Kuch asha’ar ek hi harf se #1: Pe

Yeh bait-baazi nahi hai, lekin ek mera naya ijad hai jis mein main aapko ek harf se shuru hone waale kuch mukhtalif asha’ar pesh karunga. Koshish is mein yeh rahegi ke aisa shairon ke kalam pesh karunga jo kisi hisaab se kam qaabil nahi the, magar vaqt ki gardish mein aam logon ki  yaadash se bahar ho gaye hai. Afsos! Magar in hi ke saath kuch jaane-pehchane naam bhi aapko milne lazmi hai.

Berhal yeh to meri baat thi… aur ise se to aap sunte hi rahenge. Yeh daur ka aghaz  hoga Janaab Mohammad Abdul Hai Bekhud Badauni se,
 jo ek shikayat pesh kar rahe…..

Parivashon ko sunate hai qissa-e-khvan, Bekhud
Hamara haal na thehra koi fasaana huya

Syed Fazlul Hasan Hasrat Mohani mere bahut pasandida hai, aur mehfil mein in ke bina rang kahan aayega….

Pariyon se mujhe bhi vahi goya hai ta’aluq
Hasrat, jo kisi ko jaan se naseeb

Shameem (Shayad, Shamim Karhani – mazraat chahunga, samaen, is shayar ki shanakht sahi se nahi ho paayi lekin sher ka lutf lene mein koi rok nahi)

Phool banne ki tamanna har kali ke dil mein hai
Fasl-e-gul hai muntazir, gulshan mein kab aate hai aap

Ab Hakeem Qamees Ahmad Quddusi Kaif Gangohi

Puchna yun barhami se majrae dard-o-gham
Puch lete kash ham se tarz istfaham aap

Dabistan-e-Lakhnau ke ek alambardar, Janaab Mir Vazir Ali Saba Lakhnavi

Paas-e-hamsaaye hai, chup hoon jo shab furqat mein
Jaaon dil khol ke rone ko kahan aaj ki raat

Badshah Bahadur Shah Zafar …..

Poocho Zafar! Tabeeb se apni davaye dard
Par us ko is marz ki ho kuch to shanakht

Hafiz Jaleel Hasan Jaleel Lahnavi ek bahana pesh karte huye, kuch naye andaaz mein.

Peene se kar chuka tha main tauba magar Jaleel
Badal ka rang dekh ke niyat badal gayi

Zahid Hussein Waseem Barelvi ko kaun nahi jaanta hai. Bahut qimti baat ko unhone is asha’ar mein kahi hai…..

Phool khud apne husn mein gum rahe, is ko kab chahne ki fursat hai
Aao kaanton se dosti kar len jinko hamdardi ki zaroorat hai

Dabistan-e-Lakhnau ke ek aur khaas numainde, Nawab Jafar Ali Khan Asr Lakhnavi

Phool dooba huya gulab mein tha
Uff voh chehra hijaab aaludah

Laadli Lal Laiq, maqaam Etawah, ek ghaur karne waali baat aapke saamne laate huye

Peeyo pilao voh hubb-e-vatan ki maiy Laiq
Nazar na aaye zamaane ko koi begaana

Moradabad ke ‘Jigar’, Ali Sikandar Jigar Moradabadi

Pee ke ek jaam voh jalwe nazar aaye mujh ko
Dekhte hoon kabhi maiy ko, kabhi maikhaane ko

Aur unke baad, Hakeem Abdullah Ahd Ahd Mirzapuri

Parde mein raha jalwahe rukhsar hameshaa
Jaan leti rahi hasrat-e-deedar hameshaa

Lakhnau ke ek aur shair, Janaab Nawab Syed Mohammad Khan Rind

Pata laga tera but-khaane mein na kaabe mein
Phire talaash mein teri kahan kahan se

Ek aur bahut qaabil shair jo aam zehn se bahar hai, lekin meri puri koshish rahegi ke unhe aur unke kalaam ko ziadah se ziadah aapke saamne laaon. Yeh hai Lala Madhur Ram Jauhar

Pehlu se dil ko le ke voh kehte hain naaz se
Kya aayenge ghar mein aap hi jab mezban na ho

Takhallus hi kaafi hone chahiye qabiliyat ka jaiza karne ke liye…. Sheikh Amirullah Tasleem Lakhnavi

Partau-e-husn tera chaahe to hun
Mehr-e-taban, gul, aaina-o-shamaa

Guzre huye zamaane mein Lakhnau ke dabistan ke ek aur khaas shakhs, Sheikh Qalandar Baksh Jurrat

Poocha ke kyun tum aate ho ji, kaam kya hai yaan
Muddat mein us ne ham se kiya ye kalaam aaj

Mere ek aur pasandida shair aur yahan aksar dihkne waale Hakim Momin Khan Momin apne kalaam ka asar bayaan karte huye….

Padhta hai kahin ghazal jo Momin
Lag uthti hai ek baar aatish

Sheikh Vali Mohammad Nazeer Akbarabadi

Phirte hai us jabeen ki tamanna mein mah-jabeen
Aur rukh ke muntazir mein kai aftab rukh

Aur akhir mein ek baar phir Saba Lakhnavi….. kuch maayusi ke alaam mein. Inke jazbaaton ki main bhi qadr karta hoon…..

Pehlu mein yaar, haath mein jaam sharab ho
Itna bhi aasman ko nahi hai samaa pasand

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: