Fasana-e-Ajaib: Qist#7: Jaan-e-Alam ka safar par ravana hona

Aur aage jaane ke ke liye ke Jaan-e-Alam par jadugarni ke qaid mein kya beeti aur, aage padhte rahiye, baraye-karam. Yeh qissa aapko Mirza Rajjab Ali Beg Suroor ki dastaan “Fasana-e-Ajaib” ke ek mukhtsar intekhab mein se aap sab izzat-mab khwatin-o-hazraat ke lutf pahunchane ke liye meri koshish hai…

~~~~ Shahzaada bola “Wah! Agar koi jadugar hi maar daalne pa r kamar kas le to bhala use kaun rokega?”

Yeh sun kar to use [jadugarni] bure-bure khayal aaye. Ji jaan se Jaan-e-Alam par farefta thi. Khatka hua kahin aesa na ho ke mere peeche koi jadugarni idhar se guzre aur shahzaade pe ishq ho jaaye aur use uda le jaaye, phir apni qaid mein rakhe aur zindagi bhar na chorhe. Voh deewani mohabbat mein andhi ho gayi. Yeh bhi na socha ke kya anjaam hoga, jhat sanduq khol voh taaviz nikala jise naqsh-Suleimani kehte hai aur shahzaade ke bazu par baandh kar boli “Le ab na jadu ka asar ho, na dev ka guzar ho aur na pari se zarrar ho. Dil ka khatka mita. Maze uda.”

Yeh keh ke voh sahirah roz ki tarah Shahpal ke darbar ravana huyi aur Jaan-e-Alam Anjuman Ara ke khayalon mein kho gaya. Roz ka yehi tareeqa tha. Idhar Jaan-e-Alam ke dil mein naya khayal aaya ke voh is naqsh-Suleiman ki bahut tareefen karti thi. Khol ke dekho, mumkin hai is mein koi tadbeer likhi ho.

Gharz Jaan-e-Alam ne voh naqsh khol ke dekha. Bahut se khaane bane huye the, us mein Ismaye-Ilahi likhe huye the aur unki tasser ka bhi zikr tha, ek khaane par nazar padhi. Likha tha “Koi shakhs kisi jadugar ki qaid mein phansa ho to yeh ism pade nijaat payega ya tilism mein makan mein ghira hua ho, ise padhta jidhar chahe chala jaaye aur jo koi jadu karta ho, is par dam kar ke phoonk de, isi dam is ki barkat jadugar ko phoonk de.”

Naqsh mein rihayi ki tadbir nazar aayi to shahzaade ki khushi ka thikana na raha. Jaldi jaldi voh ism yaad kiya aur naqsh ko teh kar ke phir bazu par baandh diya. Itni der mein voh jadugarni bhi aa maujud huyi. Jaan-e-Alam ke tevar badle dekhe, puchha “Aaj kaise mizaaj hai?”

Shahzaade ne jawaab diya “Khuda ka shukr bahut achha hai main bahut der se tera intezaar kar raha tha. Le tuje Shaitan ke hawaale kiya, hamara Allah nigehbaan hai.”

Jadugarni ne yeh alfaaz sune to haathon ke tote udh gaye. Samajh gayi ke aaj khel bigarh gaya. Aur Jaan-e-Alam haath se nikla. Jadu ke zor se rokne ki koshish ki. Asar na hua. Jhunjhla ke nariyal zameen pe mara. Voh phata to hazaaron azhd he munh phaade aur aag ugalte us mein se nikle. Shahzaade ne kuch padha, voh sab paani ho ke bah gaye. Ab to voh khushamad par uttar aayi. Paaon par sar dharne lagi. Is ki madad ko jo aur jadugarniyan pahunchi thi voh bhi shazaade ko samjhane lagi ke jo ji jaan se fida ho us ka saath chorhna aur us se dagha karna munasib nahi.

Shahzaade ne kaha “Zara girebaan mein munh daalo, ham bhi to kisi ki mohabbat mein aish-o-aaram chorh kar museebat jhelne ko nikle the. Tumne hame zabardasti qaid kiya aur us tak na jaane diya jis ke liye ji bechain hai. Yeh ehsan kuch kam hai ke hamne tumhara tilism darham-barham na kiya?”

Voh samajh gaye daam se chootha yeh panchi ab rukne waala nahi. Voh sar peet ti rah gayi aur yeh Ism-e-Ilahi ki barkat se riha hua. Sach hai Allah ke naam mein badi taaqat hai.

Shahzada ne qaid se chooth ke apni raah li. Chalte chalte us hauz pe pahuncha jis mein dubki laga ke is aafat mein phansa tha. Vahanapne ghode ki laash padi dekhi. Voh bechara aesa wafadaar tha ke pathar se sar maar ke mar gaya tha. Ek to wafadar saathi ke bichadne ka gham doosra yeh khayal ke ab paidal chalne ki musibat padhi. Jaan-e-Alam jo jitna bhi dukh hota kam tha. Magar himmat na hari aur paidal hi apni manzil ki taraf chal diya.

Aur yeh qist yahan khatam. Agla “Malika Mehr-Nigar se Jaan-e-Alam ki mulaqaat” jald aapke saamne…..

Jaari rahega….

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: