Ek Badshah aur ek Mufti ke kalam II

Main aapko bata raha tha ke kaise maine ek apne zamane ki film mein ek sunehre ahd ke shohra ko ek saath dekhne ki khush-qismat ghadi guzaari. Maine us manzar mein jitna unke kalam pesh kiye the aapke nazar kiye, lekin mukammal ghazal mujhe kahi bhi apne zakhire mein na mili. Jitne bhi zariye mein qaboo mein the, maine kafi tafteesh ki na lekin Badshah Salamat ka na Mufti sahab ka kalam mujhe dastyab hua. Berhaal mujhe phir ek khayal aaya lekin main use waqt ki killat hone ki wajah anjaam na de saka.

Khair mujhe apna waada yaad tha aur maine iraada banaya…. ek subh ko main jaaldi uth kar, apni kitaabon ke dher mein us ek kitaab ki talash mein lag gaya jis se mujhe umeed thi ke mere maqsad pura ho jaayega. Dikkat yeh thi ke woh kam..kaafi kam sahon ki kitaab thi aur use dhoondna asaan nahi tha. Lekin main laga raha aur aa aakhir woh haath la gayi….. Jee haan, khwateen-o-hazraat, jab maine us dekhe to meri talaash safal ho gayi. Ek sarsari nigaah se hi mujhe pata chaala ke dono kalam jinki mujhe justju thi, woh us mein maujud the..

Yeh kitaab thi Mirza Farhatullah Beg sahab ki bahut umda Dehli ki Aakhri Shamaa, ek tasavvur ki behtareen parvaz, jis mein Mughal saltanat ki aakhri waqt ki ek roshan waqt ka zikr kiya hai… jab Dehli mein badshah aur uska darbar maujud tha aur Hindustanion ke paas apne baare mein faisle karna ki zara hi sahi lekin haq tha… Is waqt mein unhone ek mushaira rakha hai jis mein us waqt ke tamaam nami shayar aate hai aur apne kalaam padhte hai… maslan Ustaad Zauq, Chacha Ghalib, Hakim Momin, Hazrat Daagh, Mufti Azurda, Nawab Shefta, Sehbai aur …agar aap janna hi chahenge to Ramz, Ehsan, Qanayat, Arif, Jafri, Yekta, Josh, Tajalli, Kaamil, Qalq, Taskeen, Tabish, Aziz, Salik, Barq, Meer Sahab, aur vagairah… Badshah, Bahadur Shah Zafar is mauqe par khud maujud nahi hai lekin unhone ek shahzaade ke jaanib apni ghazal mehfil ke nazar ki hai, jis se silsila aghaz hota hai. Kuch asha’ar main ne pehle aap ke saath baante hai, lekin mukammal ghazal yeh hai….

Nahi ishq mein is ka to ranj hamen ke qaraar-o-shakeb zara na raha
Gham-e-ishq to apna raqeeb raha, koi aur bala se raha na raha

Na thi haal ki jab hame apni khabar rahe dekhte rahe auron ke aib-o-hunar
Padhi apni buraiyon par jo nazar to nighaah mein koi bura na raha

Hamen saghir-e-badah ke dene mein ab kare saaqi to hai ghazab
Ke yeh ahd-e-nishat yeh daur-e-tarab na rahega jahan mein sada na raha

Lage yun to hazaaron hi teer-e-sitam ke tadapte rahe padhe khaak pe ham
Vale naz-o-karishma ke tegh do dam lagi aesi ke tasma laga na raha

Zafar aadmi us ko na jaaniyega ho woh kaisa hi sahib-o-fahmo-zaka
Jise aish mein yaad-e-Khuda na rahi, jise taish mein khauf-e-Khuda na raha

Aur Mufti sahab ki bhi ghazal jiska matla aur ek asha’ar hi pesh kar paya tha main….

Naalon se mere kab ta ho bala jahan nahi
Kab asmaan zameen zameen asmaan nahi

Afsurda dil na ho, dar-e-rahmat nahi hai band
Kis din khula ho dar-e-peer-e-mughan nahi

Shab usko haal dil ne jataya kuch is tarah
Hain lab to kya, nigaah bhi huyi tarjuman nahi

Ae dil! Tamaam nafaa hai sauda-e-ishq mein
Ek jaan ka ziyan hai, sau aesa ziyan nahi

Kathti kisi tarah bhi nahi yeh shab-e-firaaq
Shayad ke gardish aaj taujhe aasman nahi

Kehta hoon us se kuch main, nikalta hai munh se kuch
Kehne ko yun to hai gi zabaan aur zabaan nahi

Azurda! Hont tak na hile us ke rubaru
Mana ke aap sa koi jaadu bayan nahi

Tamam shud!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: