Fasana-e-Ajaib: Qist#12: Shahzaade ka mulk Zar-Nigar mein pahunchna

Aakhir shahzaada Jaan-e-Alam malika Mehr-Nigar se vaada kar ke phir apne safar par nikal gaaya, aur malika pe kya beeti aap sab ne pichle qist mein dekha. Chaliye ab qissa aage badhaya jaaye…..

~~~~ Mulk Zar-Nigar, malika Mehr-Nigar ke baagh se chalees manzil door tha. Shahzaade ne is zameen par qadam rakha to is tarah ke pairon par chaale the aur honthon par aah o naale the. Chalees manzil ka yeh safar kayi mahinon mein teh huya tha magar safar ki takleefon ne shahzaade ko nidhal kar diya tha. Ab jo dost ki nagri mein pahuncha to jaan mein jaan aayi. Jo jo pate tote ne bataye the voh sab us ilaaqe mein paaye. Chaaron taraf shadaabi thi. Har mast meethe aur thande paani ke chashme behte the. Jangal hare bhare the. Har taraf anokhi bahar thi. Hawaaen khushbu bikhrati rehti thi. Jaan-e-Alam tez tez qadam uthata manzil ki taraf chala jaata tha.

Ek roz char ghadi din rahe kya dekhta hai ki shumal ki taraf koi cheez suraj ki taraf chamak rahi hai ke us par nazar nahi thehrti. Aql hairan huyi. Dil ne kaha ho na ho qayamat nazdeek aayi ke suraj mashriq ko chorh kar shumal ne nikla. Anjuman Ara ko dekhne ki umeed jaati rahi ke ab qayamat aayi to na hum honge na voh aur na yeh duniya ka karkhaana. Qareeb gaya to pata chala ke darvazah hai, nihayat alishaan aur baaten karta hua. Is par sone ka kam ho raha tha aur us par is kasrat se laal-o-yaqut jadhe the ke nazar na thehrti thi. Is se aisi saain phoothti thi ke suraj ko mand karti thi. Shahzaade ko yaqeen hua ke ab manzil aa pahunchi aur yehi woh darwaaza hai jis ki talaash mein dar-badar awaara hua. Khuda ka shukr kiya aur sajde mein gir pada.

Shahzaada shahr panah ki darwaaze mein daakhil hua. Dar-o-deewar ko jagmagata paya. Aksar makaan balvar balke yaqut ke bane the. Jagah jagah lohe ke burj nazar aaye jin par bhari tauseen charhi huyi thi. Topon ke daaye baaye jawan gola andaz bad le dagle pehne thahal rahe the. Zameen-o-asmaan unki haibat se dahl rahe the. Gali kuche saaf the. Darwaaze par paanch hazaar sawar aur lakh pyadon ki chavni.

Jaan-e-Alam ne ek sawar se pucha “Is shahr ka kya naam hai aur yahan ka hakim kaun hai?” Us ne ghaur se dekha ke ek jawan hai khubsurat magar safar ki takleefon se badhal, surat se riyasat tapakti hai, “Aap kahan se tashreef laaye hai?”

Shahzaade ne kaha “Wah sahab, yeh khub hai, sawaal kuch, jawaab kuch.” Usne jawaab diya. “Is mulk ko Zar-Nigar kehte hai.”

Yeh sunna tha ke shahzaade ka chehra khushi se damakne laga. Dil mein kaha qismat ne yavri ki aur aakhir manzil par pahuncha diya. Aage bada aur shahr ko dekh ke hairan hone laga. Ek se ek umda makaan ek se bade kardkan. Ja baja nehren thi aur in mein phuvare chathte the. Dukanon mein tarah tarah ke qimti saman ke dher lage the. Khareedaron ki woh kasrat thi ke chalne waalon ke kapde pahte jaate the.

Jaan-e-Alam Khuda ki qudrat desk kar ash ash karta tha aur dil mein kehta tha ke kya mulk hai, kya saltanat hai aur kya shahr-o-bazaar hai. Kaise beopari aur kaise khareedar hai. Har shakhs ko aaram aur rahat haasil hai. Kya umda bandobast hai. Jab chauk mein aaya to pucha “Badshah salamat ki mahal sara kidhar hai?” Jawaab mila “Dahine haath ko seedhe chale jaao.”

Bazaar teh kar ke Jaan-e-Alam shahi imaraton ke nazdeek aaya. In imaraton ko aur bhi ajab paya. Aese mahalat kisi badshah ne khwab mein bhi na dekhe honge magar ek ajeeb baat yeh dekhi ke jo darbaari mulazim idhar se guzarta siyah maatami libaas pehne hota. Us ka mata thanka aur paaon man man bhar ho gaye. Dil mein kehta tha Khuda khair kare bura shagun hai.

Zara der mein hato bacho ko shor utha. Dekha ek purana khwaja sara, surat se nihayat hoshiyar Mahboob Ali Khan naam. Sawaari mein sawar aaya magar voh bhi siyah-posh. Jaan-e-Alam ne badh ke salaam kiya. Is ne mohabbat se jawaab diya aur hairat se shahzaade ko dekhne laga. Bola “Wah wa kya Khuda ki qudrat hai. Allah-taala ne apne haath se banaya jai. Kya surat shakal hai. Chehre se kaisi riyasat tapakti hai.” Phir shahzaade ko mukhatib kar ke bola “Ae haseen! Kis taraf se aakar is dayar ko raunaq bakshi aur is manhoos shahr mein qadam rakhne ka kya sabab hai?”

Shahzaade ne kaha “Ham is shahr aur yahan ki shahrion ko dekhne ki khwaish dil mein laayen hai magar Khuda ke liye yeh to bataiye ke yeh kis ka matam hai ke jo hai siyah-posh hai?”

Jaari rahega….

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: