Fasana-e-Ajaib: Qist#14: Shahzaade ka mulk Zar-Nigar mein pahunchna

Aur aab ham shahzaade Jaan-e-Alam ke qisse ke ek ahm maqaam par pahunche hai. Shahzaada apni manzil pahunch to gaya hai, lekin jiske firaaq mein hai woh hi lapata hai. Kya hota hai, janne ke liye aage padhen….

~~~~ Badshah ne farmaya “Paanch kos tak pata chalta hai. Is ke aage ek qila hai jiski fazeel aasmaan se baaten karti hai, andazah yeh hota hai ke is qile mein aag bhari hai jo har waqt roshan rehti hai. Vahan ka haal nahi khulta. Shayad yeh sab jadu ka karkhana hai.”

Shahzaade ne kaha “Khair agar zindagi baaqi hai to is jadugar ko jahannum ki sair karata hoon aur shazaadi ki sahi salamat le ke aata hoon. Acha qibla, Khuda hafiz.”

Badshah lipat gaya “Baba Khuda ke vaaste is khayal se baz aa. Voh jaadu ka karkhaana aesa hai jiske andar dakhil hona na mumkin hai. Phir yeh ke mujhe teri judaai kab gavara hai. Beti ko to dhokhe mein khoya, tujhe jaan boojh ke aag mein jhonk doo. Main budhape mein yeh badnaami mol nahi le sakta. Yeh saltanat haazir hai. Main to budha ho gaya. Ab tu is par raj kar. Main ab kisi goshe mein baith kar Allah Allah karunga.”

Shahzaade ne jawaab mein arz kiya“Yeh raj patt huzoor ko mubarak rahe. Mujhe saltanat aisi hi azeez hoti to khvamkhvah apna ghar chorh kar kyun dar-badar awaara phirta. Khuda ka diya sabhi kuch tha. Main shazaadi ki khatir safar ki kitni takleefen bardasht kar ke yahan tak pahuncha. Ab yeh taan sunon ke parayi saltanat apna ke baith gaya. Log kahenge ke jadugar shahzaadi ko utha le gaya. Yeh beghairat tha jeeta raha. Jis madadgaar ne hazaar bala se bacha kar yahan tak zindah-o-salaam pahunchaya hai vahi vahan se bhi kamyaab-o-kamraan la kar phir ap se milayega varna apni manhoos surat hargiz na dikhaunga. Behaayai ke jeene se marna behtar. Jab ghar se chala tha to aql rokti thi. Paaon padhi thi ke yah nadaani na kar, jaan bookh ke dozakh mein na padh. Saltanat si cheez har kisi ko muyassar nahi aati. Aaram se hukumat kar, magar ishq kehta tha ke jise ji chaahe uske baghair zindagi guzarna bekaar hai. Daulat, izzat, shohrat sab aani jaani cheezen hai, aql kehti thi abru ka paas kar, khandaan ke naam par dhabba na laga, darbadar awaara na ho, ishq samjhata tha yaar ke milne mein izzat hai, jangal jangal bhatakne mein rahat hai, aql kehti thi shahi libaas ki nirali shaan hai, jo ise pharh phainke bada nadaan hai, ishq kahta tha, aql deewani hai. Sab se achha libaas aryani hai. Yeh voh libaas hai jo baithe na kharab ho, na ise dhone ki zaroorat na rafoo ki hajat, na ise chor le jaaye, na kabhi yeh gale se juda ho, na kabhi jism par boj ho.”

Is taqreer mein ishq ki jeet huyi. Aql ne maat khayi. Mulk Zar-Nigar ki talash mein lamba safar shuru huya. Ek parinda rahnuma huya. Bachpab ka dost ek wazirzaada aur tha, voh tanhai ka shareek aur safar ka saathi huya. Qafila ravana hua magar badqismati yeh ke tota urh gaya. Ek hiran ke milne se saathi bichad gaya. Phir to tanhai ne jangal jangal bhatkaya, aakhir jadu mein phasaya, qismat ne hamen rulakar dushman ko hansaya. Thodi museebat paa ke rihayi paayi. Aakhir mulk Zar-Nigar ka raasta mil gaya. Magar sawari chuthi ab paidal chalna padha. Phir ek pariyon ke akhade mein guzar huya. Vahan Malika Mehr-Nigar farefta huyi. Tarah tarah ke yaqeen dila kar aur vaade karke vahan se ijazat mili. Phir safar shuru huya. Aakhir hazaar museebaten utha kar apni manzil tak pahuncha. Ab ghar pahunch ke dhokha khaya. Jaan boojh ke bhool jana kahan tak munasib hai. Mujhe marna gavara hai magar is khayal se baaz aana manzoor nahi.”

Yeh khabar mahal mein pahunchi ke ek shahzaada Anjuman Ara pe shaida huya hai aur use paane ke liye badhi takleefen utha kar yahan tak pahuncha hai. Jab usne yeh suna ki jadugar shazaaadi ko udha le gaya hai aur aag se bhare qile mein qaid kar diya to voh bhi us aag mein koodne ke liye taiyyar ho gaya hai. Anjuman Ara ki maa ne yeh majraa suna to mahal saara ke darwaaze tak daudhti chali aayi. Khwaja sara ne yeh qissa badsha ko sunaya aur arz kiya “Jald shahzaade ko le kar mahal mein tashree laiye.” Badshah shahzaade ko mahal mein le gaya. Anjuman Ara ki maa ne balaaen li aur duaaen di. Sab ne shahzaade ka sadqa utaara.

Badshah ne badhi mushkil se shahzaade ko is par razi kiya ke kisi tarah raat guzaar le aur phir safar par ravana ho. Dastarkhwan pe khaana chana gaya magar shahzaade ne inkar kiya lekin aakhir yeh soch kar do-chaar luqme le liye ke jab se Anjuman Ara bichdi hai sab ka khaana peena haram hai shayad mere bahane doosre bhi kuch chal len.

Jaari rahega…

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: