Kuch asha’ar ek hi harf se #3: Noon

Aur is ijad ka teesre qist aap sab ke saamne…. is baar harf ‘noon’ se, ek khaas shakhs ke ehteram main….. Is main mein aapko kuch jaane-maane shayar bhi milenge, magar is se yeh bilkul na samajhiyega ke teesre qadam lete hi mera iraada badal gaya. Baat sirf yeh ke aisa harf hai is se shuru hone waale kuch asha’ar ko nazar-andaaz karna daanish-mandi nahi hoti.

Misaal ke taur par Mir Taqi Mir ka yeh asha’ar len…. ek aisi behtareen ghazal se jo shayad pehli thi jo mere zehn main aayi…. aur itne saalon baad ab bhi hai hai….

Naahaq ham majbooron par tohmat hai mukhtaari ki
Chahte han so aap kare hai, hamko abas badnaam kiya

Aur phir Mirza Asadullah Khan Ghalib ke is asha’ar ko kaise chorha jaa sakta hai…

Nikalna khuld se Adam ka sunte aaye the lekin
Bade beabru hokar tere kuche se ham nikle

Isi silsile mein Hakim Momin Khan Momin ki ek behtareen ghazal se ek behtareen asha’ar

Na tab hijr mein hai, na aram vasl mein
Kambakht dil ko chain nahi kisi tarah

Ab Pandit Anand Narain Mulla Mulla Lakhnavi

Na jaane kitni shamaaen gul huyi kitne bujhe taare
Tab ek khursheed itraata huya balaye baam aaya

Ameer Hussain Khan, Raja Mahmoodabad Sehar ki ek umda peshkash

Nibaah karne ki dekho tumhaare haath hai sharm
Ke aankh Sehar ne tum se lagayi hai sahaab

Mir Mehdi Majrooh se to aapki pehle khi mulaqat ko chuki hai

Nahi jaata hai pher qismat ka
Aake yaan phir gaye voh ghar ko palat

Teen Dabistan-e-Lakhnau ke numainde……

Syed Saadat Hussain urf Agha Hajju Sharf Lakhnavi

Na lenge saath koi shae aadam ki manzil mein
Khuda ki raah mein zaad-e-safar se kya matlab

aur

Qazi Mohammad Zaheeruddin Zaheer Lakhnavi

Na aana tha gar, aaye kyun khwaab mein
Magar sote fitne jagaate hai aap

aur

Munshi Ahmad Khan Ahmad Lakhnavi

Na bhool maut ko Ahmad ek aan bhi dil se
Na kar hayat do rozah par ikhtiyar ghamand

Apne zamaane ke ek aur namvar shayar, Janaab Aashiq Hussain Seemab Akbarabadi

Na kar khulus badhane ki fikr ae Seemab
Bahut kharab hai anjaam-e-intehaye khulus

Dabistan-e-Lakhnau ke ek aur alam-bardar, Janab Insh’aAllah Khan Insha Lakhnavi aur unki ek mashoor ghazal se bait-ul-ghazal

Na cherh ae nikhat baad bahri raah lag apni
Tujhe athkeliyan sujhi hai ham bezar baithe hai

Kuch isi tarz par Syed Fazlul Hasan Hasrat Mohani ka ek asha’ar

Na chherh ae ham-nasheen kaifiyat-e-saba ke afsaane
Sharaab-e-bekhudi ke mujh ko saagar yaad aate hai

Syed Mohammad Akhtar Akhtar Lakhnavi apni rihaish par

Naam Akhtar hai raha karte hai balaye falak
Is se badh kar chahte kya rifaat-e-kashaana ham

Apni zindagi main uske paas bhi na aane ke bawajood, Munshi Syed Riazuddin Riaz Khairabadi ne sharab ke baare mein khub likha hai. Yeh dekhiye….

Nazar bachaye, baaghl mein dabaye sheeshae maiy
Kahi Riaz bhi peene pilaane jaate hain

Hakim Abdullah Ahd Ahd Mirzapuri ek puurane marz par

Naaz-o-ada se mujh ko dikha kar bahar-e-husn
Tarsayega to ae buut ayyar kab talak

Aur ek doosre Jauhar, jo siyasat mein zaroor masroof rehte the, lekin shayri ka bhi hunr rakha: Maulana Mohammad Ali Jauhar Rampuri

Naseeb dikhaye hota hai kab tera deedar
Az dil se hai tere milne ki arzoo mujh ko

Dabistan-e-Lakhnau ke ek aur wazni shayar Khwaja Haidar Ali Atish Lakhnavi iska mukhtalif andaaz pesh karte

Naqaab! Ik din ulat kar tum ne yeh munh se na farmaya
Jamaal-e-aftaab-e-zarrah parvar dekhte jaao

Sir Syed Allama Sheikh Mohmmad Iqbal Iqbal maikhane ka naya manzar pesh karte….

Nasha pila ke giraana to sab ko aata hai
Maza to jab hai ke girton ko thaam le Saqi

Aur aakhir mein apne ahd ke ek ustaad shayar: Syed Ali Mohammad Shad Azimabadi ek bahut khoobsurat baat karte huye

Na kyunkar milk apni Shad main samjhun do alam ko
Zeh qismat sabhi kuch yaar ka hai, yaar mera hai

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: