Fasana-e-Ajaib: Qist#41: Mehr-Nigar ka ahvaal

Adaab! Ab aapke zehn mein yeh sawaal hoga ke malika ka kya huya. Janaab-e-Aali, aap se ziadah mujhe fikr tha – us ka kirdar hi aisa bemisaal aur lajawaab hai. Agar is qisse ka koi mazboot zenana kirdaar hai to yeh hai. Khair, yeh baatein aur kabhi. Qisse mein takhir na ho….

~~~~ Ab Mehr-Nigar ka haal suno. Jahaaz tabah huya to yeh bhi ek takhte ke sahare yeh bhi doobti tairti chali jali thi. Saamne se kisi badshah ka jahaaz aata tha, Us ne taras khaake pansoi daudhvai. Aur iski jaan bachayi. Qareeb se to chehrah mahtab malika aftab. Badshah ji jaan se us par fida ho gaya. Hosh mein laane ki tadbeerein ki. Shahzaadi badi mushkil se hosh mein aayi, saamne ek ajnabi ko dekh ke sharmayi, sar ko jhukaa liya, aur maare sharam ke pasina pasina ho gayi. Is ne bahut poocha kaun ho, magar us ne sirf yeh hi bataya ke ham to aafat ke maare hai. Us ne duniya dekhi thi, samajh gaya koi shahzaadi hai magar museebat ki maari hai.

Ek din badshah ne Mehr-Nigar se kaha “Ab tum tanhai mein ghabrati ho. Tumhara doobna aur tairna to mahz bahana tha, Khuda ko isi tarah milaana tha, umeedvaar hoon ke mujh se shaadi kar lo.” Malika ne socha ab har tarah is ke ikhtiyar mein hoon. Yeh zabardasti kar le to main kya kar loongi magar taalne ko kaha “Mujhe ek saal ki mohlat do. Is arse mein mera koi waaris idhar aa nikla to achcha hai varna tere ikhtiyar mein hoon.” Us ne bhi socha ke doob ke kaun ubhra hai. Ek saal ki muddat kya, palak jhapakte guzar jaayegi.

Badshah ne malika ke rehne ko ek khoobsurat mahal de diya. Is mein ek khoobsurat baagh tha. Aur baagh bhi aesa bhi aesa ke jo jannat ke baagh ko sharmaata tha. Malika aksar shaam ko baagh mein tahelti aur apna gham ghalat karti. Ek shaam ko dil kuch ziyadah hi bhar aaya. Be-ikhtiyar ho ke rone lagi. Darakhton par parinde baserah lete the. Jis darakht ke neeche malika khadi thi us ki ek tehni par ek tota aa baitha. Us ne malika ko aese bilak-bilak ke rote dekha to us ka haal poocha. Malika ko aesa kaun naseeb tha jo us ki halat pooche, tote ne poocha to saari kahani keh sunayi.

Tote ne saari dastaan suni to zameen par gir ke par nochne laga. Malika hairan huyi ke aisa kya ho gaya. Ghadi bhar mein tota sambhla to us ne kaha “Ae malika Mehr-Nigar! Main vahi kambakht tota hoon jis ne Jaan-e-Alam ko Anjuman Ara ke husn ki khabar sunayi aur main hi uski barbaadi ka sabab hoon. Lekin aap pareshan na ho. Jaan-e-Alam aur Anjuman Ara dono salamat hai. Mujhe nujumiyon ne baataya hai ke sab ke muqaddar mein museebaten zaroor hai magar sab khairiyat se hai. Ek din sab mil jaayenge.”

Tota raat ki raat to malika ke paas raha, subah ko khoye huuon ki talaash mein udh chala. Udhne se pehle shahzaadi ne Jaan-e-Alam ke naam ek khat likh ke us ke bazu se bandh diya. Din bhar unki talaash mein udhta, raat ko thak har ke kisi tehni par baith jaata. Ek shaam ko ittefaq se yeh tota usi darakht par aa baitha jis par Jaan-e-Alam aur Anjumar Ara tota ki shakal banaye baithe the. Tote ko apne maalik ka khayal aaya to rone laga.

Anjuman Ara ne kaha “Dekhna yeh tota rota hai, shayad is ne bhi hamaare tarah ranj uthaye ho.” Tota insaanon ki boli samajhta tha, kehne laga “Khuda tumhe voh gham na dikhaye jo maine sahe hai. Main aesa bad-naseeb hoon ke mere sabab mere maalik ka ghar-baar chuta aur use dar-dar thokre khaani padhi.”

Jaan-e-Alam ne tafseel poochi to us ne shuru se aakhir tak saari dastaan suna di. Mehr-Nigar ki khairiyat sun ke dono baagh-baagh ho gaye aur fauran apni asli shakal mein tote ke saamne zaahir huye. Tote ne Mehr-Nigar ka khat diya. Jaan-e-Alam ne use aankhon se lagaya.

Teeno ne raat vahi basar ki. Subah hote hi Jaan-e-Alam aur Anjuman Ara ne phir tote ki shakal banayi aur manzil ki taraf udh gaye. Aage aage tota rasta batata tha, yeh dono peeche ude chale aate the.

Aur yeh qist yahan khatam…….

Advertisements

2 responses to this post.

  1. Posted by Nadeem on April 8, 2011 at 18:02

    v nice.. its not in Urdu format?

    Reply

  2. next episode?

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: