2011 ko alvida….. Sahir ke ek asha’ar ke saath

2011 ek pechida saal tha aur iske khatam hone to mujhe to koi khaas dukh nahi hai…..

Khair is saal ki kuch khubiyan be thi, ur danishmandi isi mein hai ke in ka bhi shumar kiya jaaye.

Pehle to sab se badi baat thi ke mujhe kitaabein khareedne ka ek naya, umda aur kifayati zariye mil gaya. Aur isi ki jaanib se mujhe kafi aise nayaab kitabein jinki mujhe saalon se talaash thi, aakhir dastyaab huyi. Daryaft abhi jari hai…

Phir is saal mein mujhe fakhr hai ke main ne ilm haasil karne ka koi mauqa nahi chodha. Yeh bhi saheeh hai ke kaafi kuch rah gaaya, lekin abhi zindagi hai. Jaan hai, to jahan hai, ek falsafi ne kaha tha aur main apne apne hisaab se is naimat ka pura faiyda uthaonga.

Doosri ore, hisaab mein kuch ghaate bhi hai…..

Zaati maamalat mein vo hi daur bana raha jo pichle do-ek saalon se hai. Vo hi vada-khilaafi, vo hi khudgarzi, vo hi nazar-andaazi ,vo hi jalsaazi, daghebaazi aur … maaf kijiyega aise alfaaz istemaal karne pad rahe hai lekin main majboor hoon. Khair jaane dijiye, aaj se saalon pehle, Chacha Ghalib ne bhi famaya tha

Hamen unse hai wafa ki umeed
Jo nahi jaante wafa kya hai…..

Darasal, yeh meri hi ghalti hai ke maine in sab ko mauqa diya. Jaise maine aapne 2012 ke iraadon mein likha hai, un sab taaluqaat jis mein dono janib se amad-o-raft nahi hai, unhe jaari rakhna koi daanishmandi nahi hai. Berhaal, dekhiye waqt ki gardish kya manzar pesh karti hai. Meri to yehi darkhvast aur iltija rahegi ke sab aise maamle hikmat-amli aur khush-aklaaqi se sulajh jaaye.

Ek muktsar andaaz mein is sab ko Sahir ka ek qimte asha’ar se zaahir kiya ja sakta hai, jaise maine unwaan mein likha hai. Yeh unhe ne ek mashoor film ke liye tha, lekin jazbaat ka aap qadr kare. Yeh ek ghazal ka sher hai, main aapko suna deta hoon:

Bichadh gaya har saathi dekar
Pal do pal ka saath,
Kisko fursat hai jo thame deewanon ka haath
Ham ko apna saaya tak aksar bezaar mila
Ham to jab……

Khair jaane dijiye…. Haan is mauqe par do na azeem shaksiyat ka naam zaroori lene chahta hoon, jo is rujhan se door rahe aur apni qabiliyat se puri himayat ki, khaaskar us waqt jab main maayus aur baybas tha. Yeh the Ustaad aur mere sabse qareebi aur puraane dost, jinka ism-e-sharif ka aaghaz noon se hai. Aur bhi puraane dost – bhai – the, jinki main shumar aapne moshinon mein karna chahoonga. Aap sab ka teh dil se shukr-guzaar hoon, aur dua karunga ke Khuda aapko har khushi se nawaaze….

Umeed hai, Mushkil-kusha ki naimat se, 2012 behtar hoga. Mere andar kuch khaas tabadle nahi hoga, aur main vo hi shakhs rahunga, jo ek aapke ek qadaam pe das..sau kadam lene ko taiyyar rahunga par ek kadam to len……

2012 aap sab izzat-maab khwatin-o-hazraat ke liye khushgavar beete….. Khuda aapko har bala se mahfuz rakhe aur khushaal rakhe. Abhi ke liye Da Khudaye pa aman

Advertisements

One response to this post.

  1. NICE URDU BLOG IN ROMAN SCRIPT! AND POST TOO GOOD!

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: