghazlen laana… Dono tarannum mein pesh ki gayi hai do mashoor gulukaron ki jaanib se apni ruhani awaaz mein – pehli Begum Akhtar ne aur doosri Suraiyya ne – aur donon ne use aise andaaz mein pesh kiya ke Chachaa agar jannat se sun rahe ho to unhe bhi pasand aati…

Pehli ghazal par main pehli tafsire ki koshish kar chuka hoon, lekin ise ek baar phir aapke nazar kar raha hoon bina kisi dakhl ke. Shayad aapko pasand aayegi…. Lekin qaabil-e-soch zaroor hai, khaas kar iska maqta. Aap khud hi dekhen….

Dil hi to hai na sang-o-khisht dard se bhar na aaye kyun
Royenge ham hazaar baar koi hamen sataye kyun

Dair nahi haram nahi dar nahi aastaan nahi
Baithe hai rahguzar pe ham ghair hame uthaye kyun

Jab vo jamaal-e-dilafaroz, soorat-e-mahr-e-nimroz
Aap hi ho nazarasoz, parde mein munh chupaye kyun

Dashna-e-gamza jaansitaan, naavak-e-naaz bepanaah
Tera hi aks-e-rukh sahi, saamne tere aaye kyun

Qaid-e-hayaat-o-band-e-gham asl mein dono ek hai
Maut se pahle aadmi gham se nijaat paaye kyun

Husn aur us pe husn-e-zan rah gayi bulahavas ki sharm
Apne pe etimaad hai ghair ko aazmaye kyun

Vaan vo ghuroor-e-iz-o-naaz yaan ye hijaab-e-paas vaza
Raah mein ham mile kahan, bazm mein vo bulaye kyun

Haan vo nahi khudaparast, jaao vo bevafaa sahi
Jisko ho deen-o-dil aziz, uski gali mein jaaye kyun

Ghalib-e-khasta ke bagair kaun se kaam band hai
Royiye zaar-zaar kya, kiijiye haaye-haaye kyun

Aur yeh bhi dekhiye…. Is ghazal ka badalta manzar ko aur khayalat se saaf zahir hota hai ke Chachaa ki itni haisiyat kyun hai…aur yeh unke pehle ahd ki hai jab yeh takhallus Asad isteemal karte the….

Aah ko chaahiye ik umr asar hone tak
Kaun jeeta hai teri zulf ke sar hone tak

Daam har mauj mein hai halqa-e-sad-kaam-e-nihang
Dekhen kya guzre hai qatre pe gauhar hone tak

Aashiqi sabr-talab aur tamanna betaab
Dil ka kya rang karun khoon-e-jigar hone tak

Ham ne maana ke taghaful na karoge lekin
Khaak ho jayenge ham tum ko khabar hone tak

Partau-e-Khur se hai shabnam ko fanaa ki taaleem
Main bhi hoon ek inaayat ki nazar hone tak

Yak nazar besh nahi fursat-e-hasti ghafil
Garmi-e-bazm hai ik raqs-e-sharar hone tak

Gham-e-hasti ka Asad kis se ho juz marg ilaaj
Shamaa har rang mein jalti hai sahar hone tak

Advertisements

One response to this post.

  1. Posted by Ankur on May 14, 2012 at 18:30

    Har ek baat pe kehte ho tum ke tuu kya hai…. tum he batao ke ye andaaze-guftgoo kya hai….

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: