Kuch asha’ar ek hi harf se #4: Meem

Is muhim ki ek nayi qist aapke saamne hai…. Is ke liye ek aur khaas harf hai -‘meem’ – jo phir kisi khaas wajah se chuna gaya hai. Is par itna hi kehna kaafi hai, lekin kuch ishara aapko shayad kuch asha’aron se mile……

Berhaal, aghaz phir ek ustaad shayar – shayron ke shahenshah Mir Taqi Mir se kiya jaye, unki ek mashoor ghazal ka maqta ki soorat mein……

Mir ke din-o-mazhab ko tum puchte ho kya un ne to
Qashqa khainche dair mein baithe kab ka tark islaam kiya

Harf me madde-nazar Hakim Momin Khan Momin ki maujudgi to lazim thi… Aur ek nahi, do behtareen sher. Iraada saaf hai……

Momin na sahi bosa-pa sajdah hi karenge
Voh but hai jo auron ka to apna bhi khuda hai

aur yeh….

Mitti na di mazar talak aake, us par bhi
Kehte hai log ‘Khaak mein use ne mila diya’

Nawab Mirza Dagh Dehlvi ka ek bahut umda bayan.. main yeh jazbaat ko achhi tarah samajh sakta hoon…

Main bhi hairan huya ae Dagh ke yeh kya baat hai
Vaada voh karte hai, aata hai tabassum mujhko

Hafeez Jaleel Hasan Jaleel Lakhnavi sahab….

Maikade se jo nikala meri tauba ne Jaleel
Muddaton sheesha-o-saaghir ne mujhe yaad kiya

Ilahi Baksh Maroof Dehlvi apni zinda-dili ka izhaar karte huye

Mujhe is daur mein Maroof agar deta falak fursat
To maiy se sheesha khaali har ek maiy-khwaar ka bharta

Dr Fazl Ilahi Makhmoor Dehlvi se aasmani khayalat

Makhmoor kyun na badah-e-irfaan se mast ho
Us ko naseeb nisbat-e-peer-mughan hai ab

Qazi Mohammad Zaheeruddin Zaheer Lakhnavi is dabistan ke mukhtalif andaaz mein…

Majboor na hote jo tabiyat se Zaheer! Aah
Ghar ghair ke kyun dekhne jaate teri surat

Hakeem Qamees Ahmad Quddusi Kaif Gangohvi

Meri deewangi ki karta hai tadbeer abas
Charah-gar dalta hai paaon mein zanjeer abas

Apni masnavion ke liye bahut mashur the, lekin Nawab Tassaduq Hussein Mirza Shauq Lakhnavi ek achche shayar bhi the

Moosa! Voh Koh-e-Toor ki mashoor baat hai
Is dil mein us jamaal ki tasveer zaroor khainch

Maulvi Syed Tahir Ali Tahir Farukkhabadi

Manind shamaa, hijr mein ae Tahir-e-hazeen
Thamte nahi hai raat bhar aansu kisi tarah

Dabistan-e-Lakhnau ke alam-bardar, Ghulam Hamdani Mushafi ka ek bayan jis se bhi main ittefaq rakhta hoon

Mushafi ham to samjhe the ke hoga koi zakhm
Tere dil mein to bahut kaam rafu ka niklaa

Mir Mehdi Majrooh se to aap pehle se vaaqif hai

Majrooh! Aaj to hai shab-e-vasl-mah ro
Keh do ke koi jaldi se aakar bujhaye shamaa

Aur ek doosre Majrooh, jinhone Hindustani filmon mein apna ahm naam banaya, Asrar-ul-Haq Khan Majrooh Sultanpuri

Majrooh! Likh rahe hai voh ahl-e-vafa ka naam
Ham bhi khade huye hai gunahgaar ki tarah

Ali Sikandar Jigar Moradabadi ka ek aur behtareen sher….

Mohabbat mein Jigar guzre hain aise bhi maqam aksar
Ke khud lena padha hai apne dil se inteqaam aksar

Aftab-ud-Daula Qalq Lakhnavi

Maashuq-e-saadah ro ki hai muddat se justju
Bagh-e-jahan mein hai gul-e-bekhar ki talaash

Sheikh Vali Mohammad Nazeer Akbarabadi

Mar kar bhi tha khaak na asudah huye aah!
Ae ishq na the ham tere anjaam se vaaqif

Syed Abul Hasan Natiq Gulaothi

Milti nahi murad to natiq khayal chorh
Meri salah yeh hai ke tu tooth jaana maang

Qazi Riyasat Hussain Fikr Bijnori ka ek ahm mashvara

 Maut ke alam mein dekho tum kisi bimaar ko
Tum ko aa jayega jeene ka saliqa logo

Sheikh Qayyamuddin Qaim Chandpuri

Maiy ki tauba ko to muddat huyi Qaim lekin
Be-talab ab bhi jo mil jaaye to inkaar nahi

Ek bahut badhiya khayal, Sikandar Ali Vajd ke jaanib se

Maut kitni hi shandaar sahi
Zindagi ka magar jawaab nahi

Ghulam Mustafa Khan Yakrang Dehlvi

Mohabbat ka ajab Yakrang hai rang
Kabhi aashiq kabhi mashooq hai ham

Aur dekhiye ek hi takhallus ke teen shayar, adab aur tehzeeb ke teen markaz se

Dr Mohammad Hussain Maeel Hyderabadi

Maeel! Hamen to raat kahin rah ke kaatni
Masjid mein ja padhenge jo maikhaana band hai

Mirza Abd-al Taqi Beg Maeel Dehlvi

Maeel ba-vafa se koi aaj bichhad gaya
Shab ko bahut maze mein the, din ko yeh haye-haye kyun

Syed Irtiza Hussain Mael Lakhnavi

Maut ka to ilaaj hai Maeel
Zindagi ki dava nahi maloom

Aur aakhir mein Faiz Ahmed Faiz ki ek khas ghazal ka maqta

Maqaam Faiz! Koi rah mein jacha hi nahi
Jo kuye yaar se nikle to suye daar chale

Advertisements

One response to this post.

  1. Posted by shaker on November 22, 2013 at 17:42

    good

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: