Fasana-e-Ajaib: Qist#34: Shah Yaman ka qissa

Chaliye, khwatin-o-hazraat, agle qist aapke nazar. Is mein dekhiye ke shahzaade ko apni museebat se nijaat (is mein koi shak nahi ke voh nijaat to paayega – akhir yeh dastaan hai, koi ma-baad jadidiyat ki novel nahi – magar dekhna yeh hai kya tarkeeb aur kya zariya istemaal mein aata hai) kaise milti hai…… Aap bechain honge. Chaliye qissa badhate hai….

~~~~ Kayi din yehi khel hota raha. Ek roz malika ne bachche ko daba ke adh-muaa kar diya aur chobdaar daudhaya ke shahzaade ko jald bula la kehna ke der lagaao ge to jeeta na paaoge. Daudha chala aaya. Malika ne tota ka pinjhra apne palang ke paas rakh liya tha. Aur bachche ko bilkul maar ke god mein dhar liya tha. Wazirzaada saamne aaya to malika bilak-bilak ke rone lagi. Shahzaade ne samjhaya ke kyun roti ho is ke badle hazaar bachche haazir karta hoon.

Malika ne kaha “Abhi ise bachche ko zindah karo. Agar meri khushi chahte ho to yeh kaam abhi karna hoga.” Voh bola “Kahin mar ke bhi koi zinda huya hai jo yeh zindah hoga?”

Malika ne kaha “Wah jab main royi thi to tum ne meri myna ko zindah kar diya tha.”

Is namak haram ne socha ke shayad shahzaade ne aesa kiya ho. Phir poocha “Zara yeh to batao ham ne myna ko kis tarah zindah kiya tha?”

Malika ne jawaab diya “Tum palang par let rahe the, voh ji uthi thi.” Yeh nishaani bhi theek paayi. Socha laao zara si der ko apni jaan us murdah bakri ke bachche mein le jaaon. Yeh bahail jaayegi  us ke baad phir apne badan mein laut aayunga. Yeh na maalum tha ke maut sar par mandla rahi hai. Kaha bachcha god se rakh do.

Malika ne bachcha zameen par dal diya. Wazirzaada palang par leta, apni rooh bakri ke bachche ke jism mein laya. Woh koodne laga. Malika ne god mein liya, pyaar kiya. Us ne to socha tha ke zara si der mein malika ka dil bahal jaayega to phir apne badan mein laut aayunga. Yeh na samjha ke maut ghat mein hai aur ab qismat ko kuch aur hi manzoor hai.

Shahzaada Jaan-e-Alam yeh sab maamla pinjre se dekh sun raha tha. Fauran apni jaan apne badan mein la uth khada huya. Voh buz-dil Jaan-e-Alam ko dekh ghabraa gaya ke qismat buri hai. Koi dam mein gala hai aur chadhi hai. Malika ne koi mantar padh ke bakri ke bakri ke bachche par phoonk diye ke voh apni jaan doosre ke badan mein le jaane ko bhool gaya.

Malika ne Anjuman Ara ko bulaya, kaha “Lo ji, Khuda ne hamaari tumhaari abru rakh li aur bichde se mila diya. Yeh tumhara ahmaq shahzaada hai aur yeh bakri ka bachcha nahi wazirzaada hai.” Teenon ki khushiyan behisaab thi. Aankhon se maare khushi ke aansu jari the. Jo saheliyan is raaz se vaaqif thi voh mubarakbaad ko daudhen. Jaan-e-Alam ne saudagar ko bula ke saari baat batayi aur bahut inaam diya. Phir chidhimaar ko bula ke maalamaal kiya aur Ghazanfar Shah ki ijazat se ise chidhimaaron ka chaudhri bana diya. Ab kooch ki taiyyari huyi Ghazanfar Shah se ijazat li aur safar ka samaan durust kar ke chal nikle.

…… Aur yeh qist yahan khatam huya, lekin qissa abhi kafi baaqi hai. Mera iraada tha ke main yahan hi agle qist ka kuch hissa de doon, lekin khayal-e-saani par yeh ehsaas huya ke yeh qist itni taveel na huyi to koi baat nahi. Is mein aapne dekha ke shahzaada ek museebat se nikal to leta hai, lekin abhi vatan lautne tak lambi raah hai aur bahut kuch ho sakta hai…… is se ziadah main khulasaa nahi karna chahta hoon….. Agle qist mein aap khud hi dekh sakenge……

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: