Fasana-e-Ajaib: Qist#24: Wazirzaade ki namak-haraami

Hamne dekha ke Anjuman Ara ke baad, shahzaada Jaan-e-Alam ka nikaah malika Mehr-Nigar se bhi ho gaya. Aap mein se kayi sochnge ke ab kya bacha hai dastaan mein. Lekin, yeh qist ke unwaan se aap sab, izzat-maab khwatin-o-hazratsamajh jaayenge ke abhi qissa ke kaafi kuch baaqi hai. Itna hi sahi, baaqi bayan mein aapko pata chalega…. To aage badha jaaye……

~~~~ Kuch din shahzaada vahan raha aakhir vatan aur ahl-e-vatan yaad aaye. Donon biwion se kaha ke bahut din yahan reh liye. Ab kooch karna chahiye. Donon to apne miyan ki khushi mein khush thi. Fauran raazi ho gayi. Phir shahzaada apne khasr ki khidmat mein haazir huya aur us se ijazat maangi. Voh buzurg jaanta tha ke shahzaada ek muddat se apne maa-baap aur azeezon se door hai, voh us ki judaai mein tadhapte honge. Is liye us ne roka munasib na samjha.

Rukhsat ki taiyyariyan huyi. Mehr-Nigar ka baap takht-o-taaj chorh kar faqeer ban jangal mein aa baitha aur yaad-e-Khuda mein zindagi guzarta tha lekin rukhsat ke waqt us ne beti ko itna samaan aur naqad rupaiya diya ke shahzaada Anjuman Ara ka jahez bhool gaya. Rukhsat ke waqt voh nek buzurg Jaan-e-Alam se bola “Mujh ghareeb ke paas kuch na tha jo teri khidmat mein pesh karke apna ji khush karta. Magar ek pate ki baat batata hoon. Agar dhyan mein rakhoge to Qaroon ke khazaane se ziyadah kaam aayegi.” Phir alag le ja ke samjhaya aur baar-baar takeed yeh baat apne sage bhai ko na batana. Aur bataoge to pachtaoge aur Hazrat Yousuf se bhi ziyadah dukh uthaoge. Har taraf nek kam aur bure ziyadah hai. Har taraf Shaitan ne apne panje gaade hai. Kisi ko apna raaz kehna museebat ko davat dena hai. Chup rahne mein behtari hai. Hazrat Adham ke zamaane se yeh dekhne mein aaya hai ke bhai bhai ka dushman hai.

Bhag un barda-faroshon se kahan ke bhai
Bech hi dalen jo Yousuf sa baradar hove

Phir voh buzurg Anjuman Ara ke paas aaya aur bola “Shahzaadi! Apni mehrbaani se is faqeerzaadi ko saath liye jaati ho to is ka khayal rakhna. Is par hamesha karam ki nazar rakhna. Yeh khidmatguzaari mein kasar na utha rakhegi. Ise tumko saunpa aur tumhen usko saunpa jis se bada nigehbaan koi nahi ho. Lo Khuda hafez.”

Duniya mein aese aese itefaaqat ho jaate hai ke aql hairaan rah jaati hai. Wazirzaada ji shahzaade ke saath vatan se nikla tha aur hiran ke peeche ghoda daal ke bichadh voh muddaton hairan-o-pareshan ghoomta raha. Aakhir usi din phirta phirta idhar aa niklaa. Us ne jo yeh lao-lashkar dekha to kisi se poocha ke yeh qafilaa kis ka hai aur kahan ki taiyyari hai.

Logon ne wazirzaade ko Jaan-e-Alam ka sara qissa sunya. Yeh khush hua. Jaan mein jaan aayi. Phir poocha ke shahzaada kahan hai to maloom hua ke dana buzurg kuch samjhaane aur nasihat karne alag le gaya hai.

Jan Jaan-e-Alam buzurg se rukhsat hoke sawaar hone laga to yeh daudha aur aadab baja laya. Shahzaade ne pehchana aur ghode se khud ke baghal geer ho gaya. Isi dam poshaak pehnayi aur apne hamraah sawaar kiya. Raste mein shahzaada apne dost se safar ka haal poochta raha. Voh batata raha. Jab shahzaada kheme mein dakhail huya to wazirzaade ko bhi vahan talab kiya. Us se Anjuman Ara aur malika ko nazar dilvayi aur bola “Yehi shakhs hai jis se judaai seene mein kaante ki tarah khatakti thi. Dekho jab achche din aate hai, be-talaash bichde mil jaate hai. Zamane ki gardish ne hame apne dost se judaa kar diya tha aakhir mila bhi diya.’

Ab wazirzaade ke dil ka haal suno. Usne Anjuman Ara ke husn-o-jamaal ko dekha to deewana ho gaya. Hosh-o-hawaas jaate rahe, aql kho baitha, dil mein dagha aayi, namak-haraami par kamar bandhi aur Anjuman Ara ko haasil karne ki tadbeeren sochne laga.

Zara der yeh sohbat rahi. Phir sab apne apne khemon mein chale gaye. Wazirzaade ke liye ek shaandar khema kasa gaya. Donon shahzaadion ke saath bahut haseen kaneezen thi. Woh sab wazirzaade ko dikhayi gayi ke in mein se jo pasand ho us se shaadi kar le. Voh namakharaam to aur hi khayal mein tha. Banavat se bola “Meri kahan yeh majaal ke aapki kisi kaneez se shaadi karne ka iradah karun.” Jaan-e-Alam is jawaab se bahut khush huya ke wazirzaada hamara kitna adab karta hai.

Aur ab yeh wist yahan khatam ki jaaye. Aage ka haal agli mein. Intezaar karen, baraye-karam….

Jaari rahega silsila….

Advertisements

One response to this post.

  1. Fasana e ajaib urdu adab ki ek bemishal kitab hai
    urdu adab ko ek nai rah dikhai is kitab ne

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: