Fasana-e-Ajaib: Qist#9: Malika Mehr-Nigar se Jaan-e-Alam ki mulaqaat

Aur shahzaade Jaan-e-Alam ki dastaan ka yeh agla qist ab aapke saamne hai. Us maqam par the jahan Malika Mehr-Nigar ke khidmatgar shahzade se sawaal kar rahe hote hai. Ab aage…

~~~~ Shahzaade ne muskura ke kaha “Musibat tujh par padhi hogi. Teri baaton se pata chalta hai ke yahan musibat ke maare aate hai. Tum sab batao ke tum par kya kambakhti aayi ke churailon ki tarah sham ko jangal mein mandlati phirti ho.”

Malika yeh jawaab sun ke pharhak gayi. Khud boli “Wah Sahaab Wah! Tum to bade garm-mizaaj ho. Haal poochne pe itna khafa huye ke aesi sakht baat kahi aur sab ko churailen thehraya.”

Jaan-e-Alam ne jawaab diya “Hamara yeh tareeq nahi ke ajnabi logon se yun be-takalluf baatein karen.”

Malika phir boli “Huzoor! Main to aap se sirf yeh poochti hoon ke aap ka naam kya hai aur kis taraf se yahan aana hua?”

Shahzaada bola “Huzoor to aap hai ke jeete ji char kaandhe par chahi hai. Ham gareebon ka kya hai?”

Khwason ne adab se arz kiya ke sarkar is ajnabi mard se munh na lage. Bada munh-phat aadmi maalom hota hai.

Malika ne kaha ‘Tum sab chup raho. Khvamkha beech mein dakhl na do. Bigda to pata nahi kya tumhari durgat banaye.” Yeh sun kar voh sab alag hat gayi aur ek doosre se kehne lagi “Khuda khair kare. Ajab be-dhab aadmi se paala padha hai.”

Malika phir shahzaade se mukhatib huyi “Ae sahab! Kuch munh se bolo, sar se khelo.”

Jaan-e-Alam ne jawaab diya “Zara der ko apni badshaahi bhulo aur hawa ke ghode se uttar ke ham faqeeron ke paas baitho, tabiyat haazir hogi aur ham bhi kuch bolenge.”

Malika boli “Tum bhi khoob cheez ho. Haal faqeeron ka, dimagh ameeron ka, baaten kadhvi kasili, khair, tumhari khushi isi mein hai to ham haudar se uttarte hai.” Yeh keh ke uttri aur Jaan-e-Alam ke barabar baith gayi.

Khwason ne jo yeh dekha to daanton mein ungli daba li. Sab ko hairat ke yeh kya ho gaya har ek boli “Bibi! Yeh insaan hai ya jadugar. Kaisi badzabani ki phir bhi pari malika ko sheeshe mein utaar liya. Baithe bithaye maidan maar liya.” Doosri boli “Tujhe apne deedon ki qasam, sach boliyo, aesa jawaan rangeela, sajdar, taraar, aafat ka parkaala, duniya se niraala, tune ya teri malika ne kabhi dekha tha. Arre deewani, khubsurati ajab cheez hai. Husn saare jahan ko azeez hai.” Gharz sab apni apni kehti thi.

Jab malika haudar se uttar kar shahzaade ke paas baithi to zara der to voh chup raha phir thandi saans bahr ke yeh sher padha –

Sarasar dil dukhta hai koi zikr aur hi cherho
Pata khana-badosh se na puch aashiyana ka

Sher padh ke bola “Sahab! Hamara haal jaan ke kya karogi. Mukhtsar yeh hai ke beyaaro madadgar hai. Museebaton mein giraftar hoon. Ghar se door hai aur aaram-o-ayaashi se mehroom. Pairon mein chalne ki taqaat nahi magar manzil ki talaash mein pareshan hai.”

Zaahir hai gar cha baitha logon ke darmiyan hoon
Par yeh khabar nahi main kaun hoon kahan hoon
Ae saknan-e-duniya! Aaraam do ge ek shab
Bichda hoon doston se, ghamkardah karvaan hoon
Naam-o-nishaan ne yaarab ruswa kiya hai mujh ko
Ji chahta hai sach ho benaam-o-nishaan hoon

Yeh asha’ar padh ke voh to chup ho gaya, magar malika samajh gayi ke ho na ho kisi mulk ka shahzaada hai magar kisi ke ishq mein deewana ho gaya hai. Yehi wajeh hai ke jo baat hai is ka dil par asar hota hai. Socha kisi tadbeer se ise ghar le chalun, ek din sara haal maloom ho jaayega. Kahan tak chipayega. Badi khushamad se boli “Ae azeez! Yeh ilaaqa hamari saltanat mein shaamil hai. Tum zamane ki gardish se musafir ban ke yahan aa nikle ho. Tumhari mehmani ham par farz hai. Yahan tak aa gaye ho to do chaar qadam aur sahi. Gareeb-khaana qareeb hai. Aaj ki raat wahan aaram karo. Subah tum ko ikhtiyar hai. Chahe raho chahe safar par ravana ho.”

Jaan-e-Alam ne tevri chadha ke kaha “Dekhiye aap ne phir apni saltanat ka rob dala. Maana takht-o-taj ki maalik hai. Yeh mulk aap ka hai. Ham gareeb faqir pardesi hai magar aese bhi bookhe nahi ke aap ke khaane ke mohtaj ho. Apni tabiyat apne ikhtiyar mein nahi. Kisi ki mehman-daari aur tauza gavara nahi.”

Malika ko Jaan-e-Alam ke inkar se taklif pahunchi. Kehne lagi “Kisi ki davat na-manzoor karna koi achhi baat nahi. Aage aap ko ikhtiyar hai. Ham aapko majboor to kar nahi sakte.”

Aur mazrat, yeh qist yahan khatam hoti hai…..

Jaari rahegi….

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: