Ret pe likhna….. Mohsin Naqvi se ek mulaqat

Kuch sha’airon ke kalam mein ik khas buniyadi tasavvur hota hai (Angrezi mein aap ise ‘motif’ kehte hai) . Misaal ke taur par Hakim sahab ke asha’ar mein – kuch namonne maine ab kuch din pehle hi yahan shaya kiye the – aapko but aur butkhaane ka kafi istemaal milega, Nasir Kazmi ki ghazlon mein andhere se dhake shahron ka…. aur isi tarah, Mohsin Naqvi sahab mein ret pe likhne ka… Unki char ghazal main yahan aapke nazr ki hai jisme aap ko yeh jumla, yeh khayalat un mein se teen mein milega.

Mohsin Naqvi sahab ek mashoor shair the, jinke kalam mein woh khususiyat thi ke use kafi naami gulakaaron ne tarannum mein pesh kiya hai…. maine jo di hain us mein bhi do Ghulam Ali sahab ne apni ruhani awaaz mein pesh kiya hai aur aap mein se kuch ne zaroor suni hogi. Khair afsos hai ke yeh behtareen shayar ab hamare beech nahi hai….. Kuch pandrah saal pehle, woh apne mulk ki firqa-parasti mein apni jaan kho baithe the….. Lekin unke kalam hamare zehn mein unko zinda rakhte hai….

Lijiye, Mohsin ki kuch ghazlen…

Ret par likh ke mera naam mitaya na karo
Aankhen sach bolti hai pyar chupaya na karo

Log har baat ka afsaana bana lete hai
Sab ko halaat ki rudaad sunaya na karo

Yeh zaroori nahi har shakhs masiha hi ho
Pyar ke zakhm amanat hai dikhaya na karo

Shahr-e-ehsaas mein pattharav bahut hai Mohsin
Dil ko sheeshe ke jharokhon mein sajaya na karo

Aur yeh shayad apne suna hogi….

Itni muddat baad mile ho
Kin socho mein gum rahte ho

Tez hawa ne mujh se puuchha
Ret pe kya likhte rahte ho

Kaun si baat hai tum mein aisi
Itne achche kyun lagte ho

Ham se na puucho hijr ke qisse
Apni kaho ab tum kaise ho

Aur yeh bhi

Jab se us ne shahr ko chorha har raasta sunsan hua
Apna kya hai saare shahr ka ik jaisa nuksaan hua

Mere haal pe hairat kaisi dard ke tanha mausam mein
Patthar bhi ro padhte hai insaan to phir insaan hua

Us ke zakhm chhupa kar rakhiye khud us shakhs ki nazron se
Us se kaisa shikwaa kije vo to abhi naadan hua

Yun bhi kam aamez tha Mohsin vo is shahr ke logon mein
Lekin mere saamae aakar aur hi kuch anjaam hua

Aur aakhir mein yeh… aapko ghazlen padhne ka nahi, sunne ka shauq ho  to laazim hai ke yeh aapke saame aayi hogi

Ye dil ye paagal dil mera kyun bujh gaya aawargi
Is dasht mein ik shahr tha vo kya hua aawargi

Kal shab mujhe be-shakl si aawaaz ne chaunka diya
Main ne kahaa tu kaun hai us ne kaha aawargi

Ik tu ki sadiyon se mere hamraah bhi hamraaz bhi
Ik main ki tere naam se na-aashna aawargi

Ye dard ki tanhaiyan ye dasht ka veeran safar
Ham log to ukta gaye apni suna aawaragi

Ik ajnabi jhonke ne jab puucha mere gam ka sabab
Sahra ki bheegi ret par main ne likha aawargi

Le ab to dasht-e-shab ki saari vusaten sone lagi
Ab jagana hoga hamen kab tak bata aawargi

Kal raat tanha chaand ko dekha tha main ne khwab mein
Mohsin mujhe raas aayegi shayad sada aawargi

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: