Fasana-e-Ajaib: Qist#26: Wazirzaade ki namak-haraami

Aur pichle qist mein hamne dekha ke kaise shahzaade Jaan-e-Alam, buzurg ki nasihat bhool kar, kaise ek khatarnaak jaal mein phas gaya. Main taqreer karke aapko qisse ne mahroom nahi rakhna chahta. Is liye, aage ka haal….

~~~~ Shahzaade ka nasha hiran ho gaya magar ab voh shahzaada kahan tha, bandar tha. Apne kiye par bahut pachtaya magar ab kya ho sakta tha. Apne pairon mein aap kulhaadi maari thi. Wazirzaada bandar ke peeche daudha. Voh bechara bhag kar darkahton ke patton mein chup gaya. Wazirzaade ne khud apne kapdon ko tar tar kiya. In par khoon chidhka aur rota peetta kheme mein pahucha. Vahan sab ko yeh kahani sunayi ke “Is vaqt bada ghazab huya. Main wazirzaade ke saath sair karta tha. Achanak jangal se sher niklaa aur use utha ke le chala. Maine talwar se us par hamlaa kiya magar us bechaare ko kisi tarah sher ke panje se churha na saka.”

Sab ne yeh sun ke afsos kiya. Malika ne samjhaya ke qismat ke aage kis ka bas chala hai. Honi to ho ke hi rahti hai.

Zara der ke baad Malika Anjuman Ara ke kheme mein aayi. Der tak wazirzaade ki baaten hoti rahi. Malika bhi bahut zehn aur baat tarhne waali thi. Kehne lagi “Khuda khair kare. Aaj bahut bure shagun huye the. Subah namaaz ke vaqt ek daravna khvab dekha tha. Hirani mera rasta kaat gayi thi aur aaj meri aankh bhi phadak rahi thi. Jab main kheme mein pahunchi to kisi ne cheenk bhi diya tha. Anjuman Ara, tum aql ki putli ho, yeh mera vaham hai ya aaj shahzaade ki harkaten pehle se mukhtalif hai.”

Anjuman Ara ne jawaab diya “Malika, tum to jaanti ho ke shahzaade ko wazirzaade se kitni mohabbat thi. Ranj buri bala hai. Aadmi badhawas ho jaata hai.”

Shahzaade ka yeh dastoor tha ke ek sham Mehr-Nigar ke kheme mein jaata aur subah tak vahin rehta. Doosri sham ko Anjuman Ara ke kheme mein aur raat vahin guzarta. Is hisaab se voh shaam malika Mehr-Nigar ke kheme mein jaane ki thi lekin is ki tavajju Anjuman Ara ki taraf huyi. Is liye us ke kheme mein chala gaya. Mehr-Nigar ne kafi der intezaar kiya. Phir Anjuman Ara ke kheme mein pahunchi. Shahzaada vahan maujud tha. Chehre pe hawaiyan udhi thi. Malika ne poocha “Aaj kahan aaram karne ka iraada hai?” Usne jawaab diya “Jahan tum kaho.” Malika tarh gayi ke yeh shahzaada nahi. Usne kaha ke tum yahi aaram karo. Aur Anjuman Ara ka haath pakad ke apne kheme mein le aayi. Vahan pahunch ke bahut royi peeti ke “Aaj qismat ulat gaayi. Shahzaada ham se bichadh gaya.”

Anjuman Ara ne kaha “Saaf batao kya baat hai.” Malika ne kaha “Yeh shahzaada hargiz nahi hai.” Anjuman Ara ne bhi kaha ke “Is ki bahut si baaten badli nazar aati hai.” “Malika ne kaha “Khair ab jo huya so huya. Aaj ki raat tum yahi so raho.” Jashnon aur tarkanon ko hukm huya ke ham sote hai. “Tum maslah hokar kheme ke darwaaze pe pehra do aur shahzaada to kya farishta idhar aaye to dakhil na hone sake.”

Naqli shahzaade ne jo yeh suna to dar ke Anjuman Ara ke kheme se bhaaga aur kisi doosre kheme mein jaa leta. Ab donon ko yaqeen ho gaya ke yeh asli shahzaada nahi. Agar shahzaada hota to be-takalluf yahan chala aata aur hamari na-khushi ka sabab poochta. Lekin Anjuman Ara ko yeh khayal hota tha ke surat to bilkul vahi hai. Phir yeh kaise ho sakta hai ke shahzaada badal gaya ho.

Malika ne ab use bataya ke “Mere baap ne rukhsat ke vaqt shahzaade ko alag le jaake kuch samjhaya tha. Darasal usne yeh tarkeeb batayi thi ke jab chahon apni jaan doosre jism mein muntaqal karo.” Phir Malika ne yeh bhi kaha ke “Mujhe pehle din se wazirzaade pe shak tha aur main uske saamne aana na chahti thi. Shahzaada nadaan tha mere kaha na maana. Mujhe aisa lagta hai ke shahzaade ne is namak-haraam ko jism badalne ki tarkeeb bata di hai. Isi se nuqsaan uthaya.”

Saari raat donon so na saken. Yehi baaten karti rahen. Aakhir din nikal aaya. Kafile ne kooch……

Yeh qist yahan khatam….. Jaari rahegi.


Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: