Fasana-e-Ajaib: Qist#6: Jaan-e-Alam ka safar par ravana hona

Chaliye dekhte hai ke shahzade Jaan-e-Alam par unke safar mein kya beeti. Aakhri qist mein woh ek badi dikkat mein aa gaye the, dekhen aage kya hota hai…..

~~~~ Vahan shahzaade ki badi khatir tavazo huyi. Us ne bhi yehi behtar samjha ke inkar na kare. Yeh mehfil khatam huyi to voh Jaan-e-Alam ko baradari mein le gayi. Mushari par baithaya aur boli “Tune suna hoga ke Shahpal jadugaron ka badshah hai. Main usi ke beti hoon. Yeh baagh balke is ke chaaron taraf ka ilaaqa jadu ka bana hua hai. Main ek muddat se tujh par farefta thi. Mere devtaaon ne aaj meri sun li aur tujhe yahan pahuncha diya. Anjuman Ara ki mulaqaat ki siva tu jo kuch hukum dega baja laaongi.”

Shahzaada bola “Jo kuch tune kaha sach hai. Teri guftagu se pata chala ke tu bhi mohabbat ka zakhm kha chuki hai. Zara dil mein soch main jis par farefta hoon tu usi ki jaani dushman hai. Dushmanon ki teen qismatein batayi jaati hai. Pehla to voh jo apna dushman ho, doosra voh jo dushman ka dost ho aur teesra voh jo dost ka dushman ho. Yeh teesra dushman sab se bada hota hai. Anjuman Ara ki judaai mein apna to yeh haal hai ke takht o taj chuta. Ghar-baar chuta, dost aur azeez chuthe, aish-o-aaram ki jagah dar-dar ki thokren khayi. Jis ke liye yeh haal hua tu usi ki dushman hai. Ab tu yeh bata ke main teri dosti par kaise bharosa karun?”

Yeh sun kar voh aag bhagola ho gayi. Ghusse se thar-thar kanpne lagi. Boli “Main jadugaron ke badshah ki beti hoon. Mulk Zar-nigar mere liye ek qadam ke faasle par hai. Abhi jaati hoon aur palak jhapakte Anjuman Ara ko yahan laati hoon. Tere saamne use jala kar apna kaleja thanda karoongi.”

Jaan-e-Alam yeh sun ke badhosh ho gaya. Dil mein socha aurat ka ghussa bada hota hai. Kya ajab jo kuch kehti hai abhi kar dikhaye. Anjuman Ara na rahi to phir rah kya jaayega. Maslihat usi mein hai ke kisi tarah use raazi rakho. Khuda bigde kaamon ko banaata hai. Mumkin hai aage koi surat nikal aaye. Yeh soch ke us se jhoot-sach baatein kahi aur jhoothe dil se mohabbat jatayi. Voh to mutmain hoke aaram se so gayi magar shahzaade ki aankhon mein neend kahan. Saari raat yeh sher zabaan par rahe.

Kis ki shab vasal sote kate hai
Kis ki shab hijr rote kate hai
Hamari yeh shab kaisi shab hai illahi
Na sote kate hai na rote kate hai

Gharz kisi tarah subah huyi. Naashte ke baad woh jadugarni Jaan-e-Alam se boli “Mera tareeqa yeh hai ke is waqt se pahr din rahe tak Shahpal ke darbar mein haazir rehti hoon. Teri ijazat paaon to jaaon.” Jaan-e-Alam yeh sun ke dil dil mein bahut khush hua ke khas kam jahan pak. Zara der teri manhoos surat dekhne se bachonga. Magar use bewaquf banaane ke liye bola ke “Teri judaai pal bhar ko bhi nahi gavara nahi. Khair majboori hai to ja magar jitni jaldi ban pade to laut aaeyo.”

Jaan-e-Alam ki zabaan se yeh baaten sun kar jadugarni khush ho gayi. Uske jaane ke baad Jaan-e-Alam apni qismat ko rota raha aur apne kiya par kurhta raha ke maine kyun nadani se kaam liya aur kyun hauz mein kuda. Yeh na jaana ke sab jadu hai. Cheh ghadi din rahe voh makar aurat laut aayi, ise dekh kar shahzaade ko rona aaya magar dikhane ko hans diya.

Do mahine isi tarah beet gayi. Is qaid mein Jaan-e-Alam ka yeh haal hua ke sookh ke kaanta ho gaya. Ek din voh jadugarni rukhsat hote waqt Jaan se boli “Teri tanhai ka mujhe bada khayal rahta hai balke bada malaal rahta hao. Tu akela tamaam din ghabrata hoga. Bag kate khata hoga. Kya karun. Lachar hoon. Aise koi nahi jise tera ji behlaane ke liye chorh jaaon. Yeh khwasin hai magar inhe uthne baithne bolne chalne ki tameez nahi. In ki maujudgi se tu aur ghabraye ga.”

Shahzaade ne kaha “Ham kya ghabrayenge. Tanha paida huye, tamaam umr akele rahe. Hamari qismat mein doosra likha nahi. Lekin har dam yeh andeshaa laga rahta hai ke hame tanha paa ke koi maar daale to kya ho. Aese maare gaye to rone waala bhi nahi hoga. Jab tak tujhe khabar ho hamara to kaam tamam ho chuke ga.”

Voh boli “Yeh kya baat teri khayal mein aayi. Jaanta nahi yeh tilism ka makaan hai, yahan kab kisi ke guzar ka imkan hai.”

Shahzaada bola “ ……

Aur yahan yeh qist ko khatam kiya jaaye….

Jaari rahega….

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: