Wasim Barelvi sahab ki kuch aur tareef karna – gar ek purana muhavra istemaal karne ki ijazat ho – aftaab ke rukh par chiragh chamkane ke barabar hain. Aur koi bhi sha’ir ki tareef uske qalaam hi kar sakta hai, is liye Wasim sahab ki ek qita’at aur kuch asha’ar dekhen….. Jahaan par hi na raha jayega mujhse mein wahan hi tafsira karunga…. Aghaz yeh qita’at se kiya jaye….
Jahan darya kahi aapne kinaare chorh deta hai
Koi uthta hai aur toofan ka rukh morh deta hai
(Is asha’ar ko padhne ke baad mere zehn mein achanak ek Maghribi adab ke ek kirdar aaya. Lekin main uska zikr yahan nahi karunga kyunkar main ghazal ka raah rokna nahi chahta hoon… alag se aur jald)
Mujhe bedast-o-pa kar ke bhi khauf us ka nahi jaata
Kahin bhi haadsa guzre woh mujhse jorh deta hai
Bichad ke tujh se kuch jaana agar to is qadr jaana
Woh mitti hoon jise darya kinaare chorh deta hai
(Aur ab aakhri asha’ar… Padhne waalon, khas tawajju ki umeed karunga main. Bahut badhi baat kahi hai Wasim sahab se …. aur aisi jo main apne tajurbe ke bina pe keh sakta hoon ke sach hai)
Mohabbat mein zara si bewafai to zaroori hai
Wohi achcha bhi lagta hai to vaadeh torh deta hai
Khair, ab kuch mukhtalif asha’ar…… Pehla waala Wasim sahab ka kafi mashoor asha’ar hai aur kayi martaba nizam-e-mushaira unka istaqbal ise ko keh kar karte hai….
Jahan rahega wahi roshni lootayega
Kisi chiragh ka apna makan nahi hota
Yeh nihayat dukh ki baat hai ke yeh asha’ar ek asliyat ka bayan hai….
Sharafaton ki yahan koi ahmiyat hi nahi
Kisi ka kuch na bigadon to kaun darta hai
Aur yeh dekhen … ik behad kimti falsafa is mein laya gaya hai aur bahut khubsurti ke saath
Yeh duniya jis mein dobara kahin kuch bhi nahi hota
Yahan kaise kisi ka saath koi chorh jaata hai
Aur yeh bhi dekhen…..
Raat to waqt ki paband hai dhal jayegi
Dekhna yeh hai chiraaghon ka safar kitna hai
Aur yeh….
Tamaam raat sitaron se guftagoo kar li
Ab iske baad tera intezaar kaise ho
Phir….
Zindagi bhar hamen jin par chalna padha
Hum inhi raaston ke musafir na the
Kabhi himmat hui to main zamaane ko batunga
Meri rusvaion mein teri chhap ka haath kitna hai
Yeh kaisi shart lagayi hai meri ankhon ne
Ke tujh ko sochna chorhon to neend aayegi
Yeh aur baat teri nazar mein na aa sake
Varna kahi bhi kam to nahi the kisi se hum
Aur yeh bhi dekhiye
Woh samne aa jaye to rukne lagi saansen
Main phir bhi use dushman-e-jaani nahi kehta
Ek akele shakhs ka naala…..
Sab andheron se koi vaadah kiye baithe hai
Kaun aise mein mujhe shama jalane dega
Aur aajkal ke halaat par
Aaj kal ke raaston ki beyaqeeni dekh kar
Kaun hai jis mein safar ka hausla rah jayega
Maine muddat se koi khwab nahi dekha hai
Haath rakh de meri aankhon pe ke neend aa jaye
Sham tak subah ki nazron se utar jaate hai
Itne samjhauton pe jeete hai ke mar jaate hai
Yeh bhi dekhen… ek alag andaz hai
Kitni gunahgaar hai raaton ki zindagi
Dekho kisi chiragh ki aankhon mein jhaank kar
Aur yeh jabke aap ko asan aur ek zaahir baat lagegi…par jab phir gaur karenge, tabhi aap iski gehrai samajh payenge
Saans ka matlab jaan nahi hai
Jeena koi asaan nahi hai
Maine has has ke guzaara hai tujhe
Zindagi tujh pe mera ahsan hai
Aur phir…. yeh baat bhi sach hai is daur mein…
Musalsal hadson se bas mujhe itni shikayat hai
Ke yeh ansu bahaane ki bhi mohlat nahi dete
Lekin Wasim sahab hausla bhi dete hain, jaise is se dekhen
Hadson ki zad pe hai to muskurana chorh den
Zalazalon ke kahuf se kya ghar banana chorh den
Aur phir
Main kuch is tarah jiya hoon ke yaqeen ho gaya hai
Mere baad zindagi ka bada ehteraam hoga
Aur yeh ek hai jis par kafi logon ko padh kar sochna chahiye…..
Tum giraane mein lage the tum ne socha hi nahi
Main gira to masla ban kar khada ho jaayunga
Aur aakhir mein yeh ek baat hain jo sab ko is khana-e-kharaab mein apne dil mein hargiz rakhni chahiye aur is par amal bhi karna chahiye. Mushkil to hai, lekin tab bhi faida hoga…..
Khushi ki aankh mein aansu ki bhi jagah rakhna
Bure zamaane kabhi puch ke nahi aate