Do qadeem shayar aur unki jadeed daur mein ahmiyat

Angrezi mein ek kahavat hai “Old is Gold”, ya doosre lafzon mein, ke qadeem cheezon ki apni ek ahmiyat hai, aur unse amal lena faidemand hota hai. Afsos ke aaj ke daur mein log is khayal se hat gaaye hai, aur is khayal mein hai ke jo puraana hai woh daqiyanoosi aur bekaar hai…… Khair, jaane dijiye. Aaj aapko ek, do misaal deta hoon ke kaise do puraane shair, jinhe taqreeban log bhhol chuke hai, kaise apne kalaam ki bina par abhi zinda hai. Berhaal hame unke naam bhi nahi pata, aur na hi unka asr-o-rasokh kya tha, par ham unke kalaam ka ek naye andaaz mein lutf uthaate hai. Aap sab poochenge kaise? Aaiye, aapko batayun…. do misaal leta hoon aur unhe Hindustani filmon ki mausiqi se jorhta hoon…..

Jaise aapko pata hi hoga, Hindustani filmon ki mausiqi Urdu adab se gehra ta’aluq rakhti hai. Maane aur kuch bhoole huye shayaron ke ghazal, nazm, geet, vagahira bahut istemaal huye hai – kai baar to unke naam ke bina, jo asaan hai jab shayar itna maqbool aur jaana-maana na ho. Aap ishara to samajh gaye hoge. Berhaal, aaiye main aap ka ta’aruf karvata hoon.

Donon sarzameen-e-Awadh ke bashinde the.  Pehle miliye, Janaab Mirza Mohammad Taqi Taqi sahab se. Rustam-ul-Mulk Agha Mohammad Taqi Khan ka naam Asadullah tha, unka shumar ustazah mein hota hai. Faizabad ke rehne waale the. Mir Soz se islaah li. Saahib-e-Diwaan the. Aap fan aur fankaar ke qadrdan the. Atish aur Nasikh donon aapke ‘darbar’ mein shaamil the.

Aur doosre the, Sheikh Turab Ali Qalandar Kakorvi. Ek Sufi buzurg Mohammad Kazim Qalandar ke ghar 1768 (Isvi) mein paida huye the. Apne waalid ka asar liya aur un ke hi saaye paaye ke buzurg bane jaisa ke un ke naam se bhi zaahir hota hai. Sher khoob kehte the magar kabhi kisi se islaah na li. Pehle ‘Shaheed’ takhallus tha. Unhone apne peeche hazaaron murir chorhe. Ek khas baat ye hai ke unhone kabhi kanqah mein sher nahi kahe. December 11, 1858 mein aap intekal farma gaye.

Laazim hai aap mein se bahut ne yeh dono shakhs na naam nahi suna hoga. Magar aapne in ke kalaam ki zamin par bane naghme zaroor kabhi na kabhi sune honge. Baraye karam thoda aur intezaar kariye…. raaz khulne waala hai.

Chaliye, Ustaad Taqi se aghaz kare…. Unka ek maqbool asha’ar hai:

Duniye ke jo maze hai hargiz voh kam na honge
Charche yahin rahenge afsos ham na honge

Kuch aap ke zehn mein aaya…. Agar aap purane naghme sunne pasand karte hai, to zaroor kuch khankha hoga. Isi tarz par Shakeel Badyuni ne 1948 ki film Mela ka ek behtareen geet banaya tha, jis ke bol the:

Ye zindagi ke mele, Ye zindagi ke mele
Duniya mein kam na honge, afsos ham na honge

Gulukaar Mohammad Rafi the, aur mausiqikaar Naushad Ali, jo bhi Lakhnau ki hi the

Aaiye doosre misaal par chale…..

Sheikh sahab ka asha’ar hai:

Shahr mein apne Laila ne manadi kar di
Koi pathar se na maare mere deewane ko

Umeed hai yeh samajhna itna mushkil nahi hoga. Is asha’ar ka doosra misra to bahut jaana huya hai, shayad aapne is andaaz mein suna hoga

Husn haazir hai mohabbat ki saza paane ko
Koi patthar se na maare mere diwaane ko

Yeh jaise aap samjh hi gaye honge, un bad-qismat aashiq Layla-Qais urf Majnu ki dukh-bhaari dastaan se hai. Yeh film 1976 ki thi aur unwaan, zaahir hai, Laila-Majnu tha. Ise likha tha Sahir Ludhianvi ne, mausiqikaar Madan Mohan the aur gulukaara Lata Mangeshkar.

Ab sawaal hai ke aur likhne waale hote to koi baat na thi, lekin jahan Shakeel aur Sahir ke ohda ke shayar hai…. Donon apne quwwat-e-tassavur ke kiye mashoor hai, lekin kuch jagah woh aur shayar ke khayaal ke tarz par kalaam banaate the. Is mein kuch ghalat nahi, yeh Urdu shayri ka ek pehchane tareeqa hai…. lekin baat wohi hai ke qadeem shayar bhi apne baad ke jadeed daur mein asar rakhte hai….

Advertisements

One response to this post.

  1. Aapka mazmoon dilchasp hai aur aapne jo in anjaan se shayron ka taaruf karaaya uske liye behad shukriya.Hindi filmi mausiqee mein aisi kai misaalen maujood hain jab gaane ke bol kisi purane she’r ghazal se mutaaasir ho kar likhe gaye .Aksar Momin,Ghalib,Daag jo ki kaafi maqbool hain inke she’r se mutaasir ho kar bhi gaane likhe gaye.puraane hindi gaanon mein cassiky urdu shayri ke anaasir mil hi jaate hain

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: