Fasana-e-Ajaib: Qist#23: Mehr-Nigar se dobara mulaqaat

Aur shahzaada Jaan-e-Alam shahzaadi Anjuman Ara ko le kar apne vatan ke liye Zar-Nigar se ek bade qafile ke saath rukhsat ho gaya hai. Chaliye dekhen vaapsi ke safar mein kya beetti hai….

~~~~ Jab se qafilaa malika Mehr-Nigar ke baagh ke paas pahuncha to khabardaron ne malika ko yeh khabar pahunchayi ke lo mubarak ho shahzaada phir se tashreef laya hai. Shahzaade ki judaai mein us ka dil itna kamzor ho gaya tha ke yeh khushkhabri na sah saki, sunte hi gash khaake gir gayi. Hosh aaya to boli “Logon! Yeh kya kehte ho! Kahin aesa bhi hota ke soya huya muqaddar yun jaag uthe? Tum sab mera dil bahlane ko aesi baaten karte ho.”

Itne mein Mehr-Nigar ki khvas Dil-Aaram baradari se neeche uttri aur kehne lagi “Khuda jaane yeh lashkar kahan se aa ke yahan uttra hai.” Malika ne yeh sun ke thandi saans bhari aur sair ke bahaane khvason ke kandhe pe haath rakh ke kothe par chadhi. Dekha ke sach-much ek bhaari lashkar aa ke uttra hai. Door tak shahi kheme gadhe hai aur faujen padhi hai. Sawaari piyade idhar-udhar tahal rahe hai.

Shahzaadi ki nazren idhar-udhar sair karti rahen. Achanak shahzaade Jaan-e-Alam par nazar padhi. Voh ek shaandar ghode par sawaar tha. Donon taraf kayi kayi sawaar the. Mehr-Nigar ne pehle use thaka haara, musafir ka maara dekha tha. Aaj is shaan se nazar aaya to aur bhi haseen laga. Malika ka badan kapkapane laga. Qareeb tha ke gash khaake gir padhi magar sambhal gayi aur chehre ki zardi surkhi mein badal gayi.

Shahzaada ghode se uttra aur seedhe malika ke vaalid ke paas pahuncha aur salaam baja laya. Us buzurg ne duaaen di aur gale se laga ke bola “Pak parvar-digar ka karam hai ke us ne tumhen khush-o-kharam aur khairiyat ke saath dikhaya.” Is ke baad Anjuman Ara ki sawaari aayi. Usne bhi tasleem ki. Is buzurg ne jawaab mein kaha “Shahzaadi, jeeti raho, Khuda tumhari umr mein barkat de. Tum ne faqeer ke haal pe raham kiya.” Us ne arz kiya “Kaneez muddat se aapki tareef sunti thi. Dil mein aap ke qadam choomne ki khvaish thi. Aaj shahzaade ki badaulat haazri naseeb huyi.”

Shahzaadi do ghadi us buzurg mein baithi, phir arz kiya ke “Malika se mulaqaat ka bahut ishtiyaq hai, agar ijazat ho to un se mulaqaat kar lun.” Unhone kaha ”Shauq se, tumhara ghar hai, is mein ijazat ki kya zaroorat hai.”

Jaan-e-Alam to ijazat le kar apne kheme mein aa gaya, Anjuman Ara malika Mehr-Nigar se milne chali gayi. Vahan pehle se iske aana ki itlaa ho chuki thi. Aur zara der mein ujda huya makaan saj ban ke istaqbaal ki liye taiyyar ho chuka tha.

Anjuman Ara ki sawaari uttri to malika istaqbal ko badhi aur jhuk ke adab baja laayi. Anjuman Ara ne gale lagaya. Malika ki aankhon mein aansu bhar aaye. Boli “Tumne mujhe sharmindah kiya. Main faqeer ki beti tum shahzaadi, tumhare qadmon ne is makaan ki izzat badhayi varna main is qaabil kahan thi ke tum meri mehmaan hoti.”

Anjuman Ara boli “Malika, tum bhi khub baaten karti ho. Hamara tumhara to barabar ka rishta hai. Balke ek maamle mein tum ham se badh kar ho. Shahzaade se tumhari mulaqaat ham se pehle huyi. Ham to doosre numbar par hai.” Gharz donon mein khub hansi mazaaq hota raha. Nok-jhonk hoti rahi. Saari raat baaton mein guzar gayi. Din niklaa to Anjuman Ara Jaan-e-Alam ke paas aayi aur der tak Mehr-Nigar ki aadaton ki tareef karti rahi.

Doosre din Jaan-e-Alam ne malika ke baap se kaha “Main apna vadaa pura karne ko haazir hoon.” Us ne jawaab diya “Yeh tumhara karam hai varna ham is qaabil kahan hai. Tumhen apni baat ka paas hai ke ham par yeh ehsaan karte ho. Bismillah. Malika ko apni kaneezon mein shaamil kar lo.” Behrhaal malika Mehr-Nigar ka Jaan-e-Alam se nikaah ho gaya. Anjuman Ara aur Mehr-Nigar mein mohabbat itni badhi ke shahzaade ko bhool gayi. Shahzaadaa bhi donon ko barabar chahta tha aur donon ka khayal karta tha.

….Aur yeh qist yahan khatam. Baaqi qissa jaari rahega…..

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: