Fasana-e-Ajaib: Qist#36: Jadugarni se muqablaa

Ab dekhen Jaan-e-Alam aur uska lashkar is nayi museebat se nijaat paayenge? Kya buzurg waqt mein unki madad ke liye aa paayega? Kya Shahpal se muqblaa kar paayega ? Aage kya hota hai jaane ke liye yeh nahi qist par tavajju den….

~~~~ Voh buzurg yeh dastaan sun ke bade pareshna huye. Fauran shaheen par sawaar ho ke us maidan par khatr ka rukh kiya. Shaam se pehle vahan aa pahunche. Sab ko dilaasa diya aur Jaan-e-Alam se shikayat ki ke “Nadaan, tune kaha na maana. Jo kuch samjhaya tha uske khilaaf kiya. Tum yeh na karte to ham yaad-e-Khuda chorh ke apne baagh se kyun nikalta.” Malika ne arz kiya ke “Yeh waqt khafaa hone ka nahi. Is waqt jo ban padhe voh karo aur hamen is museebat se azaadi dilaao.”

Buzurg ne door tak ek ghera banaya yaani kuch duaaen padh ke zameen par dayre ki shakal mein ek lakeer khench di. Yeh lakeer kya thi ek mazboot qilaa tha jise koi paar na kar sakta tha. Is dayre ke andar jadu ka koi asar na ho sakta tha. Malika ka baap saari raat is ke andar baitha ibadat karta raha aur Khuda se duaaen mangta raha ke jadugarni ko iske haathon shikast ho.

Din niklaa to voh jadugarni phir usi tarah azhde par sawaar aayi. Pehle malika ke baap ke paas gayi aur bada bhala kaha ke “Is budhape mein teri kya shamat aayi hai ke ham se muqablaa karne chala hai. Ab bhi baaz aa ja varna jadu ke zor se tera kaam tamaam kar doongi.” Us buzurg ne jawaab diya ke “Main jeeyon aur mere azeez, mere pyaare mein na rahen to aesi zindagi se maut bhali. Haar jeet to Khuda ke haath hai. Aa tu bhi apne ji ki hasrat nikaal le.”

Jadugarni ko yeh jawaab sun ke aur bhi ghussa aaya. Fauran sherni ki surat banayi. Is buzurg ne bhi madad ke liye Sher-e-Khuda ko aawaz di aur sher ki shakal ikhtiyar ki. Donon taraf se hamle hone lage. Jadugarni dabne lagi to usne aqaab ki shakal banayi aur udhne lagi. Isne bhi khud ko baaz banaya aur uska peecha kiya. Zara si der mein mein baaz ne aqaab ki gardan daboch li. Voh bahut tadpi magar us ke panje se na chuth saki. Aakhir ko mar gayi. Iske marte hi zabardast shor utha, zameen aasman chakkar khaane lagi, zabardast aandhi aayi aur jadu ka karkhaana darham-barham ho gaya.

Shaam ke qareeb dhund chath gayi. Sab ne ek doosre ko pehchana, lashkar jadu ke panje se chutha. Sab shukriya ada karne ko is buzurg ki khidmat mein haazir huye. Dekha ka us ghere ke andar ek assi-navve ki budhi mari padhi hai. Kamar dohri ho gayi hai. Munh mein ek daant nahi. Chehra ulte tave ki tarah kaala hai, saare baal safed hai, maang mein phir bhi sindoor bhara hai. Ahle-e-lashkar ne jadugarni ki yeh durgat dekhi to Khuda ka shukr ada kiya.

Us buzurg ne farmaya ke abhi qissa tamaam nahi huya. Ek maarke aur baaqi hai. Jadugarni to mar gayi magar abhi uska baap zindah hai aur voh jadugaron ka badshah hai. Shahpal uska naam hai. Voh apni beti ka badlaa lene aayega aur qayamat machayega magar ghabraao mat, dushman taqaatvar zaroor hai magar sab se ziyadah taqaat waala voh hai jo ham sab ka rakhwala yaani Allah taala hai.

Yeh keh ke us buzurg ne maash ke do daane uske daayen baayen phainke. Do janvar ajeeb surat ke paida huye. Chehre hiran ke aur dhadh mor ka. In ke seengh yaqut ke the. Aankhen heere ki aur par zumurrud ke. Us ne do thekriyon par kuch likh ke daala. Voh inhe apni apni chonch mein le ke udh gaye.

Subah huyi to zor ki aandhi chali. Do taraf se jadugaron aur jadugarniyon ki ghol udhte huye aaye aur maidan mein apni safen jamaa li. Jaan-e-Alam ne bhi apni fauj ki safen durust kar li. Buzdilon ke dil dahlana lage, bahadur apni talwaarein tolne aur kasne lage. Anjuman Ara aur Mehr-Nigar ne bhi ek oonche takde par khema lagvaya aur us ko dekne chilmanon ke peeche aa baithe.

Ab Shahpal jadugar is aan-baan se aaya ke chalees khunkar aag-ugalne waale azhdhe us ka takht uthaye the. Nau lakh jadugar uske daayen baayen the aur peeche aisi zabardast fauj ke kisi ne roye zameen par na dekhi hogi. Shahpal ne pehle to buzurg ke paas apna ailechi bhejvaya aur use har tarah daraya-dhamkaya magar voh to himmat ka putla tha kisi tarah haar maane ko taiyyar na tha.

Aakhir jang shuru huyi, pehle dono taraf se jadugar ladhe. Donon taraf ke jadugaron ne ajeeb ajeeb tamashe dikhaye aur jadu ke gole apne apne dushman ki fauj par phainke, kabhi pathar barsaye. Jadugari khatam huyi to teer-o-talwaar argaraz-o-neze ki ladaai shuru huyi. Dono taraf se talwaaron ki bijliyan chamki, garz chale, teer barse, aisi jang huyi ke saara maidan kaanp utha. Har taraf kashton ke pashte lag gaye. Khoon ki nadiyan beh gayi.

Is jang mein Shahpal ko zabardast haar huyi aur malika ke baap ne uska sar tan se alag kar diya. Uski fauj ke sipahi jo bach rahe the unka jidhar ko munh utha bhaag kahde huye. Voh ilaaqa, uska qilaa Jaan-e-Alam ke qabze mein aaya. Use sab se ziadah talash us naqsh aur lauh ki thi jo jadugarni ne dhokhe se uda li thi. Badi talaash ke baad voh don cheezen haath aayi.

Malika ka baap ab rukhsat hona chahta tha. Usne ravana hone ke pehle Jaan-e-Alam ko bahut si naseehaten ki aur saare oonch-neech sikhaye. Raste mein jitne khatre ho sakte the un sab se aagah kiya aur kaha “Mere azeez! Ab koi aesi harkat na karna ke phir museebat ka saamna karna padhe aur hamen baagh chorhna padhe. Lo Allah tumhara nigehbaan aur uska Rasool tumhara madadgaar hai.”

Aur yeh qist – taveel zaroor rahi, magar yahan mukmaal ho gayi…….

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: