Fasana-e-Ajaib: Qist#17: Shahzaade ka mulk Zar-Nigar mein pahunchna

Aur pichle mein hamne dekha ke shahzaada Jaan-e-Alam aakhir apni safar ki manzil, shahzaadi Anjuman Ara se aakhir mil jaata hai. Aahe kya hota hai, jaane ke liye padhte rahe….

~~~~ Baat ki baat mein badshah apni beti ke paas aa pahuncha. Kahariyan badshah ka takhat qareeb laaye Anjuman Ara munh chippa kar baith gayi. Jaan-e-Alam chup-chap paas se hath gaya. Badshah takhat se uttra. Sab se pehle Jaan-e-Alam ko gale se lagaya. Us ki bemisaal bahaduri ki tareef kiya aur bahut si duaaen di. Phir beti ko chaati se lagakar sukhpaal par sawar kiya. Shahzaade ko apne barabar takht par bithaya. Ab saltanat ke khair-khvah aur mulaziman sarkar nazdeek aaye, unhone ne manon sona chaandi takht aur sukhpal par nisaar kiya. Is qadr asharfi rupaye sadqe huye ke aaj tak jo mohtaj musafir udhar jaate hai chaandi sona paate hai bhaag khul jaate hai.

Thodi der main fauj aur naubat nishaan balke sara samaan aa jamaa huya. Ahl shahr ne yeh khabar suni to khushi se bavle ho gaye, khushi ke shadyaane bajaate, mubarak salamat ka ghul machate huye jamaa ho gaye. Sab ki eid ho gayi, shahr ke raunaq phir se laut aayi, mahal mein khushi ki mehfil garam ho gayi.

Anjuman Ara ki maa gird phirti thi, baar baar zameen par sajde karti thi. Kehti thi “Allah ne Jaan-e-Alam ki badaulat haare din phere.” Badshah kahta tha “Ae Khuda-e-paak! Jis tarah hamari beti aur ham mile saare bachde tere karam se isi tarah mile, sab ki muradon ke phhol khile.” Sab Jaan-e-Alam ki bahaduri ki daad dete the ke yeh namumkin kaam isi ke dam se mumkin hua.

Anjuman Ara jab yeh naam sunti, khushi se khil jaati magar logon ko sunane ke liye kehti “Sahaabon! Baar baar yeh kya kehte ho. Mera muqaddar seedha na hota to voh kaun tha jo mere din phairta.”

Shahzaadi ki saheliyan tarh gaayi ke dil mein kuch aur hai, zabaan par kuch aur. Yeh saari baaten sirf sunane ke liya hai. Jab Anjuman Ara ki maa paas se sarki to unhen cherh charh karne ka mauqa mil gaya. Paas aake boli “Hai hai, ham to teri judaai mein tadapte the, zindagi ke din bharte aur ghadhiyan ginte the. Yeh surat Allah ne dikhayi balke yun kaho ke Jaan-e-Alam ki jootiyon ke sadqe nazar aayi. Jise Khuda ne ham sab ki khwaish puri ki isi tarah Jaan-e-Alam ke ji ki murad bhi Khuda puri kare.”

Anjuman Ara ghusse ki shakal bana, tevri chadha ke kehne lagi “Shayad tum sab ki shamat aayi hai jo yeh bak-bak machayi hai. Tumne khub meri charh nikaali. Khuda jaane ke kaun hai aur kahan se aaya hai. Ise to kya kauson, voh bechara to musafir hai. Ji mein aata hai inka munh noch loon jo mujhe tang kar rahe hai. Ab koi mujhe cherhega to main ro doongi aur apna sar patak loongi.” Yeh keh ke muskura di.

Shahr mein mandai ho gayi ke khushiyan manao, saare shahr ko dulhan ki tarah sajaao, naach rang ki khub khub mahfile jamaao. Saltanat ke khair-khvah nazren le ke haazir huye. Shahi mulazim inaam se maalamal huye. Gharz ghar ghar eid ho gayi. Khub khub nazren niyazen huyi. Mahtajun ne aesi khairat paayi ke kabhi khwab mein itna rupaiya paisa aur sona chaandi na dekha hoga. Har taraf mubarak salamat ki aawazein sunayi deti thi. Naachne waaliyan nachti thi aur gaane waaliyan yeh gaati thi. 

Shaadi-o-jashn sazavar mubarak hove
Aaj shahzaadi ka deedar mumbarak hove

Sadosi saal salamat rahe ba aman-o-imaan
Husn ki garmi bazaar mubarak hove

Woh bhi din aaye jo sehra baandhe sar par us ke
Shab khushi se kahin har baar mubarak hove

Bad shaadi ke Khuda de koi farzand-e-rasheed
Ham kahin yeh dildaar mubarak hove

Khar rakhte hai kambakhti jo dushman hai Suroor
Doston ko gul-o-gulzaar mubarak hove

Aur yeh qist yahan khatam huya. Qissa jari rahega…..

Advertisements

One response to this post.

  1. Posted by motahar mehdi on June 7, 2012 at 00:18

    I like fasana-e-ajaib thanks for author

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: