Nawaz Deobandi ki chaar ghazlen…kuch paigham ke saath

Ek taveel arrse se maine yahan kuch sher-o-shayari par aap ke nazar kuch nahi rakha, jab ke aisa karna is muhim ka ek ahm maqsad tha. Jo bhi majbooriyan thi main unhe aap ke saamne rakhna theek na samajhta hoon… sirf mazraat ki hi iltija kar sakta hoon.

Berhaal, ab se, Insh’Allah, meri yeh hi koshish hogi ke aindaah aap sab ko shikayat ka mauqa na pesh ho.

Khair ab mudde pe aaye…. Pichle kuch dinon meri zehn mein ek awaaz gunj rahi thi, ek khaaskar buland awaaz jo zindagi ke mukhtalif aur pechida jazbaaton aur kashmakashon ko bemisaal lafzaat mein jodne mein maahir hai…. yeh awaaz hai Janaab Doctor Nawaz Deobandi ki, jin ka ta’aruf aap kai martaba yahan kar chuke honge…..

To lijiye, izzat-maab khwatin-o-hazrat, aapke liye Nawaz sahab ki kuch ghazlen… Mumkin hai, aap mein se kai inko pehle se jaante honge ya tahi dekhi hongi, lekin tab hi shayad jab aap is baar in he padhe, to aapko tab hi itna hi lutf aayega jab aap ne pehle padha ya suna ho.

Aur jinke ke liye yeh Doctor sahab se pehli mulaqaat hai, to in se achcha kya ta’aruf ho sakta hai….. Ek baat aur, isi chahen nasihat maane, chahen mashvara, lekin aap jaise in he padhen, ho sake to apne liye hi inhe tarannum mein padhne ki koshish kare….. Isi mein inka jaado hai! Afsos, main is andaaz mein pesh nahi kar sakta hoon aur aapko khud hi tassavur karna padhega….

Chaliye, pehli ghazal aap ke nazar hai. Choti behr ki ghazal hai, lekin bade mudde cherhti hai…..  Khair, aap khud hi dekhen.

Jo safar ikhtiyar karte hai
Voh hi darya ko paar karte hai

Sach to yeh hai ke khud musafir ka
Raaste intezaar karte hai

Un se bichde to phir huya mahsoos
Voh hamen kitna pyaar karte hai

Ham to apnon se kha gaye dhokha
Aap ko hoshiyar karte hai

Jhoothe vaadeh kiya na kar ham se
Ham tera aitbaar karte hai

Ham to us dil Nawaz dushman ko
Doston mein shumaar karte hai

Ek aur dekhiye…… aakhri sher par tawajju chahunga.

Jashn-e-gham-hayat manane nahi diya
Is muflisi ne zahar bhi khaane nahi diya

Ham ne jo sada lohi mein khaya koi fareb
Phir voh fareb auron ko khaane nahi diya

Aandhi ne roshni ki himayat to ki bahut
Lekin koi chiraagh jalaane nahi diya

Ek adh ghar to jal gaya par shahr bach gaya
Ab ke diye ka saath hawaa ne nahi diya

Raazi tha main bhi aur mera dushman bhi sulah par
Kuch doston ne haath milaane nahi diya

Aur yeh bhi dekhiye….

Maani na aql ki dil-e-nadaan ke saamne
Ek ghar bana liya dar-e-janaan ke saamne

Voh sirf rahzaanon hi pe ilzaam kyon rakhe
Jo lut gaya ho apne nigehbaan ke saamne

To mubtala ho ishq mein to phir pata chale
Khushiyan haqeer hai gham-e-janaan ke saamne

Rehne ko ghar na khaane ko roti na koi dost
Itni bhi mushkilen na ho insaan ke saamne

Faqa kashi mein khush hoon magar itna to de mujhe
Sharmindgi na ho kisi mehmaan ke saamne

Aur aakhir mein, jiska matla hi khudi ka ek naara hai….. aur phir aakhri do sher par aapki khaas tawajju ki iltija karunga.

Yeh baar-e-falak ham ne zameen par nahi rakha
Thak kar kisi kandhe pe kabhi sar nahi rakha

Is ne bhi hawaaon ke abhi rukh nahi badle
Main ne bhi chiraaghon ko bujha kar nahi rakha

Main ne bhi ise khar se tasbeeh nahi di
Is ne bhi mera naam gul-e-tarr nahi rakha

Kyun thokre lagti hai ke jab ham ne kabhi bhi
Raaste mein kisi ke koi patthar nahi rakha

Tareekh se vaaqif hai jo, bete ka inhone
Rakha hai Ali naam, Sikandar nahi rakha

Advertisements

9 responses to this post.

  1. hi,
    frnd
    i am capture some videos of dr nawaaz deobandi , republic day mushaira 2012, if you want see go to youtube and search rocketalkmedia

    i read many times your collection , keep it up
    thanx

    Reply

  2. Posted by Shaikh sameer. on February 10, 2012 at 05:00

    Nice bro.
    Mujhe bahot dino se nawaz sahab ki yeh gazal (jashne game hayat ) chahiye thi. Thanx

    Reply

  3. Posted by Vinod Kumar Gaur on July 28, 2013 at 13:05

    Vo mere aziz dost aur ek achhe adami hai jo honaa aaj kal jayada kadin hai

    Reply

  4. Posted by shaikh shaima on September 21, 2013 at 03:05

    very nice………….me nawaz diobandi ki bht badi fan hu…..

    Reply

  5. Hi Nawaz Sahab,
    Me apka bahot bda tarifedar hu.. me bi ghajale likha krta hu, kuch samay bad publish krauga..sch kahu to muje prerna ap se hi mili.. ap ghajalo ke Ali ho..

    Reply

  6. bahot khoob nawaz bhai i am also poet

    Reply

  7. Posted by riyaz on October 19, 2013 at 17:24

    wah wah wah Nawaz sahab ki kya hi khoob ghazlein apne pesh ki hain, mujhe bahot achhi lagin.

    shukriya

    Reply

  8. dr. sahab assalamu alaikum mujhe aap ko zehmat deni hai aap ki ik dua hai? ye, tu rahim hai karim hai teri shaan jalleh jalalahu? ye dua net pe daal do mujhe bhut pasand hai plz?

    Reply

  9. Posted by osmani fawad osmani on November 28, 2013 at 12:23

    dr nawaz sahab hind k shayero me apna bahut uncha muqam rakhte hain, is zamana me mir taqi mir aur fikr aur nasihat karne me dr allama iqbal ka jaese muqam rakhte hain

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: