Mirza Rajjab Ali Beg Suroor se mulaqat

Mirza Rajjab Ali Beg Suroor Lakhnavi Urdu adab mein ek ahm haisiyat rakhta hain lekin afsos ziadah log in se aur inke kaam se vaaqif nahi hai. Jaise takhallus se aap pata lage sakte hai, yeh sarzameen-e-Lakhnau ke ta’aluq rakhte the aur maine aapko bata diya hai ke yeh adab se jude the.

Suroor ne ek dastaan Fasana-e-Ajaib likhi thi – yeh Urdu ke pehle kuch nasri kalamon mein se hai, aur Mir Amman Dehlvi ki Bagh-o-Bahaar ke baad aayi thi – kuch maanon mein uska jawaab thi. Ab yeh kya silsila kya tha aur kyun Suroor is ke khilaaf tha yeh sab baat par main kya, ek bahut badhi hasti ke jaanib se aapko bataunga – abhi nahi lekin jald. Abhi woh dastavez dastyaab nahi hai…..

Berhaal, Suroor ne jaise us waqt mein adab ka chalan tha, apni dastaan mein jagah jagah apne kirdaron ke sawaal jawaab sha’irana andaaz mein diye hain…. Aaiye in mein se kuch aap ke nazar kiye jaayen.

Ji main aapke ankahe sawaal ko samajh gaya hoon…. Fasana-e-Ajaib mein kya hota hai? Befikr rahiye…aane waale dinon mein, insh’allah, aapko qissa ke ek muktsar tariqe mein aapke saamne launga.

Ek aur baat is ke pehle ke main Suroor ke kuch kalam pesh karun. Jab main yeh inhe dhoondh raha tha, to mujhe ek ajab ehsaas hua ke jaise maine inhe kabhi na kabhi apni zindagi mein suna hai. Main ne in mein se ek – jo yahan tartib mein doosra hai – ka zikr apne Ustaad ko kiya aur unka kehna tha ke unhone use aksar apni izzat-maab valida ko kehte hua suna hai…. yehi sab zindagi hai.

Pehle waala to lagta hai ke jaise mere hi liye likha gaya ho…….

Na sudh-budh ki li aur na mangal ki li
Nikal shahr se raah jangal ki li

Kis ki shab vasal sote kate hai
Kis ki shab hijr rote kate hai
Hamari yeh shab kaisi shab hai illahi
Na sote kate hai na rote kate hai

Sarasar dil dukhta hai koi zikr aur hi cherho
Pata khana-badoshon se na poocho ashiyaane ka

Zahir main garche baitha logon ke darmiyan hoon
Par yeh khabar nahi hai main kaun hoon kahan hoon
Ae saknan-e-duniya! Aaram doge ek shab
Bichda hoon doston se gam-kardah karvaan hoon
Naam-o-nishan ne yaarab ab rusva kiya hai mujh ko
Ji chahta hai sach ho benaam-o-nishan hoon

Hasrat pe is musafir bekas ki roiye
Jo thak gaya ho baith ke manzil ke saamne

Main mar gayi sun ke is ke sar anjaam safar ke
Aaghaz hi dekha na kuch anjaam safar ka
Kehte hai voh ab jaata hai aisi hi dua kar
Masdood ho raasta dil nakaam safar ka
Mat jaan nikammi mujhe ae jaan liye chal
Karti chalun ki saath tere kaam safar ka
Main kasur hasti hi se ab kuch karungi
Aage na mere lijiyo tu naam safar ka
Chalne ki salah is ke theharti nahi ab saath
Mauqif nawazish hua aaram safar ka

Rustam raha zameen pe Sam rah gaya
Mardon ka aasman tale naam rah gaya

Thi nazar ya ke ji ki aafat thi
Voh nazar hi vadah-e-taqat thi
Hosh jata raha nigaah ke saath
Sabr rukhsat hua ek aah ke saath
Dil pe karne laga tapedan naaz
Rang chehre se kar gaya parvaz

Kabhi yun bhi hai gardish-e-rozgaar
Ke mashooq aashiq ke ho rozgaar

Torh kar khum aur patak kar aaj paiman ko hum
Suye masjid jaate hai zahid ke bahkaane ko hum
Shamaa ro! Mehfil mein kab den bar parvaane ko hum
Ek keede se bhi kya kuch kam hai jal jaane ko hum
Khwab sa karte hai ayyam-e-ishrat ko qiyas
Dhyan mein laate hai jis dam guzre afsaane ko hum
Par talak tha jis makaan par shamaa ravion ka hujum
Chaante hai ab wahan par khaak-e-parvaane ko hum
Ashk-e-gulgon ke nishaan choota kuch pata milta nahi
Jab khizan mein dhoondhte hai apne kashaane ko hum
Jurm kuch saiyyad ka apni aseeri mein nahi
Rote hai kunj-e-qafas mein aab aur daane ko hum
Rashke zulf yaar sab ujde hai mere ae Suroor
Aur ulajh uthte hai baithe jab ke suljhaane ko hum

Hamesha aag nikalti hai apne seene se
Ilaahi maut de guzra main aise jeene se

Khuda mile to mile aashna nahi milta
Koi kisi ka nahi dost sab kahani hai

Kehio se baad-e-saba bichde huye yaaron se
Raah milti hi nahi dasht ke awaaron ko


 
 
 
 
 
 
 
 

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: