Fasana-e-Ajaib: Qist #3 Shahzaade ka tota khareedna aur Anjuman Ara ke husn ka zikr sunna

Guzashta roz maine aapko Mirza Rajjab Ali Beg Suroor ki dastaan “Qissa Jan-e-Alam aur Anjuman Ara”, ya “Fasana-e-Ajaib” ka ek aur qist diya tha, lekin ek morh par hi rok diya tha. Iski do waja hai, pehli ke qist kuch taveel hoti hua nazar aa raha thi, aur doosra main aapki dilchaspi barkarar rakhne ka khwaishmand tha….. Khair chaliye, qissa aage badhaya jaaye 

~~~~Mah’tilat ne tote ki baaten suni to aur ghussa aaya. Shahzaade se kaha “Agar meri baat ka tota saaf jawaab nahi dega to is nighode ki gardan murorh apne talvon se is ki aankhi maloongi jab daana-paani khaaon peeongi”.

Jaan-e-Alam ke kaha “Kuch haal to kao..”

Tote ne arz kiya “Huzoor! Saari kahani is ghulam se suniye. Aaj shahzaadi sahiba naha-dho ke aur khub banao singaar kar ke baithi aur ‘Dekh aaine ko kehti thi ke Allah re main’. Phir is gareeb se sawaal hua ke ‘Bol toone hamari si surat dekhi hai Mujh bechaare ke munh se nikal gaya ‘Khuda na kare’, ab is khata ki saza paata hoon”.

Jaan-e-Alam ne kaha “Tum bhi kamal karti ho. Tum to sach much pari ho magar aql se khali ho ke jaanwar ki baat ka itna khayal karti ho. Bolta hai to kya hua. Aakhir hai to jaanwar. Yeh nadaan kya jaane.”

 Miyan Mutthu ko yeh baatein bahut nagavar huyi. Sar se pair tak rone ke surat banayi aur then se bola ” Jhooth jhooth hai, sach sach hai jis ke barabar koi nahi. Voh zaat to sirf Khuda ki hai. Varna duniya mein ek se ek badh kar maujud hai.”

Ab to Jaan-e-Alam se raha na gaya. Majboor ho kar kaha “Jo ho so ho. Mutthu pyaare ab to sach keh do”. Tote ne arz kiya “Sach kabhi kabhi bahut mehnga padhta hai. Jo sach museebat mein daale is se jhooth behtar. Sach na bulvaayen aur mera munh na khulaye varna dard ki thokren khaani hogi aur mulkon mulkon ki khaak chanhni hogi.”

Yeh sun ke Jaan-e-Alam aur betaab hua. Bola ” Bas ab ziadah baaten na banao. Sara qissa saaf saaf sunao.”

Tote ne kaha “Suniye banda parvar! Main nahi chahta tha ke aap pareshan ho aur safar ki takleefen bardasht karen kyunke door-daraz ke safar mein jaan aur maal donon jaane ka darr hota hai. Magar aap na maane. Khair to suniye. Yahan se shumaal ki taraf aapko taqreeban ek saal tak barabar safar karna padhega tab kahi ek aisa mulk milega, Zar nigar, aisa khubsurat ke kis ne khwaab-o-khayal mein bhi na dekha hoga. Is ke makaan aur gali kuche aese ke dekho to aql dang rah jaaye. Is mulk ke rehne waale aese khubsurat ke ke chaudhvin ka chanda nahi dekh ke aesa sharmaya hai ke gham se ghtna shuru ho jaata hai. Wahan ki shahzaadi hai Anjuman Ara. Meri kahan majaal ke us ke husn ke tareef kar sakun. Haan itna jaanta hoon ke saat sau kaneezein sone ki pathkon se kamar kase aur jadhao taaj se saron par dhare din raat unki khidmat mein rahti hai. In kaneezon ko ki laundion mein se kisi ko shazaadi sahiba dekh le to yaqeen hai ke sharm se chullu bhar paani mein doob mare.”

Tota ka bayan sun ke Mah’tilat sunn ho gaayi, sar jhuka liya. Jaan-e-Alam yeh sun ke pinjra diwan khaane mein le aaya aur mufassal haalat puchne laga. Tote ne samajh liya ke Jaan-e-Alam Anjuman Ara ke husn ki bayan sun ke dekhe baghair us par fida ho gaya hai. Tote ne bahut chaha ke shahzaade ka dil idhar se hat jaaye aur voh is museebat mein mubtala na ho magar qismat mein jangal jangal ki khaak channi likhi thi. Kisi tarah baaz na aaya.

Aakhir tote ne Jaan-e-Alam se kaha ke “Aap kisi tarah nahi maante to main aapko is shart par le chalunga ke aap mera kaha maanen, na maanenge to dhokha khayenge aur pachtayenge. Phir mujh ko bhi jeeta na paayenge.” Shahzaade ne bhi tarah trah ke vaadeh kiye ke “Tu mera hamdard hai, tera har kaha maanonga aur teri salah ke khilaaf kuch na karunga.”

Teh paaya ke raat guzaar li jaaye air subah ko ravaangi ho. Magar Jaan-e-Alam ki aankhon mein neend kahan. Karvaten badal badal kar raat kati. Din nikla to shahzaada ne apne bachpan ke dost aur saathi wazirzaade ko yaad kiya. Mulazimon ko hukm diya ke do tez raftaar, hawa se baatein karne waale ghode safar ke liye taiyyar ho.

Ghode taiyyar ho gaye to shahzaada aur wazirzaada donon zaroori saman le ke anjaani manzil ke liye chal nikle.

Na sudh-budh ki li aur na mangal ki li
Nikal shahr se raah jangal ki li

Jaari rahega…..

Advertisements

One response to this post.

  1. […] – 6925371 Halqa Arbab-e -Zauq, Islamabad, Pakistan Welcome To Mirza-Ghalib – Urdu Prose https://vahshatedil.wordpress.com/201…ka-zikr-sunna/ GolGumbad.com __________________ Quitters never win and Winners never quit..!!! […]

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: