Fasana-e-Ajaib: Qist#25: Wazirzaade ki namak-haraami

Aur aapne dekha ke pichle qist mein kitne naye morh paida huye hai, aur asli qissa to ab shuru hone ka ishara hai. Chaliye dekhte hai ke aage kya hota hai…..

~~~~ Shahzaade aur wazeerzaade mein haq vaqt har tarah ki baaten hoti thi. Is se koi bhed na tha magar jab kabhi wazirzaada poochta ke malika ke baap ne alag le jaake kya nasihat ki to voh taal jaata tha.

Ek din Anjuman Ara aur Mehr-Nigar mein aapas mein salah huyi aur phir donon ne shahzaade se arz kiya ke “Yeh baat kahan tak munasib hai ke ek ghair shakhs ko jo javaan bhi hai ise har vaqt apni mehfilon mein shareek rakha jaaye. Is tarah hukumat ka rob khatam hone ka bhi andeshaa hai. Phir yeh ke Shaitan ko kabhi door na samjhna chahiye aur ghair to kya apne par bhi aitemaad na karna chahiye.

Jaan-e-Alam ne ghusse se kaha “Aesi baat phir kabhi zabaan par na laana. Is ne tumhari kis kaneez tak ko qabool kiya nahi tumhen kya buri nazar se dekhega. Phir main aesa bewaquf bhi nahi ke hoon ke be-soche samjhe kisi par bharosa bhi kar loon.”

Malika sun ke hansi aur Anjuman Ara se mukhatib ho ke boli “Khuda ke liye zara tum hi insaaf karo, shahzaade ki bewaqufi mein kise shak ho sakta hai. Agar yeh aql ke dushman na hote to be-soche samjhe hauz mein kud ke jadugarni ke qaid mein kyun phaste. Tum chup kyun ho gayi, zara bolo. Sach kaho, sharmaao mat tumhare ji mein kya aayi ke hauz mein ghota maar diya. Yeh no socha ke kahan shahzaadi Anjuman Ara kahan jangal ka hauz. Anjuman Ara na huyi jal pari ya paani ki machhli ho gayi.”

Jaan-e-Alam khisiyana ho ke bola “Kya tamskharapan karti ho. Kahan ki baat kaham jodhti ho. Mohabbat mein aesa hi hota hai. Insaan ki aql maari jaati hai. Mujhe to kehti ho apni himaqaton ka khayal karo.” Malika ne kaha “Meri kahani to tum apni sharmindagi door karne ko sunate ho. Mera kya hai. Main to auratzaad hoon. Zara si nadaani ho gaayi to kya huya. Khair shukr ki baat yeh hai ki ham donon ki aql ek si hi hai.”

Is tarah yeh baat hansi mein udh gayi magar voh makkaar badzaat mauqe ke intezaar mein raha. Ek din jangal mein lashkar ne khema daala. Mausam achcha tha. Chaaron taraf hariyali thi. Thandi hawaaen chal rahi thi. Phoolon ki bheeni bheeni khushbuon mast kiye de rahi thi. Shahzaade ke dil mein lahr aayi. Wazirzaade ke haath pakde utha aur chashme ke kinaare ja baitha. Sharaab ka daur chalne laga. Sharaab ka bhi ajab haal hai, peene waale ko apne dil-o-dimaagh par qabu nahi rahta. Jaan-e-Alam ko nashaa chadha to wazirzaade se dosti aur mohabbat ki baaten karne laga. Voh kambakhat to pehle hi mauqe ki talaash mein tha. Rone laga.

Shahzaade ne hans ke kaha “Khair to hai?” Voh namak-haraam bola “Maine jaan-nisaari mein koi kasar na utha rakhi. Hamesha shahzaade par jaan-o-maal qurbaan karne ko haazir raha. Aap ki khatir ghar-baar chorha aur jangal ki khaak chaani. Inaam yeh mila ke aap ko mujh par bharosa nahi. Zara si baat is khaaksaar se raaz mein rakhte hai.”

Jaan-e-Alam ne nashe ki tarang mein yeh na socha ke us ka anjaam kya hoga. Us ke rone se bechain ho gaya. Bola “Agar yeh raaz jaanna hi chahta hai to sun. Mujhe malika ke baap ne yeh tarkeeb batayi hai ke jis badan mein chahun apni ruh daal doon.”

Us ne poocha “Yeh kis tarah?”

Shahzaade ne poori tarkeeb bata di. Jab voh seekh chuka tha to bola “Aazmaye baghair mujhe yaqeen nahi ke aese ho sakta hai.”

Shahzaada uth ke jangal ki taraf chala. Zara door jaake dekha ke ek bandar mara padha hai. Kaha “Dekh main is murdah bandar ke jism mein dakhil hota hoon.” Yeh keh ke shahzaada zameen pe let gaya. Bandar uth khada huya. Wazirzaada saari tarkeeb seekh hi chuka tha. Fauran let gaya. Aur apni rooh shahzaade ke badan mein daal di. Phir kamar se talwaar nikali aur apna jism tukde tukde kar ke darya mein phaink diya.

Shahzaade ka nashaa…. Magar agli qist mein pata chalega, kyunke yeh qist yahan khatam.

Qissa jaari rahega……

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: