Ustaad Zauq ki ek ghazal

Guzashta raat maine purani Hindustani film Mirza Ghalib ka ek behtareen manzar dekha…. Is mein Lal Qile mein ek mushaira dikhaya gaya hai jis mein us ahd ke naami shora, maslan Badshah Salamat Bahadur Shah Zafar, unke ustaad Zauq, Lala Balmukand, Hakim Momin Khan Momin, Ghalib chacha khud aur Mufti Sadaruddin Khan Azurda apne kalam pesh karte hai.

Is ko jald main aapke saamne launga, lekin abhi ke liye is mein se ek shair ko apni ek bahut hi mashoor ghazal ke pesh karte dekh ke, mujhe ehsas hua ke yeh aap sab, izzat mab khawatin-o-hazrat, ke saamne bhi laani chahiye jab ke unhone sirf matla aur ek sher hi pesh kiya tha…..

Sheikh Mohammad Ibrahim Zauq Dehlvi un kuch adabi shaksiaton mein hain jinki maqbooliyat unki kuch hi kalam se hui hai… Lekin yeh inke baas se bahar tha. Inke intekal ke chand saal bad bhi 1857 ki gardish toot padhi thi, aur usi mein inke diwan ka bahut bada hissa hamesha ke liye ham sab se mehroom ho gaya…. Berhaal, jo kuch bhi bacha hai us ko padh ke samajh aata hai ke apne waqt mein inhe Chacha se bhi behtareen shayar kyun mana jaate tha. Maine inki ek ghazal jiske ke matle ka pehle misra “Layi hayat aaye qaza… – jo meri bahut pasandida ghazal hai – pehle pesh ki thi, bahut pehle.

Abhi ke liye, Ustaad ki yeh ghazal, jiska pehla asha’ar aapne zaroor kabhi na kabhi suna hoga…. Lehje par tawajju chahunga, behr dekhiye kitne tabiyat se aata hai aur kitni asaani se tarannum pesh karne ko banti hai yeh….

Ab to ghabra ke ye kahte hai ke mar jaayenge
Mar ke bhi chain na paaya to kidhar jaayenge

Tum ne thahrai agar gair ke ghar jaane ki
To iraade yahan kuch aur thahr jaayenge

Ham nahi vo jo karen khoon ka daava tujh par
Balqi puchega Khuda bhi to mukar jaayenge

Aag dozakh ki bhi ho jaayegi paani paani
Jab ye aasi arq-e-sharm se tar jaayenge

Shola-e-aah ko bijli ki tarah chamkaaun
Par mujhe darr hai, ki vo dekh kar darr jaayenge

Laaye jo mast hai turbat pe gulaabi aankhen
Aur agar kuch nahi, do phool to dhar jaayenge

Nahi paayega nishaan koi hamara hargiz
Ham jahan se ravish-e-teer-e-nazar jaayenge

Pahunchenge rahguzar-e-yaar talak ham kyunkar
Pahale jab tak na do aalam se guzar jaayenge

Zauq jo madarse ke bigde huye hai mullah
Unko maikhaane mein le aao sanvar jaayenge

Shab ba-khair….

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: