Kuch yaadgar asha’ar ke bhule huye shayar

Urdu adab ki tareekh mein aapko bahut aise shayar milenge jo shayad khud itne jaane pehchane nahi hai jitne unke chand ghazal ya sher – ya sirf us ka ek misra – hai. Aap is se samjhiye ke bahut logo se main ne pucha ke voh Hasrat Mohani se vaqif hai. Amoolan sab ka jawab tha “nahi”. Lekin maine jab pucha ke unhone ghazal jis ka pehle misra hai “Chupke chupke raat din…” ko suna hai, in sab khwatin-o-hazraat ka jawaab “haan” hi tha.

Darasal, kuch shayron ka to yeh haal hai ke unka ek hi asha’ar logon ko itna pasand aaya – itna maqbool bana, ya koi aise andaz mein pesh huya hai ke barson baad bhi voh logon ki zehn mein tazaa hai….. chahe shayar ka naam voh bhul gaye ho ya jaante bhi na ho…… Is daleel ke saboot mein main kuch aise asha’ar pesh karunga jis se aap ko kuch hairat hogi…. aur phir aap un benaam, bhoole huye logon ke liye kam se ek pal to sochenge jinke lafz hamare dilon, dimagh mein hai…..

Is mein main doosri tartib ka sahara loonga…. Pehle sher aur phir uska shayar. Apki ijazat se aghaz karta hoon….

Sholaa bhadak utha mere is dil ke daagh se
Aakhir ko aag lag gayi ghar ke chiraagh se

Shayar the Pandit Mahtab Rai Taban. Mushi Debi Prasad ke tazkire “Asaril-shayarae hanood” ke hawale se pata chalta hai ke Panditji ne barah baras ki umr par Mir Dard ke ek mushaire par yeh sher padha tha

Shikast-o-fateh miyan ittefaq hai lekin
Muqabla to dil-e-natvan ne khub kiya

Nawab Mohammad Yar Khan Ameer Tandvi. Rampur ke raa’es the aur Nawab ke chote bhai. Achhe shayar the aur us zamane ke jaise Qaim Chandpuri, Fadvi aur Mushafi inke darkar se judhe the.

Chal saath ke hasrat dil marhoom se nikle
Aashiq ka janazah hai zara dhoom se nikle

Mirza Mohmmad Ali Fadvi urf Mirza Bhajju Shahjahanabad ke the, aur Badshah Ahmad Shah ke vaaqiya nigaar-the. Bad mein Azimabaad jaa ke bas gaye. Rasikh Azimabadi unke shagirdon mein the. 1790 ko inteqal kar gaye.

Ghazala tum to vaaqif ho kao Majnu ke marne ki
Deewana mar gaya aakhir ko veerane pe kya guzri

Raja Ram Narayan Mauzun Mauza Kishenpur, Sahasram (Bihar) ke rehne waale the. Azimabad ke subedar ki haisiyat se ziadah maqbool huye. Khud mukhtar raja bhi huye. Kai jange bhi ladhi. Mauzun Urdu aur Farsi ke shayar the. Sahib-e-saif-o-qalam the. Sheikh Ali Hazeeen ke shagird the.
1773-74 mein inka qatl kar diya gaya

Ab is par mein aapka khas tawajju chahunga….

Shehr mein apne Laila ke manadi kar di
Koi pathar se na maare deewane ko

Yeh koi film se nahi hai, lekin ek kalam Sheikh Turab Ali Qalandar Turab Kakorvi ka hai. Ek Sufi buzurg, Mohammad Ali Kazim Qalandar 1768 mein paida huye the. Apne validain ka asr liya aur aur un ke hi zer-e-saaya paaya ke buzurg bane jaise ke un ke naam se bhi zaahir hota hai. Sher khob kehte the magar kisi se islah nahi li. Apne peeche hazaaron mureed chorhe.

Tere ishq ke jab se paale padhe hai
Hamen apne jeene ke laale padhe hai

Is ke shayar aur koi nahi lekin hai, Badshah-e-Hind, Jahandar Shah Jahandar. AapHazrat Shah Alam Bahadur ke wali-ahd the. Unke inteqal ke baad 1712 mein takht par baithe magar apni na-ahli aur na-tajurnakari ke wajeh se sirg ek hi saal hukumat kar paaye.  Tazkiron mein unki koi khaas malumat nahi milti hai. Sirf chand jumle milte hai…..

Duniya ke jo maze hai hargiz voh kam na honge
Charche yahin rahenge afsos ham na honge

Mirza Mohammad Taqi Turqi ka hai. Rustam-ul-Mulk Agha Mohammad Taqi Khan ka naam Asadullah tha, unka shumar istizah mein hota hai. Faizabad ke rehne waale the. Mir Soz se islah li. Sahib-e-Diwan the.
Fan aur fankar ke qadar-dan the.  In ke zamaane mein shair aur adba ka majmua unke darnbar se munsalik tha. Atish aur Nasikh donon aapke darbaarion mein shaamil the.

Dil tha mita ke chashm pa karta teri nigaah
Saaghir ko dekhta ke main sheesha sambhalta

Hakeem Sana’ullah Khan Firaaq. Mir Dard ke shagird the. Lodhi Pathan the, 1760 mein Dehli mein paida huye the. Hidayatullah Khan Afghan Hidayat (Farsi aur Rekhti ke shayar aur ustaad-e-fan) ke bhatije the. 1830 mein inteqaal kar gaye.

 Jaari rahega…..

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: