Ek maqbool suragh-rasa ka ek qissa III

Maine Maghribi adab ke ek bade aur maqbool kirdaar ka ek qissa Urdu zabaan mein pesh karne ki koshish ko anjaam de raha tha. Aap thoda hi padhenge to samajh jayenge kaun hai…. ek, kya sabse maqbool aur mashoor suragh-rasa. Purane qist aap dhoondh hi sakte hai. Chaliye, silsila aage badhaye jaaye….

Wazir-e-Aazam ek dam uth khade huye, unki aankhon mein woh tez nazar jiske saamne ek pur kabina thartharaya hai. “Mujhe yeh gavara nahi, janaab…” unhone kehne shuru kiya, phir apne ghusse par qabu pa ke phir baith gaye. Ek do pal sab chup the. Phir buzurg siyasatdan ne apne kandhe jhatkaye.

“Hame aap ki sharten manzoor karni hongi, Holmes sahab. Lazim hai ke aap saheeh hai, aur yeh hamare liye ghalat hai ke ham se koi umeed rakhe jab tak ham aap par pura yaqeen na kare.” 

“Main aap se ittefaq rakhta hoon,” doosre siyasatdan ne kaha.

“Phir main aap ko batata hoon, aapke aur aapke dost, Dr Watson, ki imaan par yaqeen karke. Main aapki watan-parasti se bhi iltija karta hoon, kyunkar yeh maamla agar bahar naikal gaya to mulk ke liye is se buri bad-qismati ho nahi sakti.”

“Aap ham par bejhijjak yaqeen kar sakte hai.”

“To phir, yeh khat ek ghair-mulki hukmaran se hai, jo hamaare mulk ki kuch amal se khafa ho gaya hai. Us ne jaldbaazi aur apni hi zimmedari par hi likhi hai. Tafteesh ne yeh saabit kiya hai ke us ke waziron ka iska kuch ilm nahi hai. Lekin is betuki andaz se likhi huyi hai, aur kuch jumle aise uksane ke qaabil hai ke agar yeh shaya ho is mulk mein fasad paida kar dega. Aisi lahar uthegi, janab, ke mujhe pakka yaqeen hai ke ek hafte ke darmiyan yeh mulk ek jang mein phansa hoga.”

Holmes ne kagaz ke tukde par ek naam likh ke Wazir-e-Aazam ko dikhaya.

“Bilkul. Yehi shakhs hai. Aur yehi khat – yeh khat jis par crore aur arab ki kharch aur lakhon aadmi ke zindagi sawaar hai – is ajab tareeqe mein lapata ho gayi.”

“Aap ne likhne waale ko itlaa kiya?”

“Ji, janaab, ek khufiya telegram bhej di gayi hai.”

“Shayad, woh khat shaya dekna chahta hai.”

“Nahi, janaab, hame yaqeen hai ke use ahsaas ho chuke hai ke voh ek josh-bahare aur sarkash andaaz mein pesh aaya hai. Iska nuqsaan use aur uske mulk ko ziadah hoga.”

“Agar aisa hai, to phir yeh kis ke faide mein hai ke khat shaya ho? Phir koi ise churana ya shaya karna kyun chahe?”

“Yahan, Holmes sahab, aap mujhe bainulawami rishton ke jhamele mein le jaaate hai. Lekin aap agar Europe ka surat-e-haal par gaur karen, aap ko iraada samajhne mein dikkat nahi hogi. Pura Europe ek hatyar-band khema hai. Do firqe hai jo fauji qabiliyat ko tawaazun rakhe huye haiBritannia taraazu liye khada hai. Agar Britannia ko ek firqe se jang mein dhakel diya jaaye, to doosra firqa waise hi jeet jayega, chahe woh jang mein shaamil ho ya na ho. Aap samjhe?

“Bilkul. Phir yeh is hukmaran ke faideh mein hai yeh khat haasil karke shaya kare ke us ke aur hamaare mulk mein daraar paida ho?”

“Ji, janaab.”

“To agar yeh khat dushman ke haath mein padh gaya to kahan bheja jayega?”

“Europe ke kisi bhi bade dar-ul-hukumat ko. Ho sakta hai ke is waqt bhi woh aise koi raah mein ho.”

Trelawney Hope ka sar seene pe gira aur unhone zor se aahein bhari. Wazir-e-Aazam ne uske kandhe pe haath rakha.

“Yeh aapki bad-qismati thi, janaab. Koi aapko zimmedar nahi thehra raha. Aisi koi baat nahi thi jo aapne nazar-andaaz ki ho. Ab, Holmes sahab, aap sara qissa jaan gaye hai. Aapki kya raae hai?”

“Aapka maan na hai ke yeh khat na mila to jang chirh jaayegi?”

“Main maanta hoon ke bahut mumkin hai.”

“To jaanab, jang ki taiyyari kijiye.”

Jaari rahega……

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: