Fasana-e-Ajaib: Qist#10: Malika Mehr-Nigar se Jaan-e-Alam ki mulaqaat

Aur shahzaada Jaan-e-Alam ki malika Mehr-Nigaar se guftagu chal rahi hai… aur woh uski mezbaani ki davat ko nahi maan raha hai. Chaliye dekha jaaye aage kya hota hai.

~~~~ Jaan-e-Alam ne socha kisi ka dil torhna achhi baat nahi. Phir yeh ke ghar se nikle muddaten ho gayi. Aadmi ki sohbat muyassar na aayi. Yeh bhi to shahzaadi hai. Zara der is se hans bol ke apna gham ghalat karun. Utha aur malika ke saath ho liya. Saare saare raaste dilchasp guftagu karta raha. Malika pehle farefta ho chuki thi, shahzaade ki guftagu ne aur bhi dil moh liya magar dil hi dil mein afsos karti thi ke aese mein ji atka hai jo kisi aur par fida hai. Dari thi ke jo kuch ho is ka anjaam achha hona nazar nahi aata.

Donon haath mein haath daale hanste bolte huye baagh ke darwaaze par aa pahunche. Darwaaza khola. Donon andar aaye. Baagh aisa ke jis ki tareef nahi ho sakti. Qalam hairan hai. Jis mulk ka jangal chaman se behtar ho, vahan ke baagh ka kya kehna. Door tak phaila huya ahata. Chaaron kone par char bangle. Har taraf naram-narm sabz ka qaleen bichha, beech mein tarah tarah ki phoolon ki kyarian, jagah jagah mehndi ki bahar, gul abasi se Khuda ki shaan nazar aati thi. Nargis ke phhol aese dikahyi de rahe the jaise kisi ke intezaar mein ho. Mevahdar darakht alag bahar dikhaate the. Phalon ke bojh se taniye zameen choom rahi thi. Roshe hamvar aur khush-numa. Unke dono taf saaf-shafaaf paani ki nehren bah rahi thi. Bela, chameli, motia, mogra, badan-baan, juhi, ketaki, kewda, nasreen, aur  nustaran apni khushbu aur rang roop se sair karne waalon ko mast karte the. Faakhtayen aur qamryan shaakhon par jhoolti aur chahchati thi, mor naach naach ke davat nazarah dete the. Qazeen nahron mein thehrti phirti thi. Ghulam aur qanize baagh ki safaai mein mashghul the.

Baagh ke beech mein ek khubsurat baradari thi.  Yahan har kamra saja hua tha. Ghulam gardish ke aage sang-mar-mar ka chabutra, chabutre ke upar shamiana laga huya tha. Uski jhaalar safed baadle ki thi, doriyan kalabatu ki thi. Is ke barabar mein saaf paani ka hauz tha. Aasman saaf tha. Chaudvin ka chaand har taraf roshni bikhrata tha. Barsaat ki chaandni yun bhi qayamat hoti hai. Chaaron taraf phuvare jaari the. Phuvare ke paani mein badla kata padha tha jo paani ke saath hawa mein buland hota aur ajab chamak-damak deta tha.

Malika ne shahzaade ko le ja kar masnad par bithaya. Haseen ladke, ladkiyan khushk mevon, taazah phalon, tarah tarah ki mithaiyan, aur lazeez khvanon ki senian aur khvan le le ke daudhe. Shahzaade ki khub tavazo huyi. Phir gaane bajane waalon ki mehfil jami. Ek se ek achha gaane-bajaane waala vahan maujud tha. Sama baandh gaya. Haseenon ne aese aese naach dikhaye aur ghunghroo bajaye ke Subhan-Allah. Shahzaade ko khush paya to malika ne sawaal ki “Ae azeez! Tumhen Khuda ki qasam. Sach kaho, kaun ho? Kahan se aaye ho aur kis ki talaash mein maare maare phirte ho?”

Jaan-e-Alam ne majboor ho ke sab kuch saaf-saaf bata diya. Kaha “Malika! Main badshah Firoz Bakht ka ladka hoon. Jaan-e-Alam mera naam hai. Mulk Khitan ka rehne waala hoon. Fasahatabad hamari saltanat ka sadr maqam hai. Maine ek tota mol liya tha. Jo aisi aisi baaten sunata ke sunne waale ki aql dang ho. Is ki zaban se maine Anjuman Ara ke husn ka qissa suna. Dil beqaraar ho gaya. Ghar bar chorha aur uski talaash mein nikal khada hua. Phir wazirzaade aur tote se bichde, tilism mein giraftar huye.” Jadugarni se  Naqsh-Suleimani se paane aur riha hone ka qissa sunaya aur bataya ke main ab jald se jald mulk Zar-Nigar pahunchna chahta hoon.

Malika ne jo yeh qissa suna to bahut udaas huyi. Woh khud shahzaade ko chahne lagi thi magar thoda hut andaza us ka bhi tha ke yeh kisi aur ma’il hai. Ab saari baat khud uski zabaan se se sun li to bilkul maayus ho gayi aur aahen bharne lagi.

Shahzaade ne pucha “Kya baat khair to?” Jawaab mein malika ne apne dil ki baat keh sunayi ke tum kisi aur par fida ho aur ham tum par shaida hai. Ajab baat hai ke jo hamare dil ka ilaaj kar sakta hai voh khud beemar aur kisi aur ka mohtaj hai.

Shahzaade ne dilasa diya ke “Gham na karo ham kisi tarah baahir nahi, jo tumhara hukum hoga baja layenge magar jis kaam ko pehle nikla hoon, use pehle pura karunga.” Jaan-e-Alam ne bahut tasallian di to malika ke dil se gham door hua.

Aur yeh qist yahan khatam.

Jaari rahega….

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: