Sarzameen-e-Lakhnau ko Shakeel ki ek aur khidmat……

Is mein koi shak nahi ke Shakeel Ahmed Shakeel Badayuni ek kamaal ke shayar the.  Unke kalam ke saath jab judta the ustad mausiqikar Naushad sahab ke tarane aur aawaz hoti thi Rafi ki, to lafz lajawaab bhi ise bayan karne mein kamzor saabit hota hai.

Khair yahan par mujhe Shakeel ke ek aur pahlu par main aap sab ki tavajju chahunga – unki sarzameen-e-Lakhnau ko khidmat……

Aap aise samjhiye ke kayi Hindustani filmon mein ek naghma raha hai jo us jagah ke baare mein hota hai jahan qissa chal raha hota hai aur uski tareef karta  hai. Aap khud khayal kijiye to aapko kuch misaal yaad aayenge…. Maslan, Kashmir ki khub tareef huyi hai jab ummolan har film mein uske manzar dikhaye jaate the.

Kuch shahr ko bhi yeh qismat haasil huyi hai….. magar jahan tak mujhe ilm hai aise sirf teen ya char hai. Zaahir hai Bombay to ek hoga, aur ek naghma mujhe Kalkatta par bhi sunne na mauqa mila. Mujhe bataya gaya hai ke is ahd mein bhi kayi naghme hai jin mein aur shahron – jaise Dehli – ya jagahon ka zikr hai ekin mujhe unka ilm nahi hai. Yahan par main yeh bhi bataun ke yeh aise naghme hone chahiye jinhe shahr ka bayan ho, mahz sirf zikr kaafi nahi hai.

Meri is tartib mein teesra shahr hai Lakhnau aur ek nahi do qaseede is par nisaar hai, aur dono Shakeel sahab ke kalam se hai…..

Pehle to shayad aapne zaroor suna hoga. Yeh film Chaudhvin ka Chaand ke aaghaz mein aapko milega….. aur ittefaqa aaj kuch do-dhaai sal pehle jab maine is muhim ko bismillah kiya, to mere pehli post yehi bemisaal naghme se huyi thi jo Lakhnau ki tehzeeb, adab, nafasat aur nazakat ko ek yaadgar dhun aur awaaz mein samet kar aapke saamne pesh karti hai……

Yeh Lakhnau ki sarzameen
Yeh Lakhnau ki sarzameen
Yeh rang-rup ka chaman
Yeh husn-o-ishq ka watan

Baqi aap chahen to aapko yahan milega.

https://vahshatedil.wordpress.com/2009/10/07/shakeel-badayunis-paean-to-lucknow/

Khair jaise main upar bayan kar chuka hoon, Shakeel ne Lakhnau ki liye ek aur naghma bhi likha, magar yeh itna mashoor nahi. Mujhe bhi haali mein yeh ittefaqan mila aur khayal hua ke aap ke saamne laya jaye.

Yeh 1967 ki film “Palki” se hai, aur film ke aaghaz mein hi aata hai. Film ke kirdar hai Rajender Kumar, Waheeda Rehman sahiba aur Rehman sahab.  Mausiqikar Naushad aur awaaz Rafi ki hi. Berhaal aap naghme ka lutf uthayen…..

Ae shahr-e-Lakhnau tujhe mera salaam hai
Ae shahr-e-Lakhnau tujhe mera salaam hai
Tera hi naam doosra jannat ka naam hai

Ae shahr-e-Lakhnau tujhe mera salaam hai…

Mere liye bahar bhi tu, gul-badan bhi tu
Parwana aur shamaa bhi tu, anjuman bhi tu
Zulfon ki tarah mehki huyi teri shaam hai
Ae shahr-e-Lakhnau tujhe mera salaam hai…

Kaisa nikhar tujh mein hai, kya kya hai bankpan
Ghazlen gali-gali hai, to naghme chaman-chaman
Shayar ke dil se puch kya tera maqaam hai
Ae shahr-e-Lakhnau tujhe mera salaam hai…

Tu voh hai log shahr-e-sitara kahe jise
Firduas-e-husn-e-rang-e-bahaara kahe jise
Tere har ek ada mein wafa ka paiyam hai
Ae shahr-e-Lakhnau tujhe mera salaam hai…

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: