Fasana-e-Ajaib: Qist #1

Izzat-maab khwatin-o-hazraat, jaise maine aapko, qaum aur mulk ko vaadaa kiye tha, mein aapke saamne Lakhnau ke woh azeem shaksiyat, Mirza Rajjab Ali Beg Suroor ki daastan “Qissa-e-Jaan-e-Alam aur Anjuman Ara” jise ziadah “Fasaana-e-Ajaib” ke naam se janaa jaata hai, aapke saamne la raha hoon. baraye-, Kyunkar aap sab ko waqt ki killat pesh ho sakti hai, is liye yeh dastaan ka ek muktsar intekhab aap ke nazar hai…. woh jo sahab-e-zauq hai jinhe itne se lutf na aaye…mehrbaan thoda intezar farmayen baraye-karam, aap ka bhi khayal zaroor rakha jayega.

Berhaal, bina aapka aur mazeed waqt liye, main qisse ka aghaz karta ho……

~~ Kehte hai mulk Khitan mein ek shahr tha. Fasahat-bad aesa pur raunaq aur aesa khoobsurat ke jannat uski gali kooche ko dekh kar sharmaye, jo dekhe yahin rehne ki tamanna kare. Yahan ke bazaaron ki chahal-pahal dekhne ki qaabil, sadken hamvar aur shafaf, makanat mazboot aur shandaar. Is shahr mein basne waale har tarah khush aur khush-haal. Is mulk ka badshah bhi badhi shaan-o-shukat waala tha. Is ke khidmat-gar bhi aise the ke Sikandar aur Dara jaise badshah bhi kya honge. Is badshah ka naam Firoz Bakht tha.

Is mein shak nahi ke Firoz Bakht qismat ka Sikandar tha. Allah ne sab kuch diya tha magar uski koi aulad na thi aur har waqt ro ro ke Allah se dua karta tha ke use ek beta baksh de. Aakhir iski dua qabool huyi aur iske yahan beta paida hua. Baap ne Jaan-e-Alam naam rakha. Jaan-e-Alam ko woh surat shakal di thi ke chaudhvin ka chaand iski barabari na kar sake. Yeh bachcha kya paida hua ke mahal mein eid ho gayi. Badshah ne is khushi mein apni riyaya ko bhi shareek kiya. Hazaaron qaidiyon ko riha kiya. Angeenat londi ghulam azaad kiye. Shahi khazaana aise khula ke mulk mein koi mohtaj na raha. Ek saal ka kharaj ghareeb riyaya ko maaf kiya. Jagah jagah masjiden, madarse, seraiyan, musafir khaane tameer kiye. Gharz yeh ke saare shahr mein khub dhoom dhoom huyi aur saari riyaya shad kam huyi.

Nujumi, pandit badshah ke darbar mein haazir huye aur hisaab laga ke bole “Maharaj ka bol baala rahe. Hamari pothi bataati hai ke shahzada badi qismat waala hai. Bhagwan chaahe to jald raj par biraaje, chaaron khont naam baje, aisa byah ho ke sansaar mein dhoom mache. Magar pandrahva baras bhari hai. Ek pakhira shahzaade ke haath aayega. Tarya ki khatpat se woh bachan sunayega ke shahzaada rajpaath chorh kar des bides bhatkega, koi us ke paas na phatkega. Shahzaada angeennat kasht uthayega. Par ek din chutkara paayega. Ek sundar rani haath aayegi jo charno par ji vaaregi. Is rani ka baap bigde kaam banayega aur aise gur sikhayega jis se beri maare jaayen aur munh ki khayen. Aisa samay bhi aayega ke nar naari ladenge aur prithvi par hulchul padhegi. Apne chath jaayenge. Nagar nagar khoj kar aayenge. Par sab bichde mil jaayenge. Shahzaada raj karega. Daya dharam ke kaaj karega. Bhagwan ki daya se jaan ki khair hai par door paar ki dhari ki sair hai.”

Badshah ne nujumion ke baaten suni to bada ghamgheen hua. Phir bola “Allah jo karta hai achcha hi karta hai.” Aakhir sab ko inaamse maalamal kar ke rukhsat kiya. Ab shazaade ki parvarish ki taraf tawajju ki aur aisa intezaam kiya ke kisi baat ki kami na rah jaaye. Usne bhi woh haath paaon nikaale ke jo dekhe hairaan ho. Das baras ka tha magar pura jawaan dikhayi deta tha. Taqaat aisi ke hiran ke seengh cheer daale, masth haathi ke tukde kar de, jo jo hunar shahzaade seekhte hai woh alag haasil kiye, surat shakal pehle hi se bemisaal thi. Ab tandarusti mein bhi lajawaab hai. Har fan mein kaamil haasil hua. Chaudhvan baras pura hoone laga to darbaarion ne salah di ke ab shahzaada Allah ke karam se jawaan hua, shaadi ka bandobast hona chahiye. Talaash shuru huyi. Aakhir ek khubsurat aur nek tabiyat shahzaadi Mah’tilat se Jaan-e-Alam ki shaadi bade dhoom-dhaam se ho gayi…..

Pehla qist yahan khatam…..agla  “Shahzaade ka tota khareedna aur Anjuman Ara ke husn ka zikr sunna” jald aayega

Advertisements

4 responses to this post.

  1. Posted by Asad on October 10, 2012 at 19:47

    please share the original scanned copies or tell me where is it available in the market?

    Reply

    • Dear Asad,

      Fasana-e-Ajaib is easily available in the market. The complete work can be obtained from Anjuman Taraqqi Hind while the easier version which I have used is published by the National Council for Promotion of Urdu Language, New Delhi. Where are you based?

      Reply

  2. Posted by Hassan ali on October 7, 2013 at 15:13

    Asslamualikum warahmatullahi wabarakatuhu wamagfiratuhu
    Shukriya bhai me bahut din se is ki talash me tha. But nahin mil pa raha tha aap ka bahut shukriya ki aapne meri muskil asaan kar di

    Reply

  3. Posted by Maliha on November 23, 2013 at 08:51

    Very interesting

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: