Fasana-e-Ajaib: Qist#11: Malika Mehr-Nigar se Jaan-e-Alam ki mulaqaat

Aur qisse ka agla qist. Aakhri mein hamne shahzaada Jaan-e-Alam aur Malika Mehr-Nigar ki guftagu suni, shahzaade ne apni pechan ki, apne maqsad ka khulasa kiya aur malika ko vaadah kiya. Ab aage…

~~~~ Baaton mein waqt ka pata na chala. Ab subah hone ko thi. Shahzaada ab safar ki liye taiyyar hua. Malika ko be-hisaab malaal hua magar rok bhi na sakti thi. Boli “Baap mera bhi shahnshah tha, bahut taj dar kharaj dete the. Magar unki aadat shuru se darveshi thi. Takht aur taaj chorha, duniye se munh morha. Shahr chorh ke is veerane ko aabad kiya aur yahan makaan bana ke Khuda ki yaad mein baith rahe, mujhse bahut kaha ke kahi shaadi kar lo. Magar mujhe apne baap ki judaai gavaara na huyi. Ab nayi aafat aayi ke ek pardesi panchi pe ji fida ho gaya. Haan to main yeh keh rahi thi kaha gar koi harj na ho to chalte waqt mere vaalid se mulaqaat karte jaao.”

Jaan-e-Alam ne kaha behtar hai. Ek khwas ke saath yeh buzurg ki khidmat mein haazir huya. Dekha ki noorani surat ek buzurg borya bistar bichaye yaad-e-Khuda mein masroof hai. Shahzaade ne salaam arz kiya. Usne dua de kar haath badhaya aur gale se lagaya. Mohabbat se paas bitha kar bola “Malika ka saara haal ham par zaahir hai. Hamne kaise kaise samjhaya magar us ki aql mein kuch na aaya. Bade bol ka sar neecha. Ab kis kis tarah tumhari minnaten keen magar tum shaadi par raza-mand na huye. Khair tumne jo us se vaada kiya agar pura karoge to Allah-taala tumhen apni inayaaton se sar-faraz karega. Har insaan ko yeh samajh lena chahiye ke dil torhna sab se bada gunah hai…”

Shahzaade ne sar jhuka ke arz kiya “Aap mujhe sharmindah karte hai. Main bahut majboor hoon. Jis iraade se ghar chorha, shahr se munh morha, azeezon, doston se bichda, ise pura na karun to apne paraye taane denge ke kam-himmat tha, Raaste mein aaram mila to baith raha. Khauf se mazil tak na pahunch paaya. Khvah makhvah ishq ka dam bharta hai.”

Buzurg ne farmaya “Shabaash! Jeete raho, Khuda tumhe apne maqsad mein kamyaab kare, Jawan-madi aur sabit-qadmi isi ka naam hai. Tumhara haunsla dekh kar umeed hoti hai ke Mehr-Nigar se jo vaada kiya hai use bhi pura karoge.”

Is guftagu ke baad buzurg ne Jaan-e-Alam ko ek lauh inayat ki. Yeh bhi ek tarah ka taveez tha. Us ne samjhaya ke “Jab bhi koi museebat padhe ise khol kar dekh lena aur jo faal nikle us par amal karna. Allah-taala har mushkil asaan kar dega. Achha ab jaao. Allah hafiz, tumhara Allah nigehbaan.”

Lauh le ke shahzaada malika ke paas aaya aur bola “To ab ham rukhsat hote hai. Tumhe Khuda ko saunp jaate hai.” Malika ne chalne ki baat suni, kaleja thaam ke yeh sher padhne lagi.

Main mar gayi sun ke is ke sar anjaam safar ke
Aaghaz hi dekha na kuch anjaam safar ka
Kehte hai voh ab jaata hai aisi hi dua kar
Masdood ho raasta dil nakaam safar ka
Mat jaan nikammi mujhe ae jaan liye chal
Karti chalun ki saath tere kaam safar ka
Main kasur hasti hi se ab kuch karungi
Aage na mere lijiyo tu naam safar ka
Chalne ki salah is ke theharti nahi ab saath
Mauqif nawazish hua aaram safar ka

“Jis tarah dikhaye jaate ho isi tarah ek din munh dikhaiye ke judaai ka gham hamare dil se door ho jaaye.”

Gharz Jaan-e-Alam ravana hua. Mehr-Nigar ka rote rote bura haal ho gaya. Saheliyon ne samjhaya ke “Musafir ke peeche rona bad-shaguni hai. Allah woh din bhi dikhayega jab musafir sahi salamat laut aayega.”

Khud Mehr-Nigar bhi apne dil ko tarah tarah tasalliyan deti thi voh kisi ke qabu mein na aata tha. Dil beqaraar tha. Ansuon par kisi tarah ikhtiyar na tha. Har waqt Jaan-e-Alam ki judaai mein ghulti thi.

Yeh qist yahan khatam huyi. Agli “Shehzaade ka mulk Zar-Nigar mein pahunchna” ke liye intezaar karen baraye-karam.

Jaari rahega…….

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: