Fasana-e-Ajaib: Qist#13: Shahzaade ka mulk Zar-Nigar mein pahunchna

Aur agla qist Mirza Rajjab Ali Beg Suroor ki dastaan “Fasane-e-Ajaib” ka. Pichle mein hamne dekha ki shahzaada Jaan-e-Alam apni manzil to pahunch gaya hai, lekin wahan ek baat dekh kar pareshan hai aur aakhir ek jaankar se puchta hai. Is ajab baat ki kya wajeh hai, jaanne ke liye aage padhe….

~~~~ Yeh sun ke khwaja sara roya. Bola “Ae naujawan! Tune suna hoga ke is mulk ki shahzaadi Anjuman Ara thi jis ke husn ka duniya mein kahi jawaab na tha. Bahut shah aur shahryar us se shaadi ke umeedvar the. Kitno ne us ke liye jaane de di. Chaar paanch din se hamare naseeb aise soye ke ek jadugar ayyar makkar jadu ke zor se use uda le gaya.”

Jaan-e-Alam ne jo vahshat-naak khabar suni to hosh-o-hawaas jaate rahe aur behosh ho ke zameen par gira. Khwaja sara samajh gaya yeh becharah mohabbat ka maara hai. Voh apni nadaani par pachtane laga ke aesi buri khabar yun achanak sunani na thi. Har chand gulab-kewra chidhka magar hosh na aaya. Shahzaade ko hosh mein laane ke saari tadbeeren bekaar ho gayi to khwaja sara pareshan haal badshah ki khidmat haazir huya. Arz kiya ke “Anjuman Ara ka gham aaj phir taaza ho gaya.”

Badshah ne sawaal kiya “Kya baat hai. Khair to hai?”

Khwaja sara ne bataya ke “Kisi mulk ka bahut haseen shahzaada Anjuman Ara ki mohabbat mein deewana huya hai aur takht-o-taj se haath utha ke yahan pahuncha hai. Maine bataya ke shahzaadi ko ek jadugar jadu ke zor se utha kar le gaya to uski halat ghair ho gayi aur shayad yeh soch kar ke

Ji ki ji hi mein rahi baat na hone paayi
Haif hai is se mulaqaat na hone paayi

Ek aah bhari aur behosh ho ke zameen par gir padha. Abhi tak hosh aaya nahi hosh mein laane ki jitni tadbeeren ki sab bekaar gayi. Khuda jaane jeete bhi hai ya mar gaya. Aesi saj dhaj ka jawaan aaj tak to apni nazar se guzra nahi. Is shahzaade aur shahzaadi ko ek saath dekhe to aese lage ke do suraj ek saath niklen hai. Aap is jawaan ko dekhen ko dekhenge to shahzaadi ko bhool jayenge.”

Badshah beti ki judaai mein bechain tha. Socha is naujawan ko bula ke dekhun. Aur dobara baatein karun. Shayad isi tarah ji bahle. Darbaariyin ko hukum diya “Jald jaon aur jis tarah ban padhe is naujawan ko le kar aao.”

Log daudhe aur shahzaade ko murde ki surat utha laaye. Badshah ne haath munh dhulvaya abeer mushk chidhka, munh mein kewda thapkaya, tarah tarah ki khushbuon sunghai. Jab kahi Jaan-e-Alam hosh mein aaya. Ghabra ke uth baitha. Dekha ke pakki umr ka ek shakhs, chehre par badshahon ka jalaal, sar par shahi taj, jism par shahana poshak, judaon takht par badhi aan se baitha hai, chaar hazaar ghulam kamre mein sunehri thapke baandhe talwaren kase khidmat mein haazir hai, ameer-o-zer darbari, sipah salar sab adab se khade hai.

Shahzaada adab se uth khada hua aur jhuk kar is tarah adaab bajlaya jis tarah badshaon ko salaam karte hai. Badshah ne gale lagakar apne paas bitha liya. Jaan-e-Alam par jab se badshah ki nazar padhi thi voh is par farefta ho gaya aur afsos karta tha ke aesa khubsurat, darbaar ke adab adaab se vaqif aur nek jawaan mila jise woh apni damaadi mein bila jhijhak kar sakta tha to shahzaadi na rahi. Saare darbari bhi sakte mein rahe. Takht-o-taj ka aesa waaris haath aaye aur mehroom rah jaaye. Shahzaade ki halat to koi aese hi samajh sakta hai jo manzil par pahunch ke nakaam ho gaya ho.

Hasrat pe us musafir be-kas ki roiye
Jo thak gaya ho baith ke manzil ke saaamne

Magar shareefon ka yeh tareeqa nahi ke majlis mein aah-o-faryad kare. Shahzaada sharm-o-haya ka putla tha, mehfilon ke taur-tareeqe vaqif tha. Seene mein gham ka toofan utha magar us ne seh liya. Badshah ne naam aur maqam pucha, baap dada ke baare mein daryaft ki. Shahzaade ne saare sawaalon ka adab se jawab diya. Phir shahzaadi ka haal pucha.

Badshah ne farmaya “Ae azeez! Kya arz karun. Muddat se ek jadugar is fikr mein tha ke kisi tarah jadu ke zor se udha le jaayen magar bas nahi chalta tha. Maine khatre ki bu sungh ke nigrani ka bandobast bahut sakht kar diya tha magar voh bada ayyar tha. Ek din apni koshish mein kamyaab ho hi gaya. Is haadse ke baad se main mahal mein nahi gaya hoon, ab mahal mahal nahi raha, mataam khana ban gaya hai. Har taraf se rone peetne ki awaazen aati hai. Khaana peena haram hai.”

Jaan-e-Alam ne sawaal kiya “Kya yeh bhi andazah hai ke voh jadugar shahzaadi ko kidhar le gaya?”

Yeh qist yahan khatam…..

Jaari rahega…

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: